ଭୁବନେଶ୍ୱର,୩୦ା୯(ବ୍ୟୁରୋ): କରୋନା ସମୟରେ ମୋଟ ୮,୫୩,୭୭୭ ପ୍ରବାସୀ ଶ୍ରମିକ ରାଜ୍ୟକୁ ଫେରିଥିଲେ। ସେମାନଙ୍କ ପଞ୍ଜୀକରଣ, କାମ ଓ ଖର୍ଚ୍ଚ ବାବଦକୁ ରାଜ୍ୟ ସରକାର ଖର୍ଚ୍ଚ କରିଥିବା ଅର୍ଥର ତଥ୍ୟ ସଂଗ୍ରହ କରାଯାଉଥିବା ଶ୍ରମ ଓ କର୍ମଚାରୀ ରାଜ୍ୟ ବୀମା ମନ୍ତ୍ରୀ ସୁଶାନ୍ତ ସିଂହ କହିଛନ୍ତି। ବିଭିନ୍ନ ବିଭାଗ ଦ୍ୱାରା ଏହି ଅର୍ଥ ଖର୍ଚ୍ଚ କରାଯାଇଥିବାରୁ ତଥ୍ୟ ମଗାଯାଇଛି। ତେବେ ପ୍ରବାସୀଙ୍କ ପାଇଁ ବ୍ୟବହୃତ ୨୭୭ ଶ୍ରମିକ ଏକ୍ସପ୍ରେସ୍ ଟ୍ରେନ୍ର ଭଡ଼ା ବାବଦକୁ ରାଜ୍ୟ ସରକାର ପୂର୍ବତଟ ରେଳପଥକୁ ୯ କୋଟି ଟଙ୍କା ପ୍ରଦାନ କରିଥିବା ମନ୍ତ୍ରୀ ସୂଚନା ଦେଇଛନ୍ତି। ବିଧାୟକ ମୋହନ ଚରଣ ମାଝି, କଂଗ୍ରେସ ବିଧାୟକ ସୁରେଶ କୁମାର ରାଉତରାୟଙ୍କ ଦୁଇଟି ପ୍ରଶ୍ନର ଉତ୍ତରରେ ସେ ଏହା କହିଥିଲେ। ସେହିଭଳି ରାଜ୍ୟକୁ ଫେରିଥିବା ମୋଟ ୮,୫୩,୭୭୭ ଶ୍ରମିକଙ୍କ ମଧ୍ୟରୁ କେତେଜଣ କୁଶଳୀ ଓ ଅଣକୁଶଳୀ ଶ୍ରମିକ ପୁନର୍ବାର ଜୀବିକା ପାଇଁ ଅନ୍ୟ ରାଜ୍ୟକୁ ଫେରିଛନ୍ତି ସେ ସମ୍ବନ୍ଧରେ କୌଣସି ତଥ୍ୟ ହସ୍ତଗତ ହୋଇନି। ସେହିଭଳି ଓଡ଼ିଶାର କେତେଜଣ ଶ୍ରମିକ ନିଯୁକ୍ତି ହରାଇଛନ୍ତି ତାହାର ମଧ୍ୟ ତଥ୍ୟ ନାହିଁ ବୋଲି ବିଧାୟକ ଶଙ୍କର ଓରାମ୍ଙ୍କ ଏକ ପ୍ରଶ୍ନର ଉତ୍ତରରେ ମନ୍ତ୍ରୀ ସିଂହ କହିଥିଲେ।
