ପୁରୀ,୩ା୧(ଅଜିତ୍ କୁମାର ମହାନ୍ତି):ଗତ ଡିସେମ୍ବର ୧୭ରୁ ଶ୍ରୀମନ୍ଦିର ପ୍ରଶାସନ ଏବଂ ଛତିଶା ନିଯୋଗର ନିଷ୍ପତ୍ତି ଅନୁଯାୟୀ ଶ୍ରୀମନ୍ଦିରରେ ମହାପ୍ରଭୁଙ୍କ ଦ୍ୱିତୀୟ ଭୋଗ ମଣ୍ଡପ ସମ୍ପନ୍ନ ହେବା ପରେ ସରକାରଙ୍କ ମାର୍ଗଦର୍ଶିକା ଅନୁଯାୟୀ ଏଏସ୍ଆଇ ପକ୍ଷରୁ ରତ୍ନଭଣ୍ଡାର ମରାମତି କାର୍ଯ୍ୟ ଆରମ୍ଭ ହୋଇଥିଲା। ତେବେ ୨୫ ତାରିଖରୁ ଶ୍ରୀମନ୍ଦିରରେ ଶ୍ରଦ୍ଧାଳୁଙ୍କ ଭିଡ଼, ନୀତିକାନ୍ତିକୁ ଠିକ୍ ଭାବେ ସମ୍ପାଦନ କରିବା ଏବଂ ଭକ୍ତଙ୍କ ଶୃଙ୍ଖଳିତ ଦର୍ଶନକୁ ଗୁରୁତ୍ୱ ଦେଇ ଡିସେମ୍ବର ୨୫ରୁ ଜାନୁଆରୀ ୨ତାରିଖ ପର୍ଯ୍ୟନ୍ତ ରତ୍ନଭଣ୍ଡାର ମରାମତି କାର୍ଯ୍ୟ ସ୍ଥଗିତ ରଖିବାକୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଥିଲା। ଏବେ ପ୍ରଶାସନର ନିଷ୍ପତ୍ତି ମୁତାବକ ୩ ତାରିଖ ଶୁକ୍ରବାରଠାରୁ ମରାମତି କାର୍ଯ୍ୟ ପୁନର୍ବାର ଆରମ୍ଭ ହେବାକୁ ଯାଉଛି। ଏନେଇ ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ତଥା ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ କହିଛନ୍ତି, ଭକ୍ତଙ୍କ ଭିଡ଼କୁ ଦୃଷ୍ଟିରେ ରଖି ମରାମତି କାର୍ଯ୍ୟ ସ୍ଥଗିତ ରଖାଯାଇଥିଲା। ୩ତାରିଖରୁ ପୁନର୍ବାର ଧାର୍ଯ୍ୟ ସମୟରେ କାମ ଆରମ୍ଭ କରାଯିବ। ଆସନ୍ତା ସଂକ୍ରାନ୍ତି ପର୍ଯ୍ୟନ୍ତ ଏପରି ଚାଲିବ। ଅଧିକ ସମୟ ଯେପରି କାର୍ଯ୍ୟ ହେବ ସେ ନେଇ ଚେଷ୍ଟା କରାଯାଉଛି। ଏନେଇ ଆଲୋଚନା ହୋଇଥିବାବେଳେ ଏଏସ୍ଆଇ ପ୍ରସ୍ତୁତ ରହିଛି। ଏଏସ୍ଆଇ ପକ୍ଷରୁ ଯେଉଁ ସମୟ ଦିଆଯାଇଛି, ସେହି ସମୟ ମଧ୍ୟରେ କାର୍ଯ୍ୟ ସରିବ ବୋଲି ଆଶା କରାଯାଉଛି। ଜିପିଆର୍ଏସ୍ ସର୍ଭେ ଅନୁଯାୟୀ କାର୍ଯ୍ୟ କରାଯାଉଛି। ଭାରା ବନ୍ଧା ହେବା ସହ ସଫେଇ କରାଯାଇ ପଲସ୍ତରା ଛଡ଼ାଯାଇଛି। ଆଗକୁ ଯାହା କାର୍ଯ୍ୟ ହେବ ସେ ନେଇ ଏଏସ୍ଆଇ ପକ୍ଷରୁ ସୂଚନା ଦିଆଯିବ। ସେହିପରି ସିଂହଦ୍ୱାର ଗୁମୁଟ ମଣିବନ୍ଧ ସହ ପତିତପାବନ ମନ୍ଦିର ଉପର ଅଂଶର ରୁପା ଛାଉଣି କରାଯାଇଛି। ଆଗକୁ ରତ୍ନଭଣ୍ଡାର କବାଟ ରୁପା ଓ ସୁନା ଛାଉଣି କରିବାକୁ ନିଷ୍ପତ୍ତି ହୋଇଛି। ଭକ୍ତମାନେ ଅନେକ ସମୟରେ ମହାପ୍ରଭୁଙ୍କ ଉଦ୍ଦେଶ୍ୟରେ ସୁନା ଓ ରୁପା ଦାନ କରିଛନ୍ତି। ସେଗୁଡ଼ିକ ସାଇତା ହୋଇରହିଛି। ଆଗକୁ ଏ ନେଇ ପଦକ୍ଷେପ ଗ୍ରହଣ କରାଯିବ। ସେହିପରି ଏମାର ମଠରୁ ମିିଳିଥିବା ରୁପା ଇଟା ଶ୍ରୀମନ୍ଦିରକୁ ଅଣାଯାଉ ବୋଲି ସେବାୟତଙ୍କ ଦାବି ରହିଛି। ତେବେ ଏନେଇ ପରିଚାଳନା କମିଟିରେ ଆଲୋଚନା କରାଯାଇ ଆଇନ ବିଭାଗକୁ ଜଣାଯାଇଛି। ଆଲୋଚନା କରାଯାଇ ଯାହାକିଛି ପଦକ୍ଷେପ ଗ୍ରହଣ କରାଯିବ ବୋଲି ଜିଲାପାଳ ସ୍ବାଇଁ କହିଛନ୍ତି।
