ନୂଆଦିଲ୍ଲୀ,୯।୫: ଋଣଭାରରେ ଡୁବି ରହିଥିବା ଫ୍ୟୁଚର ଗ୍ରୁପ୍ର କମ୍ପାନୀ ଫ୍ୟୁଚର ଏଣ୍ଟରପ୍ରାଇସେସ୍ ଲିମିଟେଡ୍ (ଏଫ୍ଇଏଲ୍) କରଜ ଶୁଝିବା ପାଇଁ ବୀମା କାରବାରରେ ନିଜ ଅଂଶଧନ ବିକ୍ରି କରି ୩୦୦୦ କୋଟି ଟଙ୍କା ସଂଗ୍ରହ କରିବାକୁ ଯୋଜନା ରଖିଛି। କମ୍ପାନୀ ସୂଚନା ଅନୁସାରେ ଏହାଦ୍ୱାରା କମ୍ପାନୀ ଦେବାଳିଆ ହେବାରୁ ରକ୍ଷା ପାଇପାରିବ। ଏହା ପୂର୍ବରୁ ଗତ ଗୁରୁବାର ଏଫ୍ଇଏଲ୍ ପକ୍ଷରୁ ୧୨୬୬.୦୭ କୋଟି ଟଙ୍କା ପାଇଁ ଫ୍ୟୁଚର ଜେନେରାଲି ଇଣ୍ଡିଆ ଇନ୍ସ୍ୟୁରାନ୍ସ କମ୍ପାନୀ ଲିମିଟେଡ୍ (ଏଫ୍ଜିଆଇଆଇସିଏଲ୍) ଜରିଆରେ ଜେନେରାଲିକୁ ୨୫% ଅଂଶଧନ ବିକ୍ରି କରିବା ପ୍ରକ୍ରିୟା ଶେଷ ହୋଇଛି। ଏହାପରଠାରୁ ଏଫ୍ଜିଆଇଆଇସିଏଲ୍ରେ ପ୍ରତ୍ୟକ୍ଷ ଏବଂ ପରୋକ୍ଷ ରୂପରେ ଏଫ୍ଇଏଲ୍ର ୨୪.୯୧% ଅଂଶଧନ କାଏମ୍ ରହିବ। କମ୍ପାନୀ ସୂତ୍ର ଅନୁସାରେ ଆଗାମୀ ୩୦-୪୦ ଦିନ ମଧ୍ୟରେ ସାଧାରଣ ବୀମା କାରବାରରେ ଏଫ୍ଇଏଲ୍ ପକ୍ଷରୁ ଅବଶିଷ୍ଟ ୨୫% ଅଂଶଧନକୁ ୧୨୫୦ କୋଟି ଟଙ୍କାରେ ଅନ୍ୟ କମ୍ପାନୀକୁ ବିକ୍ରି କରାଯିବ। ଏହାଛଡ଼ା ଫ୍ୟୁଚର ଜେନେରାଲି ଇଣ୍ଡିଆ ଲାଇଫ୍ ଇନ୍ସ୍ୟୁରାନ୍ସ କମ୍ପାନୀ ଲିମିଟେଡ୍ରେ ଏଫ୍ଇଏଲ୍ ୩୩.୩% ଅଂଶଧନ ବିକ୍ରି କରିବାର ଯୋଜନା ରହିଛି। ଏହି କାରବାର ଦ୍ୱାରା କମ୍ପାନୀ ୪୦୦ କୋଟିରୁ ଊର୍ଦ୍ଧ୍ୱ ଟଙ୍କା ଠୁଳ କରିପାରିବ। ଏହାଦ୍ୱାରା କିଶୋର ବିୟାନୀଙ୍କ ଗ୍ରୁପ୍ର ଏହି କମ୍ପାନୀ ବୀମା କାରବାରରୁ ସମ୍ପୂର୍ଣ୍ଣ ରୂପେ ବାହାର ହୋଇଯିବ। ଏହି ସମସ୍ତ କାରବାର ଦ୍ୱାରା ଏଫ୍ଇଏଲ୍ ପ୍ରାୟ ୨୯୫୦ କୋଟି ଟଙ୍କା ସଂଗ୍ରହ କରି ଉକ୍ତ ଅର୍ଥ ଜରିଆରେ କମ୍ପାନୀର ଋଣ ଶୁଝାଯାଇପାରିବ। କମ୍ପାନୀକୁ ଦେବାଳିଆ ହେବାରୁ ରକ୍ଷା କରି, ଋଣ ଶୁଝି, କମ୍ପାନୀକୁ ନିୟମିତ କରିବା ଉଦ୍ଦେଶ୍ୟରେ ଏହି ପଦକ୍ଷେପ ନିଆଯାଇଛି। ଏଫ୍ଇଏଲ ପକ୍ଷରୁ ମାର୍ଚ୍ଚ ୩୧ ସୁଦ୍ଧା ବିଭିନ୍ନ ବ୍ୟାଙ୍କ୍ର କନ୍ସୋର୍ଟିୟମ୍ ଏବଂ କରଜଦାତାଙ୍କୁ ୨୯୧୧.୫୧ କୋଟି ଟଙ୍କାର ଋଣ ପରିଶୋଧ କରି ନ ପାରି ଖିଲାପକାରୀ ତାଲିକାଭୁକ୍ତ ଥିଲା। ଏହାଛଡ଼ା ଗତ ଶୁକ୍ରବାର ଫ୍ୟୁଚର ଗ୍ରୁପ୍ର ଅନ୍ୟ ଏକ କମ୍ପାନୀ ଫ୍ୟୁଚର କନ୍ଜ୍ୟୁମର ଲିମିଟେଡ୍ ପକ୍ଷରୁ ଅମର ଚିତ୍ରକଥା ପ୍ରାଇଭେଟ୍ ଲିମିଟେଡ୍ରେ ନିଜର ଅଂଶଧନ ୧୩.୬୨ କୋଟି ଟଙ୍କାରେ ବିକ୍ରି କରିବାକୁ ଘୋଷଣା କରିଥିଲା। ସୂଚନାଯୋଗ୍ୟ, ଏଫ୍ଇଏଲ୍ର ବିଗ୍ ବଜାର, ଇଜି ଡେ’ ଆଣ୍ଡ୍ ହେରିଟେଜ୍ ଭଳି ଖୁଚୁରା ଚେନ୍ କମ୍ପାନୀ ରହିଛି।