କଟକ ଅଫିସ,୧୮।୧୨ : ଅର୍ଥତତ୍ତ୍ୱ ମୁଖ୍ୟ ପ୍ରଦୀପ ସେଠୀଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ ମାମଲା ସହିତ ଅନ୍ୟ ଦୁଇଟି ମାମଲାରେ ହାଇକୋର୍ଟ ସର୍ତ୍ତମୂଳକ ଜାମିନ ମଞ୍ଜୁର କରିଛନ୍ତି । ବିଚାରପତି ସଞ୍ଜୀବ କୁମାର ପାଣିଗ୍ରାହୀଙ୍କୁ ନେଇ ଗଠିତ ଖଣ୍ଡପୀଠ ପ୍ରଦୀପଙ୍କ ତିନୋଟି ପୃଥକ ଜାମିନ ଆବେଦନର ଶୁଣାଣି କରି ଏହି ରାୟ ପ୍ରକାଶ କରିଛନ୍ତି । ସାଢେ ୮ ବର୍ଷରୁ ଅଧିକ ସମୟ ଧରି ପ୍ରଦୀପ ଜେଲରେ ରହିବା ପ୍ରସଙ୍ଗକୁ ବିଚାରକୁ ନେଇ ହାଇକୋର୍ଟ ତାଙ୍କୁ ସର୍ତ୍ତମୂଳକ ଜାମିନ ମଞ୍ଜୁର କରିଛନ୍ତି । ତେବେ ହାଇକୋର୍ଟରୁ ଜାମିନ ମିଳିଥିଲେ ହେଁ ପ୍ରଦୀପ କିନ୍ତୁ ଜେଲ୍ରୁ ମୁକୁଳି ପାରିବେ ନାହିଁ । କାରଣ ତାଙ୍କୁ ଅନ୍ୟ କିଛି ମାମଲାରେ ଏ ପର୍ଯ୍ୟନ୍ତ ଜାମିନ ମିଳିନାହିଁ।
କହିରଖୁଛୁ, ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଅର୍ଥତତ୍ତ୍ୱ କାରବାର ମାମଲାରେ ପ୍ରଦୀପଙ୍କୁ ଜିମାରେ ନେଇ ଜେରା କରିବା ସହିତ ବହୁ ସ୍ଥାବର ଓ ଅସ୍ଥାବର ସଂପତ୍ତି ଜବତ କରିଥିଲା । ସେହିଭଳି ଭାବେ ୨୦୧୩ରେ ବାଲେଶ୍ୱର ସହଦେବଖୁଣ୍ଟା ଥାନାରେ ଓ ଗଞ୍ଜାମ ଛତ୍ରପୁର ଥାନାରେ ଅର୍ଥତତ୍ତ୍ୱ ଠକେଇ ନେଇ ରୁଜୁ ମାମଲାରେ ମଧ୍ୟ ପ୍ରଦୀପ ହାଇକୋର୍ଟରେ ଜାମିନ ଆବେଦନ କରିଥିଲେ ।