ନୂଆଦିଲ୍ଲୀ,୧୭।୫(ପି.ଟି.): ଭାରତୀୟ ହାଇଜମ୍ପର ତେଜସ୍ବିନ୍ ଶଙ୍କର ଏକ ବିଶ୍ୱସ୍ତରୀୟ ସଫଳତା ଅର୍ଜନ କରିଛନ୍ତି। ସେ ଆମେରିକାର ମାନହଟନଠାରେ ଚାଲିଥିବା ବିଗ୍ ୧୨ ଆଉଟ୍ଡୋର ଟ୍ରାକ୍ ଆଣ୍ଡ ଫିଲ୍ଡ ଚାମ୍ପିୟନଶିପ୍ରେ ସ୍ବର୍ଣ୍ଣ ପଦକ ହାସଲ କରିଛନ୍ତି।
କାନ୍ସାସ ଷ୍ଟେଟ୍ ୟୁନିଭିର୍ସିଟି ତରଫରୁ ପ୍ରତିନିଧିତ୍ୱ କରି ସେ ଶନିବାର ୨.୨୮ ମିଟର ଜମ୍ପମାରି ଏହି ସଫଳତା ପାଇଛନ୍ତି। ଏହି ସେସନରେ ତାଙ୍କର ଏହା ଶ୍ରେଷ୍ଠ ପ୍ରଦର୍ଶନ ସାବ୍ୟସ୍ତ ହୋଇଛି। ତେବେ ମାତ୍ର ଗୋଟିଏ ସେଣ୍ଟିମିଟର ପଛରେ ରହି ସେ ନିଜର ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନର ପଛରେ ରହିଛନ୍ତି। ୨୦୧୮ରେ ସେ ୨.୨୯ ମିଟର ସହିତ ଶ୍ରେଷ୍ଠ ପ୍ରଦର୍ଶନ କରିଥିଲେ। ଏହି ଇଭେଣ୍ଟରେ ୟୁନିଭର୍ସିଟି ଅଫ୍ ଓକ୍ଲାହୋମାର ଭର୍ନନ ଟର୍ନର ୨.୨୫ ମିଟର ଓ ଟେକ୍ସାସ ଟେକ୍ ୟୁନିଭର୍ସିଟିର ଜେକ୍ୱାନ ହୋଗାନ ୨.୧୧ ମିଟର ଜମ୍ପମାରି ଯଥାକ୍ରମେ ରୌପ୍ୟ ଓ ବ୍ରୋଞ୍ଜ ପଦକ ହାସଲ କରିଛନ୍ତି। ଏହି ଇଭେଣ୍ଟରେ ତେଜସ୍ବିନ୍ କ୍ରମାଗତ ଦ୍ୱିତୀୟ ସ୍ବର୍ଣ୍ଣ ପଦକ ହାସଲ କରିଛନ୍ତି। ୨୦୧୯ରେ ମଧ୍ୟ ସେ ଏହି ସଫଳତା ପାଇଥିଲେ। ତେବେ ୨୦୨୦ରେ ୨୨ ବର୍ଷୀୟ ତେଜସ୍ବିନ୍ କୋଭିଡ୍-୧୯ କାରଣରୁ ଇଭେଣ୍ଟରେ ଅଂଶଗ୍ରହଣ କରି ନ ଥିଲେ। ୨୦୧୭ରୁ ସେ ଆମେରିକାରେ ଅବସ୍ଥାନ କରିଆସୁଛନ୍ତି ଓ ଏକ ସ୍କଲାରଶିପ୍ ମାଧ୍ୟମରେ କାନ୍ସାସ ଷ୍ଟେଟ୍ ୟୁନିଭର୍ସିଟିରେ ବିଜ୍ନେସ ଆଡ୍ମିନିଷ୍ଟ୍ରେଶନ ଅଧ୍ୟୟନ କରୁଛନ୍ତି।
