ବଲାଙ୍ଗୀର ଅଫିସ,୬ା୧: ରାଜ୍ୟର ପ୍ରଥମ ଓମିକ୍ରନ ମୃତ୍ୟୁ ମାମଲା ବଲାଙ୍ଗୀର ଜିଲାର ବୋଲି ଜଣାପଡ଼ିବା ପରେ ହଇଚଇ ସୃଷ୍ଟି ହୋଇଛି। ଜିଲା ସ୍ବାସ୍ଥ୍ୟ ବିଭାଗ ଟିମ୍ ଆଗଲପୁର ବ୍ଲକ ଅନ୍ତର୍ଗତ ଡୁଙ୍ଗୁରିପାଲି ଗାଁରେ ପହଞ୍ଚି କଣ୍ଟାକ୍ଟ ଟ୍ରେସିଂ ଆରମ୍ଭ କରିଛନ୍ତି। ଗତ ୨୨ ତାରିଖରେ ଏହି ଗାଁର ଜଣେ ୩୯ ବର୍ଷ ବୟସ୍କା ମହିଳା ଗୁରୁତର ଅସୁସ୍ଥ ହୋଇ ପଡ଼ିବାରୁ ତାଙ୍କୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲକୁ ନିଆଯାଇଥିଲା। ଏହାପରେ ତାଙ୍କୁ ବୁର୍ଲା ଭୀମସାର୍ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ସେଠାରେ ଚିକିତ୍ସିତ ହେଉଥିବା ବେଳେ ସମ୍ପୃକ୍ତ ମହିଳା କୋଭିଡ୍ ପଜିଟିଭ ବୋଲି ଚିହ୍ନଟ ହୋଇଥିଲେ । ଗତ ୨୭ ତାରିଖରେ ସମ୍ପୃକ୍ତ ମହିଳାଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା। ମୃତ୍ୟୁର ୧୦ ଦିନ ପରେ ମହିଳା ଜଣକ ଓମିକ୍ରନ ଆକ୍ରାନ୍ତ ଥିଲେ ବୋଲି ରିପୋର୍ଟ ଆସିବା ପରେ ଅଞ୍ଚଳ ତଥା ଜିଲାରେ ଆତଙ୍କ ଖେଳିଯାଇଛି। ଗତ ୨୭ ତାରିଖରେ ସମ୍ପୃକ୍ତ ମହିଳାଙ୍କ ମୃତ୍ୟୁ ପରେ ହସ୍ପିଟାଲ କର୍ତ୍ତୃପକ୍ଷ କିଭଳି ଭାବେ ମହିଳାଙ୍କ ମୃତଦେହକୁ ପରିବାର ଲୋକଙ୍କୁ ହସ୍ତାନ୍ତର କଲେ ବୋଲି ପ୍ରଶ୍ନ ଉଠିଛି । ମୃତଦେହ ସଂସ୍କାର ବେଳେ ଅନେକ ଲୋକ ଯୋଗ ଦେଇଥିବାରୁ ଏବେ ଲୋକଙ୍କ ମଧ୍ୟରେ ସଂକ୍ରମଣ ଭୟ ଦେଖାଦେଇଛି। ଏଣୁ ଗାଁରେ ଆଜି କଣ୍ଟାକ୍ଟ ଟ୍ରେସିଂ ଆରମ୍ଭ କରାଯାଇଛି।
