ବ୍ଲୁ ହୋଲ୍ ହେଉଛି ସମୁଦ୍ର ମଝିରେ ବିଭିନ୍ନ ସ୍ଥାନରେ ଥିବା ଏକ ନୀଳ ରଙ୍ଗର ଗର୍ତ୍ତ, ଯାହାକି ଆଜିର ଅତ୍ୟାଧୁନିକ ଯୁଗରେ ଏବେବି ରହସ୍ୟପୂର୍ଣ୍ଣ। ତେବେ ବେଲିଜେ ବ୍ଲୁ ହୋଲ୍ ହେଉଛି ପୃଥିବୀର ସବୁଠୁ ବଡ଼ ସାମୁଦ୍ରିକ ଗର୍ତ୍ତ, ଯାହାକୁ ଦି ଗ୍ରେଟ୍ ବ୍ଲୁ ହୋଲ୍ ବୋଲି ମଧ୍ୟ କୁହାଯାଇଥାଏ। ଜାଣନ୍ତୁ ଏହି ଅଦ୍ଭୁତ ଏବଂ ଆଶ୍ଚର୍ଯ୍ୟଜନକ ସ୍ଥାନ ସମ୍ପର୍କରେ କିଛି ତଥ୍ୟ…
ପୃଥିବୀରେ ଥିବା ସମସ୍ତ ବ୍ଲୁ ହୋଲ୍ ମଧ୍ୟରୁ ବେଲିଜେ ବ୍ଲୁ ହୋଲ୍ ସବୁଠାରୁ ବଡ଼, ଯାହାର ପରିଧି ପ୍ରାୟ ୩୦୦ ମିଟର ହୋଇଥିବା ବେଳେ ଗଭୀରତା ପ୍ରାୟ ୧୦୮ ମିଟର। ଏହା ବେଲିଜେ ସହରଠାରୁ ପ୍ରାୟ ୧୦୦କିମି. ଦୂର ସମୁଦ୍ରଠାରେ ଅବସ୍ଥିତ।
ବିଜ୍ଞାନ ମତରେ ସମୁଦ୍ର ମଝିରେ ଅନେକ ଛୋଟ ବଡ଼ କାର୍ବୋନେଟ୍ ଚଟାଣ ରହିଛି। ଯାହା ଦୀର୍ଘ ବର୍ଷଧରି ପାଣିରେ କଟି ବଡ଼ ଏବଂ ଗଭୀର ଖାଲ ସୃଷ୍ଟି କରିଥାଏ ଏବଂ ଏହା ମଧ୍ୟରେ ସମୁଦ୍ର ପାଣି ପଶିଯିବା କାରଣରୁ ଗଭୀର ନୀଳ ରଙ୍ଗ ଦେଖାଯାଇଥାଏ। ତା’ଛଡା ଏହା ଅଧିକ ଗଭୀର ହୋଇଥିବାରୁ ଏହା ମଧ୍ୟରେ ସୂର୍ଯ୍ୟକିରଣ ପଡ଼ିଲେ ଗାଢ଼ ନୀଳ ରଙ୍ଗ ଦେଖାଯାଏ। ଆଉ ଏଥିପାଇଁ ଏହାକୁ ବ୍ଲୁ ହୋଲ୍ ବୋଲି ନାମ ରଖାଯାଇଛି। ଆହୁରି ମଧ୍ୟ କୁହାଯାଏ ପ୍ରାୟ ୧୦,୦୦୦ ବର୍ଷ ପୂର୍ବେ ଅର୍ଥାତ୍ ଶେଷ ବରଫ ଯୁଗ ବେଳେ ପୃଥିବୀ ପୃଷ୍ଠରେ ଥିବା ବଡ଼ ବଡ଼ ଗୁମ୍ଫା ଉପରେ ପାଣି ମାଡ଼ିଯିବାରୁ ଏସବୁ ସୃଷ୍ଟି ହୋଇଛି।
ମେରାଇନ୍ ବାୟୋଲୋଜିଷ୍ଟ ଜାକ୍ୱେସ୍ କଷ୍ଟେଉ ୧୯୭୧ ମସିହାରେ ଗ୍ରେଟ୍ ବ୍ଲୁ ହୋଲ୍କୁ ଦେଖିବା ପରେ ଏହା ସମ୍ପର୍କରେ ଅନେକ ତଥ୍ୟ ଲୋକଲୋଚନକୁ ଆସିଲା ଏବଂ ଏହା ଅଧିକ ପ୍ରସିଦ୍ଧ ହୋଇଗଲା।
୧୯୮୮ ମସିହାରେ ବ୍ରିଟିଶ୍ ଡାଇଭର(ସମୁଦ୍ର ବୁଡାଳି) ନେଡ୍ ମିଡିଲ୍ଟନ୍ ତାଙ୍କ ପୁସ୍ତକ ‘ଟେନ୍ ଇୟର୍ସ ଅଣ୍ଡରଓ୍ବାଟର’ରେ ବେଲିଜେ ବ୍ଲୁ ହୋଲ୍କୁ ‘ଗ୍ରେଟ୍ ବ୍ଳୁ ହୋଲ୍’ ବୋଲି ଲେଖିଥିଲେ। ସେହିଠାରୁ ଏହି ନାଁ ପ୍ରଚଳିତ ହୋଇଆସୁଛି।
୨୦୧୨ ମସିହାରେ ଡିସ୍କଭରି ଚ୍ୟାନେଲ୍ ପକ୍ଷରୁ ଏହାକୁ ପୃଥିବୀର ସବୁଠୁ ବିସ୍ମୟକର ସ୍ଥାନର ମାନ୍ୟତା ମିଳିଥିଲା।