ମୋରଡ଼ା,୧୫।୭(ଡି.ଏନ.ଏ.) ମୟୂରଭଞ୍ଜ ଜିଲା ମୋରଡ଼ା ବ୍ଲକର ଉପାନ୍ତ ଅଞ୍ଚଳ ଜୁଆଳିଭଙ୍ଗା ସ୍ବାସ୍ଥ୍ୟ ଓ ଆରୋଗ୍ୟ କେନ୍ଦ୍ରରେ ରୋଗୀସେବା ବିପର୍ଯ୍ୟସ୍ତ ହୋଇ ପଡ଼ିଛି। ଡାକ୍ତର ଓ ଫାର୍ମାସିଷ୍ଟ ନ ଥିବା ଯୋଗୁ ଷ୍ଟାଫନର୍ସଙ୍କ ଭରସାରେ ଚାଲିଛି ଏହି ଉପ ସ୍ବାସ୍ଥ୍ୟକେନ୍ଦ୍ର।
ମୁଖ୍ୟାଳୟ ଚିତ୍ରଡ଼ା ଡାକ୍ତରଖାନାଠାରୁ ୧୩ କି.ମି. ଓ କିଷାନତାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରଠାରୁ ୨୦ କି.ମି. ଦୂରରେ ଥିବାରୁ ଉକ୍ତ ସ୍ବାସ୍ଥ୍ୟ ଉପକେନ୍ଦ୍ର ଉପରେ ଜୁଆଳିଭଙ୍ଗା,ଡାହିସାହି, ଭୈରଙ୍ଗୀଶୋଳ,ପୂର୍ଣ୍ଣଚନ୍ଦ୍ରପୁର,ମାକୁନ୍ଦ ଆଦି ୫ଟି ଗଁାର ପ୍ରାୟ ପାଞ୍ଚ ହଜାରରୁ ଊଦ୍ଧ୍ୱର୍ର୍ବ ଲୋକେ ଚିକିତ୍ସା ପାଇଁ ନିର୍ଭର କରିଥାନ୍ତି। ଉକ୍ତ ସ୍ବାସ୍ଥ୍ୟକେନ୍ଦ୍ର ଦୁଇଜଣ ନର୍ସଙ୍କୁ ନେଇ ଚାଲୁଥିବା ବେଳେ ଦାୟିତ୍ୱରେ ଅଛନ୍ତି ଷ୍ଟାଫ ନର୍ସ ଶୁଭସ୍ମିତା ପ୍ରଧାନ। ପ୍ରତିଦିନ ଆସୁଥିବା ରୋଗୀଙ୍କୁ ଦେଖି ସେ ଔଷଧ ମଧ୍ୟ ଦିଅନ୍ତି। ତେଣୁ ଯଥାଶୀଘ୍ର ଜଣେ ଡାକ୍ତର କିମ୍ବା ଫାର୍ମାସିଷ୍ଟଙ୍କୁ ଏଠାରେ ନିଯୁକ୍ତ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି l
ସେହିପରି ସ୍ବାସ୍ଥ୍ୟକେନ୍ଦ୍ର ଗୃହ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇଥିବା ବେଳେ ପାଣି, ବିଦ୍ୟୁତ୍ ସଂଯୋଗ ହୋଇନାହିଁ। ଫଳରେ ଆସୁଥିବା ରୋଗୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ତେଣୁ ପ୍ରଶାସନ ଏଦିଗରେ ଯଥାଶୀଘ୍ର ଦୃଷ୍ଟି ଦେବାକୁ ଦାବି ଜୋର ଧରିଛି। ଏ ସଂକ୍ରାନ୍ତରେ କିଷାନତାଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ହାମ୍ବିରା ମୁର୍ମୁଙ୍କୁ ପଚାରିବାରୁ ଉକ୍ତ ଷ୍ଟାଫ ନର୍ସମାନଙ୍କୁ କମ୍ୟୁନିଟି ହେଲଥ୍ ଅଫିସର କାର୍ଯ୍ୟର ତାଲିମ ଦିଆଯାଇଛି। ତେଣୁ ପ୍ରାଥମିକ ପର୍ଯ୍ୟାୟରେ ଏମାନେ ଡାକ୍ତର କିମ୍ବା ଫାର୍ମାସିଷ୍ଟଙ୍କ କାର୍ଯ୍ୟ କରିପାରିବେ ଏବଂ ସ୍ବାସ୍ଥ୍ୟକେନ୍ଦ୍ରରେ ଶୀଘ୍ର ବିଦ୍ୟୁତ୍ ଓ ପାଣିର ବ୍ୟବସ୍ଥା କରାଯିବ ବୋଲି କହିଛନ୍ତି।