ପୁରୀ ଅଫିସ,୮ା୪: ସମ୍ପ୍ରତି ପ୍ରତ୍ନତତ୍ତ୍ବ ବିଭାଗ ପକ୍ଷରୁ ଶ୍ରୀମନ୍ଦିର ମରାମତି କାର୍ଯ୍ୟ ଚାଲିଛି। ବୁଧବାର ପ୍ରତ୍ନତତ୍ତ୍ବ ବିଭାଗର ଯୁଗ୍ମ ମହାନିର୍ଦ୍ଦେଶକ ଅରୁଣେନ୍ଦ୍ର କୁମାର ଏହି କାର୍ଯ୍ୟ ଅନୁଧ୍ୟାନ କରିଛନ୍ତି। ତାଙ୍କ ସହିତ ରାଜ୍ୟ ପ୍ରତ୍ନତତ୍ତ୍ବ ବିଭାଗର ଅଧୀକ୍ଷକ ଅରୁଣ ମଲ୍ଲିକ୍ ଓ ବିଭାଗୀୟ ଅଧିକାରୀମାନେ ଶ୍ରୀମନ୍ଦିର ଭିତରକୁ ଯାଇ ସ୍ଥିତି ଦେଖିଛନ୍ତି। ୮ଜଣ ଅଧିକାରୀଙ୍କୁ ନେଇ ଗଠିତ ଏଏସ୍ଆଇର ଏକ ଟିମ୍ ଏହି କାର୍ଯ୍ୟ ସମ୍ପର୍କରେ ଅନୁଧ୍ୟାନ କରିଛନ୍ତି। ଶ୍ରୀମନ୍ଦିର ପଶ୍ଚିମଦ୍ୱାର ପଟେ ଥିବା ନୃସିଂହ ମନ୍ଦିରର ହିରଣ୍ୟକଶିପୁ ମୂର୍ତ୍ତି ଗତ ମାର୍ଚ୍ଚ ୨୮ ତାରିଖରେ ଖସିପଡ଼ିଥିଲା। ଏହାକୁ ପୁଣି ମରାମତି କରାଯାଇ ସମ୍ପୃକ୍ତ ସ୍ଥାନରେ ଅବସ୍ଥାପିତ କରାଯିବ। ଏହାଛଡ଼ା ମେଘନାଦ ପଚେରି ମରାମତି, ରୋଷଘର ମରାମତି କାର୍ଯ୍ୟ ଜାରି ରହିଥିବା ମଲ୍ଲିକ କହିଛନ୍ତି। କିଛିଦିନ ତଳେ ପ୍ରତ୍ନତତ୍ତ୍ବ ବିଭାଗ ପକ୍ଷରୁ ମେଘନାଦ ପାଚେରି ସ୍ଥିତିର ସମୀକ୍ଷା କରାଯାଇଥିବା ବେଳେ ଏହାର ମରାମତି ଉପରେ ଗୁରୁତ୍ୱ ଦିଆଯାଇଛି। ସେବାୟତ ବିନାୟକ ଦାସମହାପାତ୍ର କହିଛନ୍ତି, ପଥର ଖସିବା ଭଳି ଘଟଣା ଘଟିବା ପରେ ହିଁ ପ୍ରତ୍ନତତ୍ତ୍ବ ବିଭାଗ ସଜାଗ ହେଉଛି ଓ ମରାମତି କାର୍ଯ୍ୟ କରୁଛି। ସେବାୟତମାନଙ୍କ ସହ ବିଭାଗ ପକ୍ଷରୁ ଶ୍ରୀମନ୍ଦିର ମରାମତି ପ୍ରସଙ୍ଗରେ ଆଲୋଚନା କରାଯାଇନାହିଁ। ଅନ୍ୟପକ୍ଷରେ ଏହି କାର୍ଯ୍ୟ ଅତି ମନ୍ଥର ଗତିରେ ଚାଲୁଛି। ଶ୍ରୀମନ୍ଦିର ବାଇଶି ପାହାଚରେ ଅନେକ ଖାଲଖମା ହେଲାଣି। ମହାଲକ୍ଷ୍ମୀଙ୍କ ମନ୍ଦିରରୁ ପାଣି ଗଳୁଛି। ଏସବୁ କାର୍ଯ୍ୟକୁ ଅଗ୍ରାଧିକାର ଦେଇ ତୁରନ୍ତ ମରାମତି ଶେଷ କରାଯିବାର ଆବଶ୍ୟକତା ରହିଛି। ଛତିଶା ନିଯୋଗ ସହ ଶ୍ରୀମନ୍ଦିର ମୁଖ୍ୟ ପ୍ରଶାସକ ଆଲୋଚନା କରି ପ୍ରତ୍ନତତ୍ତ୍ବ ବିଭାଗକୁ ପ୍ରସ୍ତାବ ଦେଲେ କାର୍ଯ୍ୟ ତୁରନ୍ତ ହୋଇପାରିବ ବୋଲି ଦାସମହାପାତ୍ର ମତବ୍ୟକ୍ତ କରିଛନ୍ତି।
