କଣ୍ଟାବାଞ୍ଜି, ୬।୨(ଡି.ଏନ.ଏ.): ବଲାଙ୍ଗୀର ଜିଲା ତୁରେକେଲା ବ୍ଲକ ବଡଡକଲା ପଞ୍ଚାୟତର ମାଓବାଦୀ ପ୍ରବଣ ଡଙ୍ଗାମରା ଗାଁ। ଗାଁରେ ଅଧିକାଂଶ ଲୋକ ଆଦିବାସୀ ସମ୍ପ୍ରଦାୟର। ଜଙ୍ଗଲଜାତ ଦ୍ରବ୍ୟ ସଂଗ୍ରହ ଓ ଚାଷ କରି ଗ୍ରାମବାସୀ ଜୀବିକା ନିର୍ବାହ କରନ୍ତି। ବଣ ପାହାଡଘେରା ଏହି ଗାଁ ସରକାରଙ୍କ ବିଭିନ୍ନ ଜନକଲ୍ୟାଣ ଯୋଜନାରୁ ବଞ୍ଚିତ ରହିଛି। ଗାଁକୁ ରାସ୍ତା ନାହିଁ, ଲୋକେ ଆଜି ବି ନାଳ, ଚୂଆ ପାଣି ବ୍ୟବହାର କରନ୍ତି। ଡିବିରି ଆଲୁଅ ଉପରେ ଆଜି ବି ନିର୍ଭରଶୀଳ ଡଙ୍ଗାମରାବାସୀ। ଶିକ୍ଷା, ସ୍ବାସ୍ଥ୍ୟସେବା କଥା ନ କହିଲେ ଭଲ।
ଧୁଣ୍ଡେଲ ସଂରକ୍ଷିତ ଜଙ୍ଗଲ ଅଞ୍ଚଳରେ ରହିିଛି ଡଙ୍ଗାମରା ଗାଁ। ବରିହାମୁଣ୍ଡା, ପହରିଆପଡା, ଗୁହୁରିଆପଡା, ଡଙ୍ଗାମରାକୁ ନେଇ ଗଠିତ ଏହି ଗାଁରେ ମୋଟ ୨୦୦ ପରିବାର ବାସ କରନ୍ତି। ଅଦ୍ୟାବଧି ରାଜସ୍ବ ଗ୍ରାମର ମାନ୍ୟତା ପାଇ ନ ଥିବାରୁ କୌଣସି ସରକାରୀ ଯୋଜନା ଏଠାରେ କାର୍ଯ୍ୟକାରୀ କରାଯାଇ ପାରୁନାହିଁ। ନିଜସ୍ବ ଉଦ୍ୟମରେ ଯିଏ ଯେମିତି ଘର, ବାଡି କରିଛନ୍ତି। ୩୦ରୁ ୪୦ ପ୍ରାଥମିକ ଶିକ୍ଷା ପାଇବା ପାଇଁ ଯୋଗ୍ୟ ପିଲା ଥିଲେ ବି ଶିକ୍ଷାଦାନର କୌଣସି ବ୍ୟବସ୍ଥା ନାହିଁ। ପ୍ରାଥମିକ ଶିକ୍ଷା ପାଇଁ ୬ କିମି ଦୂର ବଡଡକଲା ଆଶ୍ରମ ସ୍କୁଲ, ୪ କିମି ଦୂର ଡମନିଚୁଆଁ କିମ୍ବା ପାହାଡ ଚଢି ସୀମାନ୍ତ ନୂଆପଡା ଜିଲା କୋମନା ବ୍ଲକର ବଣ୍ଡାଯୋର ଗାଁକୁ ପଢିବା ପାଇଁ ଯାଆନ୍ତି। ଗାଁରେ ଗୋଟିଏ ହେଲେ ନଳକୂପ ନାହିଁ। ଫଳରେ ଚାଷ ଜମିରେ ଚୂଆ ଖୋଳି ପାଣି ବ୍ୟବହାର କରନ୍ତି। ଖରାଦିନେ ଚୁଆ ଶୁଖିଗଲେ ୬/୭ କି.ମି. ଦୂର ଡବଲା ଯୋର ନାଳ ପାଣିକୁ ଗ୍ରାମବାସୀ ସ୍ନାନଶୌଚ ଓ ପିଇବାରେ ବ୍ୟବହାର କରିଥାନ୍ତି। ଆଜି ବି ସ୍ବାସ୍ଥ୍ୟସେବା ପାଇଁ କ୍ୱାକ୍ଙ୍କ ଉପରେ ନିର୍ଭର କରିବାକୁ ପଡୁଛି। ରୋଗ ଗୁରୁତର ହେଲେ ବଡଡକଲାସ୍ଥିତ ଆର୍ୟୁବୈଦିକ ଚିକିତ୍ସା କେନ୍ଦ୍ର, ୨୦ କିମି ଦୂର ତୁରେକେଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଥବା ନୂଆପଡା ଜିଲା କୋମନା ସିଏଚସିକୁ ଯାଇଥାନ୍ତି। କୌଣସି ଆଶାକର୍ମୀ ନ ଥିବାରୁ ଗର୍ଭବତୀ ଓ ପ୍ରସୂତି ମହିଳା ଡାକ୍ତରୀ ସୁବିଧାରୁ ବଞ୍ଚିତ ହୋଇଥାନ୍ତି। ଜଙ୍ଗଲ ଜମି ପଟ୍ଟା ମିଳିଥିଲେ ସୁଦ୍ଧା ଜଙ୍ଗଲ ଜମିରେ କୌଣସି ସରକାରୀ ଉନ୍ନୟନ କାମ କରାଯାଇ ପାରୁନାହିଁ। ଇନ୍ଦିିରା ଆବାସ, ପ୍ରଧାନମନ୍ତ୍ରୀ ଆବାସ କିମ୍ବା ବିଜୁ ପକ୍କା ଘର ଡଙ୍ଗାମରା ଗ୍ରାମବାସୀଙ୍କ ପାଇଁ ସ୍ବପ୍ନ ହୋଇ ରହିଛି।