ବରୀ,୨୧ା୯(ଡି.ଏନ୍.ଏ.): ଗତ ଅଗଷ୍ଟରେ ହୋଇଥିବା ବନ୍ୟାରେ ବରୀ ବ୍ଲକର ବହୁ କଚ୍ଚା ଘର ଭାଙ୍ଗିଯିବା ଫଳରେ ବନ୍ୟା ପ୍ରଭାବିତ ଲୋକମାନେ ବାସହରା ହୋଇ ଉଚ୍ଚ ସ୍ଥାନ ଓ ନଦୀବନ୍ଧ ଉପରେ ଆଶ୍ରୟ ନେଇଥିଲେ। ବନ୍ୟା ଛାଡିବାର ଦୀର୍ଘ ତିନିସପ୍ତାହ ପରେ ବି ବ୍ଲକ ଅଧୀନ ୧୨ଟି ପଞ୍ଚାୟତର ବନ୍ୟା ବିପନ୍ନଙ୍କୁ ପଲିଥିନ୍ ମିଳିନି। ଖୋଲା ଆକାଶ ତଳେ ବନ୍ୟା ବିପନ୍ନ ପଡ଼ିଥିବା ବେଳେ ବଙ୍ଗୋପସାଗରରେ ସୃଷ୍ଟି ହୋଇଥିବା ଆଉ ଏକ ଲଘୁଚାପ ଯୋଗୁ ସୋମବାର ସକାଳଠାରୁ ବର୍ଷା ଆରମ୍ଭ ହୋଇଯାଇଛି, ଯାହା ବିପନ୍ନଙ୍କ ଦୁର୍ଦ୍ଦଶାକୁ ଦ୍ୱିଗୁଣିତ କରିଛି।
କେତେକ ବିପନ୍ନ ପରିବାର ସରକାରୀ ଗୃହ ବାରଣ୍ଡା ଓ ସମ୍ପର୍କୀୟଙ୍କ ଘରେ ଆଶ୍ରୟ ନେଇଥିବା ବେଳେ ଗୃହପାଳିତମାନେ ବର୍ଷାରେ ଭିଜୁଥିବା ଦେଖିବାକୁ ମିଳୁଛି। ବନ୍ୟା ସ୍ଥିତି ସୁଧୁରୁଥିବା ବେଳେ ଭାଙ୍ଗି ଯାଇଥିବା ଘର ସଜାଡ଼ିବାକୁ ବିପନ୍ନ ପରିବାର ଲାଗି ପଡ଼ିଥିଲେ। ହେଲେ ଏହି ଲଘୁଚାପଜନିତ ଲଗାଣ ବର୍ଷା ବିପନ୍ନଙ୍କ ଉପରେ ଦାଉ ସାଧୁଛି ବୋଲି ବହୁ ପରିବାର କହିଛନ୍ତି। ବ୍ଲକ ପ୍ରଶାସନର କେତେଜଣ କର୍ମଚାରୀ କରୋନା ସଂକ୍ରମିତ ହୋଇ ହୋମ୍ ଆଇସୋଲେଶନରେ ଥିବାରୁ ରିଲିଫ୍ କାର୍ଯ୍ୟ ବାଧାପ୍ରାପ୍ତ ହୋଇଛି। ଦିନେ ଦୁଇ ଦିନ ମଧ୍ୟରେ ତାଲିକାଭୁକ୍ତ ବନ୍ୟା ବିପନ୍ନ ସମସ୍ତ ପରିବାରକୁ ପଲିଥିନ ଯୋଗାଇ ଦିଆଯିବ ବୋଲି ବରୀ ତହସିଲଦାର ସରୋଜକାନ୍ତ ନାୟକ ସୂଚନା ଦେଇଛନ୍ତି।