ପଟ୍ଟାଙ୍ଗି,୨ା୬(ଶରତ ଧଳ): ମୃତ୍ୟୁ କାହାକୁ କେତେବେଳେ କେଉଁ ମୁହୂର୍ତ୍ତରେ ଆସିବ କେହି କହିପାରିବେ ନାହିଁ। ଠିକ୍ ସେମିତି ଜଣେ ବ୍ୟକ୍ତି ଲୁଗାପଟା ସଫା କରୁଥିବା ବେଳେ ତାଙ୍କ ଜୀବନ ଚାଲିଯାଇଛି। ଏହିପରି ଏକ ଦୁଃଖଦ ଘଟଣା ଘଟିଛି କୋରାପୁଟ ଜିଲା ପଟ୍ଟାଙ୍ଗି ବ୍ଲକ ଅନ୍ତର୍ଗତ ତଥା ମାଳିପୁଟ ପଞ୍ଚାୟତର କୁନ୍ଦୁଲି ହାଟପଦାରେ।
ସୂଚନାନୁଯାୟୀ, ହାଟପଦା ଲୋକଙ୍କ କହିବା ଅନୁଯାୟୀ ବିହାର ରାଜ୍ୟର ମୋତିଆରି ଜିଲା ଅଧିନସ୍ଥ ପତାଇ ଥାନା ଅଧୀନରେ ରହିଥିବା ପଦମ କେର୍ ଗ୍ରାମର ଦିଗନ ସାହା କିଛି ଦିନ ହେଲା ହାଟପଦାରେ ରହି ବିଭିନ୍ନ ଗ୍ରାମ ବୁଲି ସୁନା ଗହଣା ସଫାସୁତରା କରି ଗୁଜରାଣ ମେଣ୍ଟାଉଥିଲେ। କିନ୍ତୁ ତାଙ୍କର ବାତ ରୋଗ ରହିଥିବା ସହ ଅନେକ ସମୟରେ ମଦ୍ୟପାନ ମଧ୍ୟ କରୁଥିଲେ। ରବିବାର ସକାଳେ ଦିଗମ ହାଟପଦା ନିକଟରେ ରହିଥିବା ନଦୀକୁ ଗାଧୋଇବାକୁ ଯାଇ ଲୁଗାପଟା ସଫା କରୁଥିଲେ। ଏହି ସମୟରେ ତାଙ୍କୁ ବାତ ମାରିବାରୁ ନଦୀ ପାଣିରେ ମୁହଁ ମାଡ଼ି ପଡ଼ି ଯାଇଥିଲେ। ଏହା ଦେଖି ସ୍ଥାନୀୟ ବାସିନ୍ଦା ତାଙ୍କୁ ଉଦ୍ଧାର କରିଥିଲେ ମଧ୍ୟ ଦିଗମଙ୍କର ମୃତ୍ୟୁ ଘଟିଥିଲା । ଖବର ପୂର୍ବତନ ବ୍ଲକ ଅଧ୍ୟକ୍ଷ ଜଗତଜ୍ୟୋତି ପାଙ୍ଗି ଘଟଣାସ୍ଥଳରେ ପହଞ୍ଚି ସମସ୍ତ ଘଟଣା ସମ୍ପର୍କରେ ଅବଗତ ହୋଇ ପଟ୍ଟାଙ୍ଗି ପୋଲିସକୁ ଖବର ଦେଇଥିଲେ। ଘଟଣାସ୍ଥଳରେ ଥାନାଧିକାରୀ ଚତୁର୍ଭୁଜ ନାୟକ , ଏସ୍ଆଇ ପ୍ରଦୀପ୍ତ କୁମାର ମହାପାତ୍ର ପହଞ୍ଚି ମୃତଦେହ ଜବତ କରି ତଦନ୍ତ ଆରମ୍ଭ କରିବା ସହ ବ୍ୟବଚ୍ଛେଦ ପାଇଁ ପଠାଇଛନ୍ତି। ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ।