ନୂଆଦିଲ୍ଲୀ,୬।୭ : ଚାଇନା କମ୍ପାନୀଗୁଡ଼ିକ ପକ୍ଷରୁ ୫୦ ନିବେଶ ପ୍ରସ୍ତାବ ଉପରେ ସରକାର ବର୍ତ୍ତମାନ ତର୍ଜମା କରୁଛନ୍ତି। ନୂଆ ସ୍କ୍ରିନିଂ ନୀତି ଅନୁସାରେ ସରକାର ଏଭଳି ପଦକ୍ଷେପ ଗ୍ରହଣ କରିଥିବା ପ୍ରକ୍ରିୟା ସହ ଜଡିତ ଜଣେ ଅଧିକାରୀ ପ୍ରକାଶ କରିଛନ୍ତି। ସରକାର ଏପ୍ରିଲରେ ଆଣିଥିବା ନୂଆ ନୀତି ଦ୍ୱାରା ପଡ଼ୋଶୀ ରାଷ୍ଟ୍ରଗୁଡିକ ଭାରତରେ ନିବେଶ କରିବା ପୂର୍ବରୁ ସରକାରଙ୍କ ଅନୁମତି ଲୋଡ଼ା ପଡିବ। ଭାରତ ସରକାରଙ୍କ ଏଭଳି ନୀତିକୁ ଚାଇନା ସରକାର ପୂର୍ବରୁ ସମାଲୋଚନା କରିଛନ୍ତି। ଚାଇନା ସେନା ପକ୍ଷରୁ ୨୦ ଭାରତୀୟ ଯବାନ ଶହୀଦ ହେବା ପରେ ଦୁଇ ଦେଶ ମଧ୍ୟରେ ସମ୍ପର୍କରେ ତିକ୍ତତା ଆସିଛି। ବର୍ତ୍ତମାନ ବଜାର ପ୍ରଭାବିତ ସ୍ଥିତିରେ ରହିଥିବା ବେଳେ ସୁଯୋଗର ଫାଇଦା ନେଇ ଚାଇନା କମ୍ପାନୀ ଭାରତୀୟ କମ୍ପାନୀଗୁଡିକରୁ ଶେୟାର କ୍ରୟ କରୁଥିବା ନଜରରେ ଆସିଛି। ଏଭଳି ପ୍ରକ୍ରିୟାକୁ ବନ୍ଦ କରିବାକୁ ସରକାର ନୀତିରେ ପରିବର୍ତ୍ତନ କରିଥିବା ଜଣାପଡିଛି। ସରକାରଙ୍କ ଆଗାମୀ କାର୍ଯ୍ୟପନ୍ଥା କ’ଣ ରହିବ ସେ ନେଇ କମ୍ପାନୀଗୁଡିକ ଅପେକ୍ଷାରେ ରହିଛନ୍ତି। ସରକାର ଗତ ସପ୍ତାହରେ ଟିକ୍ଟକ୍ ସମେତ ଅନ୍ୟ ୫୯ ଚାଇନା ଆପ୍ଲିକେଶନକୁ ବାତିଲ କରିଛନ୍ତି। ବର୍ତ୍ତମାନ ସୁଦ୍ଧା ଚାଇନା କମ୍ପାନୀଗୁଡିକ ଭାରତରେ ୨୬ ବିଲିୟନ ଡଲାରରୁ ଊର୍ଦ୍ଧ୍ୱ ନିବେଶ କରିଥିବା ଜଣାପଡିଛି।