ତାଳଚେର,୨୧।୫(ନି.ପ୍ର)
ତାଳଚେରର ଅଧିଷ୍ଠାତ୍ରୀ ଦେବୀ ମା’ ହିଙ୍ଗୁଳାଙ୍କ ବାର୍ଷିକ ଯାତ୍ରା ଏବଂ ଲୋକ ମହୋତ୍ସବ ମହାଆଡମ୍ବରରେ ପାଳିତ ହୋଇଯାଇଛି। ଚଳିତବର୍ଷର ତ୍ରୁଟିବିଚ୍ୟୁତିକୁ ସଂଶୋଧନ କରି ଆସନ୍ତା ବର୍ଷ ଏହାକୁ ଆହୁରି ଜାକ୍ଜମକର ସହ ପାଳନ କରିବାକୁ ନିଷ୍ପତ୍ତି ହୋଇଛି। ଏ ନେଇ ଗୋପାଳପ୍ରସାଦସ୍ଥିତ ମା’ ହିଙ୍ଗୁଳାଙ୍କ ପୀଠରେ ଶୁକ୍ରବାର ଏକ ସମୀକ୍ଷା ବୈଠକ ତାଳଚେର ଉପଜିଲାପାଳ ବିଶ୍ୱରଞ୍ଜନ ରଥଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଡେପୁଟି କଲେକ୍ଟର ଚିନ୍ମୟୀ ଚେତନା ଦାସଙ୍କ ସମେତ ସମସ୍ତ ଟ୍ରଷ୍ଟ ବୋର୍ଡ ସଦସ୍ୟ ଯୋଗଦେଇ ବିଭିନ୍ନ ବିଷୟରେ ଆଲୋଚନା କରିଥିଲେ।
ମା’ ହିଙ୍ଗୁଳାଙ୍କ ବାର୍ଷିକ ଯାତ୍ରା ଓ ଲୋକ ମହୋତ୍ସବ ଶାନ୍ତିଶୃଙ୍ଖଳାର ସହ ସମାପନ ହୋଇଛି। ଏହାକୁ ନେଇ ଉପଜିଲାପାଳ ସମସ୍ତ ଟ୍ରଷ୍ଟ ସଦସ୍ୟଙ୍କୁ ଧନ୍ୟବାଦ ଦେଇଥିଲେ। ଆଗାମୀ ବର୍ଷରେ ମା’ଙ୍କ ଯାତ୍ରା ଆହୁରି ଆକର୍ଷଣୀୟ କରାଯିବ ବୋଲି ନିଷ୍ପତ୍ତି ହୋଇଛି। ଆଗାମୀ ବର୍ଷ ୯ଦିନ ଯାଏ ପାର୍କିଂ ବ୍ୟବସ୍ଥା କରାଯିବ। ଲୋକ ମହୋତ୍ସବ ମଞ୍ଚ ପଛ ଜାଗାକୁ ପାର୍କିଂ ପାଇଁ ଉପଯୋଗୀ କରାଯିବ। ଯାତ୍ରା ସମୟରେ ମନ୍ଦିର ମୁଖ୍ୟ ଗେଟ୍, ୨ ଓ ୩ନଂ. ଗେଟ୍ ସମ୍ମୁଖରେ କୌଣସି ବ୍ୟବସାୟିକ ଦୋକାନ ବସିପାରିବେ ନାହିଁ। ଯାତ୍ରାର ପ୍ରଚାରପ୍ରସାର ପାଇଁ ଟ୍ରଷ୍ଟ ବୋର୍ଡ ପକ୍ଷରୁ ସ୍ବତନ୍ତ୍ର ମିଡିଆ ସେଲ୍ ଗଠନ କରାଯିବ। ଟ୍ରଷ୍ଟବୋର୍ଡ ପକ୍ଷରୁ ପ୍ରକାଶିତ ବାର୍ଷିକ ସ୍ମରଣିକା ‘ଅଗ୍ନିସ୍ନାତା’ର ସମ୍ପାଦନ ମଣ୍ଡଳୀର ପୁନର୍ଗଠନ କରାଯିବ। ଯାତ୍ରାର ସମସ୍ତ କାର୍ଯ୍ୟକ୍ରମ ଟେଣ୍ଡର ମାଧ୍ୟମରେ କରାଯିବ। ଟ୍ରଷ୍ଟର ପୂର୍ଣ୍ଣାଙ୍ଗ କାର୍ଯ୍ୟ ସମାପନ ନ ହେବା ପର୍ଯ୍ୟନ୍ତ ମା’ ହିଙ୍ଗୁଳାଙ୍କ ଉପରେ ନିର୍ମାଣ ହେବାକୁ ଥିବା ଚଳଚ୍ଚିତ୍ର ‘ଜୟ ମା’ ହିଙ୍ଗୁଳା’ ସ୍ଥଗିତ ରଖାଯିବ ବୋଲି ସର୍ବସମ୍ମତିକ୍ରମେ ନିଷ୍ପତ୍ତି ହୋଇଛି।
କନିଷ୍ଠ ରାଜସ୍ବ ସହାୟକ ଧୂଳେଶ୍ୱର ବେହେରା ଚଳିତବର୍ଷ ଯାତ୍ରାର ଆୟବ୍ୟୟର ବିବରଣୀ ପାଠ କରିଥିଲେ। ଟ୍ରଷ୍ଟ ସଦସ୍ୟ ମୁରଲୀଧର ସାହୁ, ରାଜେନ୍ଦ୍ର ସିଂ, ଅରୁଣ ପ୍ରଧାନ, ସନ୍ତୋଷ ପ୍ରଧାନ, ଗଗନ ବିହାରୀ ସାହୁ, ଜଗଦାନନ୍ଦ ନାଏକ, ସିଦ୍ଧେଶ୍ୱର ପ୍ରଧାନ, ବୃନ୍ଦାବନ ଲେଙ୍କା ପ୍ରମୁଖ ଉପସ୍ଥିତ ଥିଲେ। ଟ୍ରଷ୍ଟ ସଦସ୍ୟ ଗଗନ ବିହାରୀ ସାହୁ ଧନ୍ୟବାଦ ଦେଇଥିଲେ।
