ପିପିଲି,୧୨ା୮(ସ୍ବ.ପ୍ର.): ପିପିଲି ପୌରାଞ୍ଚଳର ୧୪ନଂ. ୱାର୍ଡର ସୁଲତାନ ନଗର ମୁଖ୍ୟ ରାସ୍ତାକୁ ଅତିକ୍ରମ କରିଥିବା ଜଇଶପାଟଣା-ଅମାଳଙ୍ଗ ଡ୍ରେନେଜ ତଥା ଖଲାସି ନାଳର ଡାହାଣପଟ ବନ୍ଧ ଉପରେ ନିର୍ମାଣ ହୋଇଥିବା ଗାର୍ଡଓ୍ବାଲ୍ଟି ଭୁଶୁଡ଼ି ପଡ଼ିଛି। ଡ୍ରେନେଜ ବନ୍ଧକୁ ସୁରକ୍ଷା ପାଇଁ ଗତ ୫ଦିନ ତଳେ ହିଁ ପୌରାଞ୍ଚଳ କାର୍ଯ୍ୟାଳୟ ପକ୍ଷରୁ ୪ଲକ୍ଷ ଟଙ୍କା ବ୍ୟୟରେ ଏହି ଗାର୍ଡୱାଲ ନିର୍ମାଣ କରାଯାଇଥିଲା। ତେବେ ପ୍ରକଳ୍ପ ଅନୁମୋଦନରେ ସେଠାରେ କଂକ୍ରିଟ ରାସ୍ତା ନିର୍ମାଣ କରିବା ପାଇଁ ଥିବାବେଳେ ଉକ୍ତ ଡ୍ରେନ୍ ବନ୍ଧକୁ ସୁରକ୍ଷା ଦେବା ପାଇଁ ତରବରିଆ ଭାବେ ଗାର୍ଡୱାଲ ନିର୍ମାଣ କରାଯାଇଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ସ୍ଥାନୀୟ ବାସିନ୍ଦା ମହମ୍ମଦ ଜଲାଲ ଅଭିଯୋଗ କରିଛନ୍ତି ଯେ, ବର୍ଷାଦିନେ ଏହି କାର୍ଯ୍ୟ ନିମ୍ନମାନର ହୋଇଥିବାରୁ ଗାର୍ଡୱାଲଟି ଭୁଶୁଡି ପଡିଲା। ଭୁଶୁଡି ପଡିଥିବା ଗାର୍ଡୱାଲ୍ର ଲମ୍ବ ୩୦ଫୁଟ ହେବ। ସେଠାରେ ପ୍ରାୟ ୪ଶହ ମିଟର ଗାର୍ଡୱାଲ ନିର୍ମାଣ କରାଯାଇଥିବା ବେଳେ ଅବଶିଷ୍ଟ କେତେ ସୁରକ୍ଷିତ ତାହା ସନ୍ଦେହରେ ରହିଛି। ଉକ୍ତ କାର୍ଯ୍ୟ ଖରାଦିନେ ହେବା କଥା, ଡ୍ରେନର ତଳ ଲେୟାରଠାରୁ ୧ଫୁଟ ଗଭୀରରେ ନିଅଁ ଖୋଳି କାର୍ଯ୍ୟ ଆରମ୍ଭ କରିଥିଲେ ଗାର୍ଡୱାଲଟି ମଜଭୁତ ରୁହନ୍ତା। ଏବେ ବର୍ଷାଦିନ ହୋଇଥିବାରୁ ଚାଷ ଜମି ଗହୀରର ଉଦ୍ବୃତ ଜଳ ଏହି ଡ୍ରେନ୍ ଦେଇ ନିଷ୍କାସନ ହେଉଛି। ବର୍ଷାଦିନେ କାମ ହୋଇଥିବାରୁ ପାଣିର ସ୍ରୋତରେ ଗାର୍ଡୱାଲଟି ଭୁଶୁଡି ପଡିଛି। ତେବେ ନିମ୍ନମାନର କାର୍ଯ୍ୟକୁ ନେଇ ପୌରାଞ୍ଚଳ ଯନ୍ତ୍ରୀ ବିଭୂତି ତ୍ରିପାଠୀଙ୍କ ପାଖରେ ଗ୍ରାମବାସୀ ଅଭିଯୋଗ କରିଥିଲେ ସୁଦ୍ଧା ସେ ଘଟଣାସ୍ଥଳକୁ ଆସି ନାହାନ୍ତି। ଠିକାଦାର ତାଙ୍କର ମନଇଚ୍ଛା କାର୍ଯ୍ୟ କରିବାରୁ ଏଇଭଳି ପରିସ୍ଥିତି ସୃଷ୍ଟି ହେଲା ବୋଲି ଗ୍ରାମବାସୀ କହିଛନ୍ତି। ଏ ସମ୍ପର୍କରେ ପୌରାଞ୍ଚଳ ଯନ୍ତ୍ରୀ ବିଭୂତି ତ୍ରିପାଠୀ କହିଛନ୍ତି, ସେଠାରେ ଗାର୍ଡୱାଲ ନିର୍ମାଣ ପାଇଁ ଅର୍ଥ ବରାଦ ହୋଇ ନ ଥିଲା। କଂକ୍ରିଟ ରାସ୍ତା ନିର୍ମାଣ ଅର୍ଥରୁ କିଛି ଟଙ୍କାରେ ଗାର୍ଡୱାଲ ନିର୍ମାଣ କରାଯାଇଛି । ତାହା ପୁଣି ପଥରରେ କରାଯିବ ବୋଲି କହିଥିଲେ। କିନ୍ତୁ ବାସ୍ତବ କ୍ଷେତ୍ରରେ ଉକ୍ତ ଗାର୍ଡୱାଲ ମେଟାଲ ବାଲି ସିମେଣ୍ଟରେ ନିର୍ମାଣ କରାଯାଇଛି। ତେଣୁ ପ୍ରଶାସନ ପକ୍ଷରୁ ଠିକ୍ ଭାବେ ଏହି କାର୍ଯ୍ୟର ତଦନ୍ତ କରାଯାଉ ବୋଲି ଗ୍ରାସବାସୀ ଅଭିଯୋଗ କରିଛନ୍ତି।
