ସମ୍ବଲପୁର,୩୦ା୯(ବ୍ୟୁରୋ): ହାଟପଡ଼ା ସାର୍ବଜନୀନ ଦୁର୍ଗାପୂଜା ବହୁ ପୁରାତନ। ସମ୍ବଲପୁର ସହର ବଡ଼ସଡ଼କରୁ ବଡ଼ବଜାରରେ ସୀମିତ ଥିବା ସମୟରୁ ହାଟପଡ଼ାଠାରେ କଳସପୂଜାରେ ଦୁର୍ଗାପୂଜା ଆରମ୍ଭ ହୋଇଥିଲା। ପରବର୍ତ୍ତୀ ସମୟରେ ଦୁର୍ଗାଙ୍କ ଫଟୋଚିତ୍ର ପୂଜା ପାଉଥିବା ବେଳେ ସମ୍ପ୍ରତି ଏହା ଆକର୍ଷଣୀୟ ମେଢ଼ରେ ପରିବର୍ତ୍ତିତ ହୋଇଛି। ଚଳିତବର୍ଷ ୪୦ କେଜି ରୌପ୍ୟ ଅଳଙ୍କାରରେ ଦେବୀ ଦଶଭୁଜା ଦୁର୍ଗାଙ୍କ ସମେତ ପାର୍ଶ୍ୱ ଦେବୀଦେବ ଆଭୂଷିତ ହେବେ। ଅସ୍ତ୍ରଶସ୍ତ୍ର ମଧ୍ୟ ରୌପ୍ୟରେ ନିର୍ମିତ ହୋଇଛି। ସଂପ୍ରତି ଦେଶରେ ବନ୍ୟପ୍ରାଣୀ ଲୋପ ପାଇବାରେ ଲାଗିଛି। ଜଙ୍ଗଲ ସୁରକ୍ଷା ଓ ବଣ୍ୟପ୍ରାଣୀଙ୍କ ସୁରକ୍ଷାକୁ ଦୃଷ୍ଟିରେ ରଖି ପୂଜା କମିଟି ୧୬ଫୁଟ୍ ଉଚ୍ଚତାର କିଙ୍ଗକଙ୍ଗ (ସିମ୍ପାଞ୍ଜି) ମେଢ଼ ନିର୍ମାଣ କରୁଛି। ସମ୍ବଲପୁର ମହାନଗର ନିଗମର କାନିଜୁରି ଶିଳ୍ପୀ ଚଏତୁ କନ୍ଧଙ୍କ ତତ୍ତ୍ବାବଧାନରେ ୮ଜଣ କାରିଗର ସଚେତନତା ମେଢ଼ ତିଆରି କରୁଛନ୍ତି। ଏଥିସହ ମୁଖ୍ୟଦ୍ୱାରରୁ ପୂଜାମଣ୍ଡପ ପର୍ଯ୍ୟନ୍ତ ସବୁଜ ବନାନୀ, ପାହାଡ଼, ଝରଣା ଓ ବଣ୍ୟପ୍ରାଣୀରେ ସଜ୍ଜିତ କରାଯାଉଛି। ମୂର୍ତ୍ତି କାରିଗର ମୋହନ ରଣା ଓ ଦେବାନନ୍ଦ ରଣା ୮ଫୁଟ୍ ଉଚ୍ଚତାର ଦଶଭୁଜା ଦୁର୍ଗା ଓ ପାର୍ଶ୍ୱ ଦେବୀଦେବ ତିଆରି କରୁଛନ୍ତି। କମିଟି ସଭାପତି ଦୀପକ ବରାଳ ସୂଚନା ଦେଇ କହିଛନ୍ତି, ଚଳିତବର୍ଷ ୯ରୁ ୧୦ଲକ୍ଷ ଟଙ୍କା ବ୍ୟୟ ଅଟକଳ ସ୍ଥିର ହୋଇଛି। ୩ଶହ ସଭ୍ୟ ସାମର୍ଥ୍ୟ ଅନୁସାରେ ପୂଜା କମିଟିକୁ ଅର୍ଥଦାନ କରିଛନ୍ତି। ୩ଦିନ ଧରି ଭଜନ ସନ୍ଧ୍ୟା କାର୍ଯ୍ୟକ୍ରମ ହେବ। ଦଶମୀ ଦିନ ୨ହଜାର ଭକ୍ତଙ୍କ ପାଇଁ ମହାଭୋଗ ପ୍ରସ୍ତୁତ କରାଯିବ। ସାଧାରଣ ସମ୍ପାଦକ ସୋମନାଥ ସେଠ କହିଛନ୍ତି ଯେ, ଭଷାଣୀ ଶୋଭାଯାତ୍ରାରେ ମୟୂରଭଞ୍ଜର କଳସ ନାଚ, ସୁନ୍ଦରଗଡ଼ର ମହିଳା ସମ୍ପ୍ରଦା, ସୋନପୁର ଜିଲା ଭଣ୍ଡାର ଗ୍ରାମର ଘଣ୍ଟବାଦ୍ୟ, ଗଞ୍ଜାମ ଜିଲାର ଯୋଡ଼ି ଶଙ୍ଖ, ରାୟଗଡ଼ାର ଝାଞ୍ଜ, କୁଚିଣ୍ଡାର ବାଡ଼ିନାଚ, ବଙ୍ଗାଳି ଢ଼ାକି ବାଜା, ସମ୍ବଲପୁରର ଦୁଲଦୁଲି ଓ ଡିଜେ ସାମିଲ ହେବ। ଦୁର୍ଗାପୂଜା ଲାଗି କୋଷାଧ୍ୟକ୍ଷ ବିଶ୍ୱଜିତ ଦେହୁରି, ଆଖଡ଼ା ଓସ୍ତାଦ ପ୍ରଶାନ୍ତ ସେଠ, ଉପଦେଷ୍ଟା ଦିଲୀପ କୁମାର ସାହୁ, ଦୁର୍ଗା ପରଡିଆ, ଗୋବିନ୍ଦ ସାଙ୍କ ସମେତ ୩ଶହ ସଭ୍ୟ ପ୍ରସ୍ତୁତିରେ ଲାଗିଛନ୍ତି। ପଡ଼ାର କାରିଗର ସତ୍ୟଜିତ ନାଏକ, ରାକେଶ ବର୍ଗେ ଓ ସୁନିଲ ବାଗ ଦେବୀଙ୍କ ପରଭା ନିର୍ମାଣ କରୁଛନ୍ତି।