ଭୁବନେଶ୍ୱର, ୮ା୩(ବ୍ୟୁରୋ): ମହାମାରୀ ଯୋଗୁ ସ୍କୁଲ ସବୁ ପ୍ରାୟ ଦୁଇ ବର୍ଷରୁ ଅଧିକ ସମୟ ଧରି ବନ୍ଦ ଥିଲା। ଏହି ସମୟରେ ଅଭିଭାବକଙ୍କ ଆର୍ଥିକ ସମସ୍ୟା ଏବଂ ସ୍କୁଲ ବନ୍ଦ ଥିବା କାରଣରୁ ହାଇକୋର୍ଟ ଓ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ୨ଟି ପର୍ଯ୍ୟାୟରେ ସ୍କୁଲ ଫି’ ରିହାତି ଦେବାକୁ ଗଣଶିକ୍ଷା ବିଭାଗ ସବୁ ଘରୋଇ ସ୍କୁଲ ପାଇଁ ୨୦୨୦-୨୧ ଶିକ୍ଷା ବର୍ଷ ପାଇଁ ନିର୍ଦ୍ଦେଶ ଜାରି କରିଥିଲେ। ୨୦୨୧-୨୨ ଶିକ୍ଷା ବର୍ଷରେ କରୋନା ଯୋଗୁ ସ୍କୁଲ ପ୍ରାୟ ବନ୍ଦ ରହିବା ସହ ଅନ୍ଲାଇନରେ ପଢ଼ା ଚାଲିଥିଲା। ଗତ କିଛି ମାସ ହେଲା ବିଭିନ୍ନ ପର୍ଯ୍ୟାୟରେ ସ୍କୁଲ ଖୋଲିଛି। ହେଲେ କେତେକ ଘରୋଇ ସ୍କୁଲ ବନ୍ଦ ସମୟରେ ଫି’ ବୃଦ୍ଧି କରି ଆଦାୟ କରିଛନ୍ତି l ଓଡିଶା ଅଭିଭାବକ ମହାସଂଘ ଏହି ବର୍ଦ୍ଧିତ ଫି’ ଆଦାୟ ଓ ଅଭିଭାବକଙ୍କୁ ପରୀକ୍ଷାରୁ ବଞ୍ଚତ୍ତ ରଖିବାକୁ ବିରୋଧ କରି ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଉଚ୍ଚ ଅଦାଲତ ଏହି ମାମଲାକୁ ଗ୍ରହଣ କରି ବିଭିନ୍ନ ବିଦ୍ୟାଳୟର ଫି’ ଆଦାୟ ସଂକ୍ରାନ୍ତ ରିପୋର୍ଟକୁ ୪ ସପ୍ତାହ ମଧ୍ୟରେ ଦାଖଲ କରିବାକୁ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବଙ୍କୁ ନିର୍ଦେଶ ଦେଇଛନ୍ତି। ଏଥିସହିତ ପିଲାମାନେ ଦେଇଥିବା ଫି’କୁ ଆଧାର କରି ମାମଲାର ରାୟ ପ୍ରକାଶ ପାଇବ ବୋଲି ମୁଖ୍ୟ ବିଚାରପତି ଜଷ୍ଟିସ ଏସ୍. ମୁରଲୀଧର ଓ ଜଷ୍ଟିସ ବି. ପି. ରାଉତରାୟଙ୍କୁ ନେଇ ଗଠିତ ଖଣ୍ଡପୀଠ ଅନ୍ତରୀଣ ଆଦେଶରେ ଦର୍ଶାଇଛନ୍ତି। ଓଡିଶା ଅଭିଭାବକ ମହାସଂଘର ଅଧକ୍ଷ୍ୟ ବାସୁଦେବ ଭଟ୍ଟ ଙ୍କ ଦ୍ୱାରା ଏହି ମାମଲା ଦାୟର କରାଯାଇଥିବା ବେଳେ ଏହାକୁ ଯୁବ ଆଇନଜିୀ ମିସ ଆଦିଶା ମହାନ୍ତି ପରିଚାଳନା କରିଥିଲେ ବୋଲି ଓଡ଼ିଶା ଅଭିଭାବକ ମହାସଂଘ ସହ ଅଧ୍ୟକ୍ଷ ପ୍ରସନ୍ନ ବିଶୋଇ କହିଛନ୍ତି।