ନୂଆଦିଲ୍ଲୀ,୩୧।୧୨: କରୋନା ମହାମାରୀ ଯୋଗୁ ବିଶ୍ୱର ପ୍ରମୁଖ ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥା ମଧ୍ୟରେ ଭାରତ ସବୁଠାରୁ ବେଶି କ୍ଷତିଗ୍ରସ୍ତ ହୋଇଛି। ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ଦେଶର ମୋଟ ଘରୋଇ ଉତ୍ପାଦ(ଜିଡିପି) -୨୩.୯% ଖସିଥିବା ବେଳେ ଦ୍ୱିତୀୟ ତ୍ରୈମାସରେ ଏହା ୭.୫% ନିମ୍ନରେ ରହିଛି। ୨୦୨୦-୨୧ରେ ଅଭିବୃଦ୍ଧି ଋଣାତ୍ମକ ରହିବା ନେଇ ରିଜର୍ଭ ବ୍ୟାଙ୍କ ମଧ୍ୟ ଏହାର ରିପୋର୍ଟରେ ପ୍ରକାଶ କରିଛି। ଏଭଳି ସ୍ଥିତିରେ କୋଭିଡ୍ ପ୍ରଭାବିତ ବଜାରକୁ ପୁଣି ଥରେ ଅଭିବୃଦ୍ଧି ଫେରାଇ ଆଣିବା ଲାଗି ସରକାର ବିଭିନ୍ନ ଯୋଜନା ହାତକୁ ନେଉଛନ୍ତି। ଚଳିତ ବର୍ଷ ଅଧିକ ଖର୍ଚ୍ଚ କରିବାକୁ ପଡୁଥିବାରୁ ଦେଶର ବିତ୍ତୀୟ ନିଅଣ୍ଟ ବଢିଛି। ଏଭଳି ସ୍ଥିତିରେ ମଧ୍ୟ ସରକାର ତାଙ୍କ ଖର୍ଚ୍ଚ କମାଇବେ ନାହିଁ ବୋଲି ପ୍ରକ୍ରିୟା ସହ ଜଡିତ ଜଣେ ବରିଷ୍ଠ ଅଧିକାରୀ ବ୍ଲୁମବର୍ଗକୁ କହିଛନ୍ତି।
ଅର୍ଥ ଗଚ୍ଛିତ କରି ରଖିବାକୁ ଅର୍ଥ ମନ୍ତ୍ରଣାଳୟ ବିଭିନ୍ନ ବିଭାଗ ଏବଂ ମନ୍ତ୍ରଣାଳୟକୁ କହିଥିଲା। ଚଳିତ ବର୍ଷର ବଜେଟ ୩୦ ଲକ୍ଷ କୋଟି ଟଙ୍କାରୁ ଟପିବା ନେଇ ଅଧିକାରୀ ଜଣକ ମତ ପ୍ରକାଶ କରିଛନ୍ତି। ଫେବୃୟାରୀ ପହିଲାରେ ସରକାରଙ୍କ ବଜେଟ ଆସିବ। ଏଥିରେ ବିସ୍ତୃତ ଖର୍ଚ୍ଚ ସମ୍ପର୍କରେ ଜଣାପଡିବ। ସୂଚନା ଏବେ ଯାଏ ସାର୍ବଜନୀନ ହୋଇ ନ ଥିବାରୁ ଅଧିକାରୀ ଜଣକ ନାମ ଗୋପନ ରଖି ଏହା କହିଛନ୍ତି। କରୋନା ମହାମାରୀ ଯୋଗୁ ରାଜକୋଷ ଉପରେ ମଧ୍ୟ ଗଭୀର ପ୍ରଭାବ ପଡିଛି। ହେଲେ ବଜାର ପ୍ରଭାବିତ ହୋଇ ରହିଥିବାରୁ ଏହାକୁ ସୁଧାରିବା ଲାଗି ଆବଶ୍ୟକ ପୁଞ୍ଜି ବିନିଯୋଗର ମଧ୍ୟ ଗୁରୁତ୍ୱକୁ ଦେଖିବାକୁ ହେବ। ଏଭଳି ବିଭିନ୍ନ ଦିଗକୁ ବିଚାରକରି କେନ୍ଦ୍ର ସରକାର ଖର୍ଚ୍ଚ ଉପରେ ଫୋକସ କରିବେ ବୋଲି ଅଧିକାରୀ ମତ ରଖିଛନ୍ତି।
ଭାରତ ବଜାର ବର୍ତ୍ତମାନ ଟେକ୍ନିକାଲ ରିସେଶନ ଦେଇ ଗତି କରୁଛି। ଲକ୍ଡାଉନ ଯୋଗୁ ବଜାର ସଙ୍କଟ ସ୍ଥିତି ଦେଇ ଗତି କରୁଛି। ବଜେଟ ଖର୍ଚ୍ଚ ବାଦ୍ ସରକାର ଜିଡିପିର ପ୍ରାୟ ୧୫% ଦେଶର ଅର୍ଥ ବ୍ୟବସ୍ଥାକୁ ସୁଧାରିବା ଲାଗି ଖର୍ଚ୍ଚ କରିଛନ୍ତି। ଖର୍ଚ୍ଚ ପାଇଁ ସରକାର ପଛଘୁଞ୍ଚା ଦେବେ ନାହିଁ ବୋଲି କିଛିଦିନ ତଳେ ଅର୍ଥମନ୍ତ୍ରୀ ନିର୍ମଳା ସୀତାରାମନ କହିଥିଲେ। ଘରୋଇ ବଜାର ଲାଗି ଅର୍ଥ ଖର୍ଚ୍ଚର ଆବଶ୍ୟକତା ରହିଥିବା ସେ ସ୍ପଷ୍ଟ କରିଥିଲେ। ହେଲେ ବଜେଟର ଆକାର କିଭଳି ରହିବ ସେ ନେଇ ଅର୍ଥ ମନ୍ତ୍ରଣାଳୟ ପକ୍ଷରୁ କୌଣସି ସ୍ପଷ୍ଟ ସୂଚନା ମିଳିପାରିନାହିଁ। ବଜେଟ ଆସିଲେ ସରକାର ଘରୋଇ ବଜାରରେ ସୁଧାର ଆଣିବା ଲାଗି କିଭଳି ଯୋଜନା ରଖିଛନ୍ତି ସେ ସମ୍ପର୍କରେ ସ୍ପଷ୍ଟ ଚିତ୍ର ଆସିପାରିବ।