କେନ୍ଦ୍ରାପଡ଼ା ଅଫିସ, ୪ା୨: ପୋଲିସକୁ ମନ୍ତ୍ରୀମାନେ ଏବେ ଭୟ କଲେଣି। ପୋଲିସ ଗୁଳିରେ ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କ ଜୀବନ ଯିବା ପରେ ଏହାର ପ୍ରଭାବ ଦେଖିବାକୁ ମିଳିଛି କେନ୍ଦ୍ରାପଡ଼ାରେ। ଶିଳ୍ପମନ୍ତ୍ରୀ ପ୍ରତାପ କେଶରୀ ଦେବଙ୍କ ନିରାପତ୍ତା ଦାୟିତ୍ୱରେ ଥିବା ଜିଲା ପୋଲିସ କେତେଜଣ ଅଧିକାରୀଙ୍କ ନିକଟରୁ ଶୁକ୍ରବାର ବନ୍ଧୁକ ହଟାଇ ନିଆଯାଇଥିବା ଦେଖିବାକୁ ମିଳିଛି। ଏପରି କି ଇନ୍ସପେକ୍ଟର ର଼୍ୟାଙ୍କର ଅଧିକାରୀଙ୍କ ପାଖରେ ବନ୍ଧୁକ ନ ରହିବା ଆଲୋଚନାର ବିଷୟ ହୋଇଛି।
ପୂର୍ବାହ୍ନରେ ଶିଳ୍ପମନ୍ତ୍ରୀ କେନ୍ଦ୍ରାପଡ଼ା ଜିଲାରେ ଶିଳ୍ପ କରିଡ଼ର ପ୍ରତିଷ୍ଠା ପାଇଁ ଗସ୍ତ କରିଥିଲେ। ଡେରାବିଶ ବ୍ଲକର ରାଜନଗର, ବଳଭଦ୍ରପୁର ଓ ରଘୁଦେଇପୁରକୁ ଶିଳ୍ପ ସଚିବ ହେମନ୍ତ ଶର୍ମାଙ୍କ ସହ ଜିଲା ପ୍ରଶାସନିକ ଅଧିକାରୀ ଯାଇଥିଲେ। ଏଥିସହ ଜିଲାପାଳଙ୍କ କାର୍ଯ୍ୟାଳୟରେ ଏକ ସମୀକ୍ଷା ବୈଠକ ହୋଇଥିଲା। ଶିଳ୍ପମନ୍ତ୍ରୀଙ୍କ ଗସ୍ତ ପାଇଁ ଜିଲା ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା। ତେବେ ଇନ୍ସପେକ୍ଟର କିମ୍ବା ଅଧସ୍ତନ ପଦାଧିକାରୀଙ୍କ ନିକଟରେ ବନ୍ଧୁକ ଦେଖିବାକୁ ମିଳି ନ ଥିଲା। ଏ ସମ୍ପର୍କରେ ଶିଳ୍ପମନ୍ତ୍ରୀଙ୍କୁ ପଚାରିବାରେ ପୋଲିସ ତାଙ୍କ କାମ କରନ୍ତୁ ବୋଲି କହି ପ୍ରଶ୍ନ ଏଡ଼ାଇ ଯାଇଥିଲେ। ସୁରକ୍ଷା ଦାୟିତ୍ୱରେ ଥିବା ଟାଉନ ଥାନା ଇନ୍ସପେକ୍ଟର ତପନ କୁମାର ନାୟକ ଓ ମହାକାଳପଡ଼ା ଥାନା ଇନ୍ସପେକ୍ଟର ମହେଶ୍ୱର ସେଠୀଙ୍କ ପାଖରେ ବନ୍ଧୁକ ନ ଥିବା ସମ୍ପର୍କରେ ପଚାରିବାରୁ ଉଭୟେ ଏହି ପ୍ରସଙ୍ଗ ଏଡ଼ାଇ ଯାଇଥିଲେ। ଏ ସମ୍ପର୍କରେ ଏସ୍ଡିପିଓ ଜୟନ୍ତ କୁମାର ମହାପାତ୍ର କୁହନ୍ତି, ମନ୍ତ୍ରୀଙ୍କ ନିରାପତ୍ତା ନେଇ କୌଣସି ତ୍ରୁଟି ହୋଇନାହିଁ। ପାଇଲଟ ଗାଡ଼ି ଓ ସୁରକ୍ଷା ଦାୟିତ୍ୱରେ ଥିବା ପୋଲିସ କର୍ମଚାରୀ ରାଇଫଲ ରଖିଥିଲେ।
