କଟକ,୪ା୮ (କାର୍ତ୍ତିକ ସାହୁ):ବହୁଚର୍ଚ୍ଚିତ ହନିଟ୍ରାପ ଓ ବେଆଇନ ଅର୍ଥ କାରବାର ମାମଲାର ଅଭିଯୁକ୍ତ ଅର୍ଚ୍ଚନା ନାଗଙ୍କ ସହଯୋଗୀ ଖଗେଶ୍ୱର ପାତ୍ରଙ୍କ ଜାମିନ ଆବେଦନର ରାୟ ସଂରକ୍ଷିତ ରହିଛି। ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମାମଲାରେ ଜାମିନ୍ରେ ମୁକୁଳିବା ପାଇଁ ଖଗେଶ୍ୱରଙ୍କ ଆବେଦନର ହାଇକୋର୍ଟରେ ଗୁରୁବାର ଶୁଣାଣି ଶେଷ ହୋଇଛି। ବିଚାରପତି ଗୌରୀଶଙ୍କର ଶତପଥୀ ମାମଲାର ଶୁଣାଣି କରି ରାୟ ସଂରକ୍ଷିତ ରଖିଛନ୍ତି। ବେଆଇନ ଅର୍ଥ କାରବାର ଅଭିଯୋଗରେ ଇଡି ଦ୍ୱାରା ଗତ ନଭେମ୍ବରରୁ ଖଗେଶ୍ୱର ଗିରଫ ହୋଇ ଜେଲ୍ରେ ଅଛନ୍ତି।
ସୂଚନାଯୋଗ୍ୟ, ଅର୍ଚ୍ଚନା ନାଗ ଓ ତାଙ୍କ ସ୍ବାମୀ ଜଗବନ୍ଧୁଙ୍କର ଜଣେ ବ୍ୟବସାୟିକ ସହଯୋଗୀ ହେଉଛନ୍ତି ଖଗେଶ୍ୱର। ଅର୍ଚ୍ଚନା ଓ ଖଗେଶ୍ୱରଙ୍କ ମଧ୍ୟରେ ୨୦୧୭ରୁ ଥିବା ଅର୍ଥନୈତିକ କାରବାରକୁ ଇଡି ଖୋଳତାଡ଼ କରିଥିଲା। ଖଗେଶ୍ୱରଙ୍କ ନିକଟରୁ ମୋବାଇଲ, କମ୍ପ୍ୟୁଟର, ହାର୍ଡ ଡିସ୍କ, ଗାଡ଼ି ସମେତ ଅନ୍ୟ ସାମଗ୍ରୀ ଜବତ କରିବା ସହ ଇଡି ତାଙ୍କୁ ଗିରଫ କରିଥିଲା। ଜଗବନ୍ଧୁ ଖଗେଶ୍ୱରଙ୍କ ମାଧ୍ୟମରେ ବ୍ୟବହୃତ କାର ବିକ୍ରି କରୁଥିଲେ। ସେ ବହୁ ପରିମାଣର ଅର୍ଥ ବିନିଯୋଗ କରି ଭୁବନେଶ୍ୱର ନିକଟ ହଁସପାଳଠାରେ ଏକ ବ୍ୟବହୃତ କାର୍ ସୋରୁମ ଖୋଲିଥିଲେ। ତେବେ ବେଆଇନ ଅର୍ଥ କାରବାର ମାମଲାରେ ଅର୍ଚ୍ଚନା ଓ ଜଗବନ୍ଧୁଙ୍କୁ ଗିରଫ କରାଯିବା ପରେ ତାଙ୍କର ଦୁଇ ସହଯୋଗୀ ଖଗେଶ୍ୱର ଓ ଶ୍ରଦ୍ଧାଞ୍ଜଳି ବେହେରାଙ୍କ ବିରୋଧରେ ମଧ୍ୟ ମାମଲା ରୁଜୁ ହୋଇଥିଲା।