କଟକ ଅଫିସ/ପୁରୀ ଅଫିସ,୯ା୯: ପୁରୀ ବଡ଼ଦାଣ୍ଡରେ ଥିବା ବଗଲା ଧର୍ମଶାଳା ଜମି ବିବାଦ ମାମଲାରେ ଗୁରୁବାର ହାଇକୋର୍ଟ ଅନ୍ତରୀଣ ନିର୍ଦ୍ଦେଶକୁ ବଳବତ୍ତର ରଖିଛନ୍ତି। ଏଥିସହ ଜବାବ ଦାଖଲ କରି ନ ଥିବା ପ୍ରତିପକ୍ଷଙ୍କୁ ୮ ସପ୍ତାହ ଭିତରେ ଜବାବ ଦାଖଲ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ଏହି ମାମଲାରେ ଜବାବ ଦାଖଲ ଲାଗି ରାଜ୍ୟ ସରକାର ଅଧିକ ସମୟ ନେଇଛନ୍ତି। ମୁଖ୍ୟ ବିଚାରପତି ଡ. ଏସ୍. ମୁରଲୀଧର ଓ ବିଚାରପତି ଚିତ୍ତରଞ୍ଜନ ଦାଶଙ୍କୁ ନେଇ ଗଠିତ ଖଣ୍ଡପୀଠ ଏଥିପାଇଁ ଅନୁମତି ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ନଭେମ୍ବର ୩୦କୁ ଧାର୍ଯ୍ୟ ହୋଇଛି।
ସୂଚନାଯୋଗ୍ୟ, ବଗଲା ଧର୍ମଶାଳାକୁ ହୋଟେଲ୍ ଓ ଲଜ୍ ଉଦ୍ଦେଶ୍ୟରେ ଦିଆଯିବା ଘଟଣାକୁ ଦୃଢ଼ ବିରୋଧ କରି ହାଇକୋର୍ଟରେ ଏକାଧିକ ଆବେଦନ ହୋଇଛି। ଆବେଦନରେ ଦର୍ଶାଯାଇଛି ଯେ, ଶ୍ରୀମନ୍ଦିର ସଂସ୍କାର ମାମଲାରେ ସର୍ବୋଚ୍ଚ ଅଦାଲତ ପୁରୀରେ ୬୦ହଜାର ଭକ୍ତଙ୍କ ରହିବା ପାଇଁ ବନ୍ଦୋବସ୍ତ କରିବାକୁ ନିର୍ଦ୍ଦେଶ ଦେଇଥିଲେ। ରାଜ୍ୟ ସରକାର ଏହା ନ କରି ପରିକ୍ରମା ପ୍ରକଳ୍ପରେ ଜାଗା ହରାଇଥିବା ପରିବାରଙ୍କୁ ସେଠାରେ ଜାଗା ଦେଇଥିଲେ। ସେମାନେ ସେଠାରେ ହୋଟେଲ୍ ଓ ଲଜ୍ କରିବାକୁ ମସୁଧା ଚଳାଇଛନ୍ତି। ବଗଲା ବିବାଦ ମାମଲାରେ ମୁଖ୍ୟ ଶାସନ ସଚିବ ଏବଂ ଶ୍ରୀମନ୍ଦିର ମୁଖ୍ୟ ପ୍ରଶାସକ ପ୍ରମୁଖଙ୍କୁ ପକ୍ଷଭୁକ୍ତ କରାଯାଇଛି। ପୂର୍ବରୁ ଦୁଇଟି ଶୁଣାଣିରେ ରାଜ୍ୟ ସରକାର, ପୁରୀ ପୌରସଂସ୍ଥା, ଓଡ଼ିଶା ସେତୁ ନିର୍ମାଣ ନିଗମ (ଓବିସିସି) ଏବଂ ପୁରୀ-କୋଣାର୍କ ଉନ୍ନୟନ କର୍ତ୍ତୃପକ୍ଷ (ପିକେଡିଏ)ଙ୍କୁ ସତ୍ୟପାଠ ଦାଖଲ ଲାଗି କୋର୍ଟ ନିର୍ଦ୍ଦେଶ ଦେଇଥିଲେ। ମାତ୍ର ସେମାନେ ସତ୍ୟପାଠ ଦାଖଲ କରିପାରି ନ ଥିଲେ। ତେଣୁ ସେମାନେ ଏଥିଲାଗି ଅଧିକ ସମୟ ମାଗିଛନ୍ତି। ସେହିପରି ଗୁରୁବାର ଶୁଣାଣି ସମୟରେ ଆବେଦନକାରୀ ଜଗନ୍ନାଥ ବସ୍ତିଆଙ୍କ ପକ୍ଷରୁ ଦର୍ଶାଯାଇଥିଲା ଯେ, ସଂଶୋଧନ ଆବେଦନ ଉପରେ ଜବାବ ରଖିବାକୁ ସରକାରଙ୍କୁ ମେ’ ୨ରେ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ଏଥିଲାଗି ସରକାର ଜୁନ ୨୨ରେ ୪ ସପ୍ତାହ ସମୟ ନେଇଥିଲେ। ମାତ୍ର ଜବାବ ଦାଖଲ କରିପାରି ନ ଥିଲେ।