ପୁରୀ ଅଫିସ,୧୬।୩: ସ୍ଥାନୀୟ ମାତାମଠସ୍ଥିତ ଶ୍ରୀଚୈତନ୍ୟଙ୍କ ୩୫ ଫୁଟ ମୂର୍ତ୍ତି ଅନାବରଣ କରିଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ। ଶ୍ରୀଗୌରବିହାର ଚାରିଟେବୁଲ୍ ଟ୍ରଷ୍ଟ ପକ୍ଷରୁ ମାତାମଠ ପରିସରରେ ଶ୍ରୀଚୈତନ୍ୟଙ୍କର ମୂର୍ତ୍ତି ନିର୍ମାଣ କରାଯାଇଥିଲା। ଏହି କାର୍ଯ୍ୟକ୍ରମରେ ଯୋଗଦେବା ପାଇଁ ରାଜ୍ୟପାଳ ପୂର୍ବାହ୍ନ ୧୧ଟା ୩୫ରେ ମାତାମଠରେ ପହଞ୍ଚତ୍ଥିଲେ। ପ୍ରତିମୂର୍ତ୍ତି ଅନାବରଣ ଶେଷ କରିବା ପରେ ଭାଗବତ ମଣ୍ଡପଠାରେ ଆୟୋଜିତ ଭାଗବତ କଥାମୃତରେ ସେ ଯୋଗଦେଇଥିଲେ। ଏହି ଅବସରରେ ପ୍ରଦୀପ ପ୍ରଜ୍ୱଳନ, ଫଳକ ଉନ୍ମୋଚନ କରାଯାଇଥିଲା। ରାଜ୍ୟପାଳ ନିଜ ଅଭିଭାଷଣରେ କହିଛନ୍ତି, ଶ୍ରୀଜଗନ୍ନାଥଙ୍କ ମାଟିରେ ଜନ୍ମିତ ସମସ୍ତ ମଣିଷ ଜଣେ ଜଣେ ଈଶ୍ୱର। ଉତ୍କଳୀୟ ସଂସ୍କୃତି ଓ ଓଡ଼ିଆଙ୍କ ମିଠାକଥାର ଶ୍ରେୟ ଶ୍ରୀଚୈତନ୍ୟଙ୍କୁ ଯାଇଥାଏ। ଜଗନ୍ନାଥ ଦାସଙ୍କ ଓଡ଼ିଆ ଭାଗବତକୁ ସମଗ୍ର ଭାରତବର୍ଷରେ ପ୍ରଚାର ପ୍ରସାର କରିଥିବା ଶ୍ରୀଚୈତନ୍ୟ ରାଧାକୃଷ୍ଣ ଅପ୍ରାକୃତ ପ୍ରେମ ଓ ଅଚିନ୍ତ୍ୟ ଭେଦ-ଅଭେଦକୁ ସାର୍ବଜନୀନ କରିବାରେ ତାଙ୍କ ଅବଦାନ ଅତୁଳନୀୟ ହୋଇ ରହିବ। ସେହିଭଳି ସଂସାରରେ ପ୍ରେମର ଭୂମିକାକୁ ଅଦ୍ୱିତୀୟ ବୋଲି ବର୍ଣ୍ଣନା କରିବା ସହ ରୁଷ-ୟୁକ୍ରେନ୍ ଯୁଦ୍ଧକୁ ବିନାଶକାରୀ ବୋଲି କହିଥିଲେ ରାଜ୍ୟପାଳ ଲାଲ। ଆହୁରି ସେ କହିଛନ୍ତି, ଭାରତର ଆଧ୍ୟାତ୍ମିକ ଏକାତ୍ମତା ଆଗାମୀ ସମ୍ଭାବ୍ୟ ବିଶ୍ୱଯୁଦ୍ଧ ବିରୋଧରେ ଦୃଢ଼ ଭାବେ ଠିଆ ହେବ। ବିଶ୍ୱକୁ ଭାରତ ଯେଉଁ ଭାଇଚାରା ଓ ଆତ୍ମୀୟତାର ଶିକ୍ଷା ଦେଇଛି ତାହା ଅନ୍ୟ କେଉଁଠାରେ ହେବା ସମ୍ଭବପର ହୋଇପାରି ନାହିଁ। ଏହି ଅବସରରେ ଭାଗବତ ମଣ୍ଡପରେ ରାଜ୍ୟପାଳଙ୍କ ସମେତ ସୁବଳ ଦାସ ମହାରାଜ ସ୍ବାଗତ ଭାଷଣ ଦେଇଥିବା ବେଳେ ପରମହଂସ ପ୍ରଜ୍ଞାନାନନ୍ଦ ଓ ଡ.ରାମଚରଣ ଦାଶ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ଟ୍ରଷ୍ଟ ପକ୍ଷରୁ ରାଜ୍ୟପାଳଙ୍କୁ ସମ୍ବର୍ଦ୍ଧିତ କରାଯାଇଥିଲା। ସେହିଭଳି କଳା ସ୍ଥାପତ୍ୟ ପାଇଁ ପ୍ରଫୁଲ୍ଲ ବେହେରା ଓ ବସନ୍ତ ବେହେରା, ଧର୍ମର ପ୍ରଚାର ପ୍ରସାର ପାଇଁ ମହନ୍ତ ଶ୍ରୀନିବାସ ଦାଶ, ସଙ୍ଗୀତ ପାଇଁ ବଦ୍ରି ମିଶ୍ର, ନୃତ୍ୟ ପାଇଁ ଲିନା ମହାନ୍ତି, ସମାଜସେବା ପାଇଁ ଦୁର୍ଗାପ୍ରସାଦ ବିଶୋଇ, ହରିହର ଦୋରା ଓ ଦିଲୀପ ପଟ୍ଟନାୟକଙ୍କୁ ରାଜ୍ୟପାଳ ପ୍ରଫେସର ଗଣେଶୀ ଲାଲ ଶ୍ରୀଚୈତନ୍ୟ ସମ୍ମାନ ପ୍ରଦାନ କରିଥିଲେ।