କଟକ ଅଫିସ,୧୭ା୭: ଆସନ୍ତା ୧୯ରୁ ୨୩ ତାରିଖ ପର୍ଯ୍ୟନ୍ତ ହାଇକୋର୍ଟ ଭର୍ଚୁଆଲ ମୋଡରେ ଚାଲିବ। ରାଜ୍ୟ ସରକାର ଗୁରୁବାର କୋଭିଡ କଟକଣାକୁ କୋହଳ କରିବାପରେ ହାଇକୋର୍ଟ ଏହି ନିର୍ଦ୍ଦେଶ ଦେଇଛନ୍ତି। ଏହି ସମୟସୀମା ମଧ୍ୟରେ ଥିବା ମାମଲାର ଶୁଣାଣି ପାଇଁ ଆବେଦନକାରୀଙ୍କୁ ହାଇକୋର୍ଟର ରେଜିଷ୍ଟ୍ରାର(ଜୁଡିସିଆଲ) ଚିଠି ମାଧ୍ୟମରେ ଜଣାଇ ଦେଇଛନ୍ତି। ଅନ୍ୟପକ୍ଷରେ ରାଜ୍ୟର ସମସ୍ତ କୋର୍ଟ ଓ ପ୍ରାଧିକରଣ କାର୍ଯ୍ୟ କରିବା ପାଇଁ ହାଇକୋର୍ଟ ପକ୍ଷରୁ ନିର୍ଦ୍ଦେଶାବଳୀ ଜାରି ହୋଇଛି। ଶୁକ୍ରବାର ହାଇକୋର୍ଟ ରେଜିଷ୍ଟ୍ରାର ଡି. କେ. ମିଶ୍ର ରାଜ୍ୟର ସମସ୍ତ ଜିଲା ଓ ଦୌରାଜଜ, ପରିବାର ଅଦାଲତ, ଦ୍ୱିତୀୟ ଏମ୍ଏସିଟିର ସଦସ୍ୟ, ଶିଳ୍ପ ପ୍ରାଧିକରଣ, ସମବାୟ ପ୍ରାଧିକରଣ, ରାଜ୍ୟ ଶିକ୍ଷା ପ୍ରାଧିକରଣ, ବିକ୍ରି କର ପ୍ରାଧିକରଣ, କେନ୍ଦ୍ର ସରକାରଙ୍କ ଶିଳ୍ପ ପ୍ରାଧିକରଣ, ଶ୍ରମ ଅଦାଲତ, ଏଣ୍ଡୋଓମେଣ୍ଟ କମିଶନଙ୍କ କାର୍ଯ୍ୟାଳୟକୁ ଏ ନେଇ ଚିଠି ମାଧ୍ୟମରେ ଜଣାଇଛନ୍ତି। ଏହି ନିର୍ଦ୍ଦେଶାବଳୀ ଅନୁସାରେ, ‘ଏ’ କାଟେଗୋରିଭୁକ୍ତ ୨୦ ଜିଲାରେ କୋର୍ଟ ଓ ପ୍ରାଧିକରଣ ସ୍ବାଭାବିକ ଭାବେ କାର୍ଯ୍ୟ କରିବ। ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଏହି ନିର୍ଦ୍ଦେଶାବଳୀ ବଳବତ୍ତର ରହିବ। ସେହିପରି ‘ବି’ କାଟେଗୋରିଭୁକ୍ତ ୧୦ ଜିଲାରେ ଆସନ୍ତା ୧୯ରୁ ଅଗଷ୍ଟ ୩ ପର୍ଯ୍ୟନ୍ତ ଜିଲା କୋର୍ଟ ଓ ତଳ କୋର୍ଟଗୁଡିକ ଅପରାହ୍ନ ୩ଟା ପର୍ଯ୍ୟନ୍ତ କାର୍ଯ୍ୟ କରିବ। ଶୁଣାଣିଗୁଡିକ ସୁବିଧା ଅନୁସାରେ କୋର୍ଟରେ ବା ଭର୍ଚୁଆଲ ମୋଡରେ କରାଯିବ ବୋଲି ନିର୍ଦ୍ଦେଶାବଳୀରେ କୁହାଯାଇଛି।
