ଉମରକୋଟ, ୨୨।୮(ସ୍ବ.ପ୍ର.): ନବରଙ୍ଗପୁର ଜିଲା ଉମରକୋଟ ବ୍ଲକ ବଡ଼ଭରଣ୍ଡି ଗ୍ରାମରେ ଥିବା ଅଲେଖ ମହିମା ମନ୍ଦିର ପରିସର ନିକଟ ରୋଷେଇଘରୁ ସୋମବାର ସକାଳେ ପ୍ରେମୀ ଯୁଗଳଙ୍କ ଝୁଳନ୍ତା ମୃତଦେହ ମିଳିଛି। ମୃତ ଯୁବକ ଜଣଙ୍କ ସ୍ଥାନୀୟ ଅଞ୍ଚଳର ଜଗଦୀଶ କଲାରଙ୍କ ପୁଅ ପ୍ରଫୁଲ୍ଲ (୨୧)। ମୃତ ଯୁବତୀଙ୍କ ଘର ଖାତିଗୁଡ଼ା ଥାନା ଅଞ୍ଚଳରେ ବୋଲି ସୂଚନା ମିଳିଛି। ତେବେ ଘଟଣାସ୍ଥଳରୁ ପୋଲିସକୁ ସୁଇସାଇଡ୍ ନୋଟ୍ ମିଳିଛି।
ସୂଚନାଯୋଗ୍ୟ, ପ୍ରଫୁଲ୍ଲ ଟ୍ରକ୍ ଡ୍ରାଇଭର ଭାବେ କାମ କରୁଥିଲେ। ସେ ବିଭିନ୍ନ ସମୟରେ ଟ୍ରକ୍ ନେଇ ଯୁବତୀଙ୍କ ଗ୍ରାମକୁ ଯାଉଥିଲେ। ଏହା ମଧ୍ୟରେ ଉଭୟଙ୍କ ଭିତରେ ପ୍ରେମ ସମ୍ପର୍କ ଗଢ଼ି ଉଠିଥିଲା। ୨୦ଦିନ ତଳେ ଯୁବତୀ ଜଣଙ୍କ ଘର ଛାଡ଼ି ପ୍ରଫୁଲ୍ଲଙ୍କ ପାଖକୁ ପଳାଇ ଆସିଥିଲେ। ପରେ ଯୁବତୀଙ୍କ ବାପା ବଡ଼ଭରଣ୍ଡି ଆସି ଝିଅକୁ ନେଇ ଗାଁକୁ ଫେରିଥିଲେ। କିନ୍ତୁ ଯୁବତୀ ଜଣଙ୍କ ରବିବାର ପୁଣି ଘର ଛାଡ଼ି ପ୍ରଫୁଲ୍ଲଙ୍କ ପାଖକୁ ଆସିଥିଲେ। ଏହାପରେ ଦୁହେଁ ରାତିରେ ବଡ଼ଭରଣ୍ଡି ଅଲେଖ ମହିମା ମନ୍ଦିର ପରିସରରେ ଥିବା ରୋଷେଇ ଘରେ ଆତ୍ମହତ୍ୟା କରିଛନ୍ତି। ସୋମବାର ସକାଳୁ ଖବରପାଇ ଉମରକୋଟ ଥାନାଧିକାରୀ ଦୀପକ କୁମାର ଜେନା ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଛନ୍ତି। ସେଠାରୁ ପୋଲିସ ଏକ ସୁଇସାଇଡ୍ ନୋଟ୍ ଜବତ କରିଛି। ମୃତକଙ୍କ ପରିବାର ଲୋକେ ସେଠାରେ ପହଞ୍ଚତ୍ବା ପରେ ପୋଲିସ ମୃତଦେହ ଜବତକରି ବ୍ୟବଚ୍ଛେଦ ପାଇଁ ପଠାଇଥିଲା। ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଛି।
