ପୁରୁଷୋତ୍ତମପୁର, ୨୭।୨(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ୩୫ ଜୋନ୍ ଅଧୀନରେ ଥିବା ୮ଟି ପଞ୍ଚାୟତର ନିର୍ବାଚନ ଫଳାଫଳ ପ୍ରକାଶ ପାଇଛି। ଏଥିରେ ଭୀମପୁର ଓ ପାଣ୍ଡିଆ ପଞ୍ଚାୟତ ସମିତିସଭ୍ୟ ପଦବୀ ଉପରେ ସଭିଙ୍କ ନଜର ରହିଥିଲା। ଯାହାକି ଦୁଇଥର ସରପଞ୍ଚ, ଥରେ ସମିତିସଭ୍ୟ ହେବା ସହ ଥରେ ତାଙ୍କ ସ୍ତ୍ରୀଙ୍କୁ ସମିତିସଭ୍ୟ କରାଇଥିବା ଅପରାଜିତ ହେବିଓ୍ବେଟ୍ ନେତା ପୂର୍ବତନ ବ୍ଲକ ଅଧ୍ୟକ୍ଷ ଲିଙ୍ଗରାଜ ସାହୁଙ୍କୁ ଜଣେ ବିନା ଚପଲ ଓ ହାଫ୍ପ୍ୟାଣ୍ଟ ପିିନ୍ଧା, ରାଜନୀତିରେ ସମ୍ପୂର୍ଣ୍ଣ ଅନଭିଜ୍ଞ ଥିବା ସାଧାରଣ ବ୍ୟକ୍ତି ଜଗନ୍ନାଥ ପାତ୍ର ହରାଇଛନ୍ତି। ଜଗନ୍ନାଥ ୪୩୪ ଭୋଟ ପାଇଁ ବିଜୟୀ ହୋଇଥିବା ବେଳେ ଲିଙ୍ଗରାଜଙ୍କୁ ପରାଜୟର ସ୍ବାଦ ଚାଖିବାକୁ ପଡ଼ିଛି।
ସେହିପରି ପାଣ୍ଡିଆ ପଞ୍ଚାୟତର ସମିତିସଭ୍ୟ ପ୍ରାର୍ଥୀ ଥିବା ପି. ଗୋପାଳଙ୍କ ପରିବାର ଦୀର୍ଘ ବର୍ଷ ଧରି ବିଭିନ୍ନ ପଦବୀରେ ରହିଥିବା ବେଳେ ବର୍ତ୍ତମାନ ପରାଜୟର ସ୍ବାଦ ଚାଖିଛନ୍ତି। ଜିଲା ପରିଷଦ ପ୍ରାର୍ଥୀ ବିଜେଡିର ପିଙ୍କି ନାହାକ ୧୫,୬୭୯ ଭୋଟ ପାଇଥିବା ବେଳେ ଭାଜପାର ଲିଲି କୁମାରୀ ବେହେରା ୭,୯୦୫ ଭୋଟ ପାଇଛନ୍ତି ଓ କଂଗ୍ରେସର ଚାନ୍ଦିନୀ ବେହେରା ୧,୦୧୧ ଭୋଟ ପାଇଛନ୍ତି। ଏଥିରେ ପିଙ୍କି ନାହାକ ୭,୭୭୪ ଭୋଟରେ ବିଜୟୀ ହୋଇଛନ୍ତି।
ଅନ୍ୟପକ୍ଷେ ଅନ୍ତରି ଗ୍ରାମ ପଞ୍ଚାୟତର ସରପଞ୍ଚ ମାମି ପରିଡ଼ା, ସମିତିସଭ୍ୟ ମମତା ବାରିକ, ଭୀମପୁର ପଞ୍ଚାୟତର ସରପଞ୍ଚ ମମାଲି ଦାସ, ସମିତିସଭ୍ୟ ଜଗନ୍ନାଥ ପାତ୍ର, ବଡ଼ଖରିଡ଼ାର ସରପଞ୍ଚ କମା ଦଳେଇ, ସମିତି ସଭ୍ୟ ଅନିଲ କୁମାର ଦାଶ, ପାଣ୍ଡିଆର ସରପଞ୍ଚ ସବିତା ସେଠୀ, ସମିତି ସଭ୍ୟ ସୀମାଞ୍ଚଳ ଗୌଡ଼, ସିହେଚ ନୂଆଗାଁ ପଞ୍ଚାୟତ ସରପଞ୍ଚ ସତ୍ୟଭାମା ସ୍ବାଇଁ, ସମିତିସଭ୍ୟ ଆଭା ପରିଡ଼ା, ଟଙ୍କାଛାଇର ସରପଞ୍ଚ ବିଶ୍ବନାଥ ବେହେରା, ସମିତିସଭ୍ୟ ଡଲି ବେହେରା, ଜାମୁନିର ସରପଞ୍ଚ ଇନ୍ଦ୍ରଜିତ ନାୟକ, ସମିତିସଭ୍ୟ ମମିତା ମଲିକ, ଝାଡ଼ବାଇର ସରପଞ୍ଚ ପ୍ରିୟଙ୍କା ସେଠୀ, ସମିତିସଭ୍ୟ ସୁଲତା ସେଠୀ ନିର୍ବାଚିତ ହୋଇଛନ୍ତି। ଏହାସହ ୱାର୍ଡ ସଭ୍ୟମାନଙ୍କର ମଧ୍ୟ ଫଳାଫଳ ଘୋଷଣା ହୋଇଛି।