କେନ୍ଦୁଝର,୨୦ା୫ (ସ୍ବ.ପ୍ର.): କେନ୍ଦୁଝର ଜାତୀୟ ରାଜପଥ ୨୦ର ବାଲିଆଗୁଡ଼ା ନିକଟରେ ସର୍ଭିସ ରୋଡ୍ ଡ୍ରେନ୍ ଉପରେ ନିର୍ମାଣ ହୋଇଥିବା ସ୍ଲାବ ଭାଙ୍ଗିଯାଇଛି। ଫଳରେ ରାସ୍ତାରେ ଯାତାୟାତ କରୁଥିବା ଗାଡ଼ି ତଥା ଲୋକଙ୍କ ପାଇଁ ବିପଦ ସୃଷ୍ଟି କରିଛି। ଏଥିସହ ଡ୍ରେନ୍ ଜାମ ହୋଇ ଜଳ ନିଷ୍କାସନରେ ସମସ୍ୟା ସୃଷ୍ଟି କରିଛି। ଅଧିକ ବର୍ଷା ହେଲେ ଜଳ ଉଛୁଳି ରାସ୍ତାରେ ଜମା ହୋଇ ଯାତାୟାତରେ ସମସ୍ୟା ଦେଖାଦେବା ସମ୍ଭାବନା ଦେଖାଦେଇଛି। ନିମ୍ନମାନର କାମ ହୋଇଥିବାରୁ ଭାଙ୍ଗିଯାଉଥିବା ଅଭିଯୋଗ ହେଉଛି।
ସୂଚନାଯୋଗ୍ୟ, ଦୀର୍ଘ ବର୍ଷ ହେଲା ରାସ୍ତା ସମ୍ପୂର୍ଣ୍ଣ ହେବା ପରେ ସର୍ଭିସ ରୋଡ୍ ଏବଂ ଡ୍ରେନ୍ ହୋଇ ନ ଥିଲା। ଲୋକଙ୍କ ବାରମ୍ବାର ଦାବି ପରେ ଜାତୀୟ ରାଜପଥ ପ୍ରାଧିକରଣ ପକ୍ଷରୁ ଟେଣ୍ଡର ହୋଇଥିଲା। କାମ ଶେଷ ହୋଇଥିଲେ ମଧ୍ୟ ଉପଯୁକ୍ତ ତଦାରଖ ଅଭାବରୁ କମ ଦିନରେ ସ୍ଲାବ୍ ଭାଙ୍ଗି ଯାଇ ନଷ୍ଟ ହୋଇଯାଇଛି। ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇ ଏହି କାମ ହୋଇଥିଲା। ଅନ୍ୟପକ୍ଷେ ଜାତୀୟ ରାଜପଥ ୨୦ ର ସଫେଇ ଠିିକ୍ ଭାବରେ ହେଉ ନ ଥିବାରୁ ରାସ୍ତାରେ ବାଲି, ଗୋଡ଼ି, ମାଟି ଜମି ରହୁଛି। ଫଳରେ ଅନେକ ସମୟରେ ଛୋଟବଡ଼ ଦୁର୍ଘଟଣା ଘଟୁଛି। ଏଥିପାଇଁ ବର୍ଷକୁ କୋଟିରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହେଉଥିଲେ ହେଁ ଠିକ୍ ତଦାରଖ ହେଉ ନ ଥିବା ଅଭିଯୋଗ ହୋଇଛି। ଏ ନେଇ ଜାତୀୟ ରାଜପଥ ପ୍ରାଧିକରଣର ସାଇଟ ଇଞ୍ଜିନିୟର ସନ୍ତୋଷ ସାହୁଙ୍କ ସହ ଯୋଗାଯୋଗ କରିବାରୁ ଏହାର ଯାଞ୍ଚ ପାଇଁ ଆସିଷ୍ଟାଣ୍ଡ ହାଇୱେ ଇଞ୍ଜିନିୟରଙ୍କୁ କୁହାଯାଇଛି। ଯାଞ୍ଚ ରିପୋର୍ଟ ଆଧାରରେ ପଦକ୍ଷେପ ନିଆଯିବ ବୋଲି କହିଥିଲେ।