ଢେଙ୍କାନାଳ ଅଫିସ, ୧୧।୬ ଢେଙ୍କାନାଳର ଇତିହାସ ଅନନ୍ୟ। ଗଡ଼ଜାତ ଆନ୍ଦୋଳନରେ ଏହି ଜିଲା ଦେଶବାସୀଙ୍କୁ ଆନ୍ଦୋଳିତ କରିଥିଲା। ଏଠାରେ ପର୍ଯ୍ୟଟନର ବିକାଶ ପାଇଁ ବ୍ୟାପକ ଭିତ୍ତିଭୂମି ରହିଛି। ଏଥି ପାଇଁ ମୁଖ୍ୟମନ୍ତ୍ରୀ ୫୦ କୋଟି ଟଙ୍କା ଅନୁଦାନ ପ୍ରଦାନ କରିଛନ୍ତି। ଏହି ଅର୍ଥର ସୁବିନିଯୋଗ ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ କରାଯିବ। ଆଦିବାସୀ ଅଞ୍ଚଳର କଳାସଂସ୍କୃତିକୁ ଲୋକାଭିମୁଖୀ କରିବା ପାଇଁ ଉଦ୍ୟମ କରାଯାଉଛି। ଜିଲାର ଗ୍ରାମାଞ୍ଚଳର ହସ୍ତଶିଳ୍ପ ସମଗ୍ର ଦେଶରେ ପ୍ରସିଦ୍ଧ। ପର୍ଯ୍ୟଟନସ୍ଥଳୀରେ ହସ୍ତଶିଳ୍ପ ପ୍ରଦର୍ଶନ ପାଇଁ ବଜାର ସୃଷ୍ଟି କରାଗଲେ କରିଗରମାନେ ଆର୍ଥିକ ସ୍ବାବଲମ୍ବୀ ହୋଇପାରିବେ। ପର୍ଯ୍ୟଟନସ୍ଥଳୀର ବିକାଶ ହେବ ବୋଲି କହିଛନ୍ତି ଖଣି, ଇସ୍ପାତ ଓ ପୂର୍ତ୍ତମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ। ଢେଙ୍କାନାଳ ସଦର ବ୍ଲକ ସପ୍ତଶଯ୍ୟା ପଞ୍ଚାୟତର ସଦେଇବେରେଣୀସ୍ଥିତ କଳାକୃତି ଗ୍ରାମ ପରିସରରେ ଶୁକ୍ରବାର ସନ୍ଧ୍ୟାରେ ଉଦ୍ଘାଟିତ ‘ପ୍ରଥମ ସପ୍ତଶଯ୍ୟା ହସ୍ତଶିଳ୍ପ ଓ ସାଂସ୍କୃତିକ ମହୋତ୍ସବ-୨୦୨୨’ରେ ମୁଖ୍ୟ ଅତିଥି ଭାବେ ଯୋଗଦେଇ ମନ୍ତ୍ରୀ ଏଭଳି ମତବ୍ୟକ୍ତ କରିଛନ୍ତି।
ରାଜ୍ୟ ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ଓର୍ମାସ, ଜିଲା ପ୍ରଶାସନ ଓ ଜିଲା ସଂସ୍କୃତି ପରିଷଦର ମିଳିତ ସହଯୋଗରେ ଆୟୋଜିତ ଏହି ମହୋତ୍ସବରେ ମୁଖ୍ୟବକ୍ତା ଭାବେ ଯୋଗଦେଇ ଏମ୍ପି ମହେଶ ସାହୁ କହିଲେ, ସଂସ୍କୃତି ଏକ ବ୍ୟାପକ ଶବ୍ଦ, ଯାହାକୁ ବିଶ୍ଳେଷଣ କରିବା କଷ୍ଟକର। ଗ୍ରାମାଞ୍ଚଳରେ ପ୍ରସ୍ତୁତି ସାମଗ୍ରୀ କ୍ରୟ କଲେ ହସ୍ତଶିଳ୍ପର ଚାହିଦା ବଢ଼ିବ ଏବଂ କାରିଗରଙ୍କ ଉନ୍ନତି ହେବ। ଗ୍ରାମୀଣ ଅର୍ଥନୀତିର ବିକାଶ ହେଲେ ଢେଙ୍କାନାଳ ଜିଲା ୧ନଂ. ହେବ ବୋଲି ଏମ୍ପି ମତବ୍ୟକ୍ତ କରିଥିଲେ। ସମ୍ମାନିତ ଅତିଥି ଭାବେ ଏସ୍ପି ଏଲ୍. ଦିବ୍ୟା ଭି., ଡିଏଫ୍ଓ ଡା. ପ୍ରକାଶଚାନ୍ଦ ଗୋଗିନେନି, କାମାକ୍ଷାନଗର ବ୍ଲକ ଅଧ୍ୟକ୍ଷ ପ୍ରେମାନନ୍ଦ ସାହୁ, ସଦର ବ୍ଲକ ଅଧ୍ୟକ୍ଷା ରାଜଶ୍ରୀ ନାୟକ ପ୍ରମୁଖ ଯୋଗଦେଇ ଜିଲାକୁ ପର୍ଯ୍ୟଟନ ହବ୍ରେ ପରିଣତ କରିବାକୁ ଆହ୍ବାନ ଦେଇଥିଲେ।
ଉତ୍ସବରେ ସଭାପତିତ୍ୱ କରି ଜିଲାପାଳ ସରୋଜ କୁମାର ସେଠୀ କହିଲେ, ଢେଙ୍କାନାଳ କଳା ଓ କଳାକାରଙ୍କ ମାଟି। ଜିଲାରେ ୧୯ ହଜାରରୁ ଊର୍ଦ୍ଧ୍ୱ ଏସ୍ଏଚ୍ଜି କାର୍ଯ୍ୟକ୍ଷମ ରହିଛି। ଏଥିରେ କାର୍ଯ୍ୟରତ ୨ଲକ୍ଷ ସଦସ୍ୟ ଜିଲାର ଅର୍ଥନୈତିକ ବିକାଶ ପାଇଁ ଆମର ବଳ। ୫ କୋଟି ଟଙ୍କା ବ୍ୟୟରେ ନିର୍ମିତ ଏହି କଳାକୃତି ଗ୍ରାମ ମୁଖ୍ୟମନ୍ତ୍ରୀଙ୍କ ଦ୍ୱାରା ଉଦ୍ଘାଟିତ ହୋଇଥିଲା। ଏଠାରେ ଥିବା ୨୭ଟି ସ୍ଥାୟୀ ହସ୍ତଶିଳ୍ପ ଗୃହ ମଧ୍ୟରୁ ୧୩ଟିର ବଣ୍ଟନ କରାଯାଇଛି। କଳାକୃତି ଗ୍ରାମ ପରିସରରେ ଖାଲି ପଡ଼ିଥିବା ଜାଗାରେ ୱାଟରପାର୍କ ଏବଂ ସୁଇମିଂପୁଲ ନିର୍ମାଣ କରାଯିବାକୁ ପ୍ରସ୍ତାବ ରହିଛି।
ଏହି ଅବସରରେ ଘୋଡ଼ାନାଚ କଳାକାର ପ୍ରଫୁଲ୍ଲ ଦଳେଇ, ଡୋକ୍ରା ହସ୍ତଶିଳ୍ପ ପ୍ରସ୍ତୁତକାରୀ ମା’ତୁଳସୀ ଏସ୍ଏଚ୍ଜିର ଲିଲି ବେହେରା, ପାଲାଗାୟକ ଦୁର୍ଗାଚରଣ ମହାପାତ୍ର, ହସ୍ତଶିଳ୍ପ କାରିଗର ପ୍ରଦୀପ ନାୟକ, ସଂକୀର୍ତ୍ତନ ଗାୟକ ଦୁର୍ଯ୍ୟୋଧନ ଜେନା, ପାଇକ ଆଖଡା କଳାକାର ପ୍ରକାଶ ଚନ୍ଦ୍ର ସାମଲଙ୍କୁ ସମ୍ବର୍ଦ୍ଧିତ କରାଯାଇଥିଲା। ପିଡି ଡିଆର୍ଡିଏ ସାଫଲ୍ୟ ମଣ୍ଡିତ ପ୍ରଧାନ ସ୍ବାଗତ ଭାଷଣ ଏବଂ ଜିଲା ସଂସ୍କୃତି ଅଧିକାରୀ ପ୍ରିୟମ୍ବଦା ବେହେରା ଧନ୍ୟବାଦ ଅର୍ପଣ କରିଥିଲେ। ଏଥିପୂର୍ବରୁ ପୂର୍ବାହ୍ନ ୮ଟାରେ ସପ୍ତଶଯ୍ୟାସ୍ଥିତ ମା’ ଜେନାଦେଈ ଠାକୁରାଣୀଙ୍କ ପୀଠରୁ ସାଂସ୍କୃତିକ ଦଳକୁ ନେଇ ଏକ ମଶାଲ ଶୋଭାଯାତ୍ରା ବାହାରି କଳାକୃତି ଗ୍ରାମରେ ପହଞ୍ଚତ୍ଥିଲା। ଏଥିରେ ବହୁ ଜନପ୍ରତିନିଧି, ପ୍ରଶାସନିକ ଅଧିକାରୀ ସାମିଲ ହୋଇଥିଲେ।
