ଭୁବନେଶ୍ୱର,୧୦ା୧୨(ବ୍ୟୁରୋ): ଚୁକ୍ତିଭିତ୍ତିକ ନିଯୁକ୍ତି ନିମନ୍ତେ ତୁରନ୍ତ ବିଜ୍ଞପ୍ତି ପ୍ରକାଶ, ନିଯୁକ୍ତି ବୟସ ସୀମା ୪୨ବର୍ଷକୁ ବୃଦ୍ଧି, ସ୍କୁଲ ବନ୍ଦ ନିଷ୍ପତ୍ତି ପ୍ରତ୍ୟାହାର ଓ ବେଆଇନ ଭାବେ ଚାଲୁଥିବା ସ୍କୁଲ୍କୁ ବନ୍ଦ ଦାବି କରି ପୁଣି ଆନ୍ଦୋଳନକୁ ଓହ୍ଲାଇଛି ଓଡ଼ିଶା କନିଷ୍ଠ ଶିକ୍ଷକ ଆଶାୟୀ ସଂଘ। ପ୍ରଥମେ ଦୁଇ ଦଫା ଦାବି ନେଇ ଅକ୍ଟୋବର୨୭ରୁ ନଭେମ୍ବର୧୭ ଯାଏ ଭୁବନେଶ୍ୱର ଲୋୟର ପିଏମ୍ଜିରେ ଧାରଣା ଦିଆଯାଇଥିଲା। ହେଲେ ସରକାର ଦାବି ପୂରଣ ନେଇ କିଛି ପଦକ୍ଷେପ କିମ୍ବା ଆଲୋଚନା ନ କରିବାରୁ ସଂଘ ନଭେମ୍ବର ୩୦ରୁ ପୁଣି ଧାରଣା ଦେବା ସହ ବିକ୍ଷୋଭ ପ୍ରଦର୍ଶନ କରୁଛି। ଏହି ଧାରଣା ଗୁରୁବାର ୧୦ଦିନରେ ପହଞ୍ଚତ୍ଥିବାବେଳେ ପୂର୍ବଭଳି ଧାରଣାସ୍ଥଳରେ ମାଣବସାଇ ଅଭିନବ ପ୍ରତିବାଦ କରିଛନ୍ତି।
ସଂଘ ସଭାପତି ଜୀବନ ବନ୍ଧୁ ଭୋଇ ଓ ସାଧାରଣ ସମ୍ପାଦକ ସୁବ୍ରତ କୁମାର ପଣ୍ଡା କହିଛନ୍ତି, ରାଜ୍ୟ ସରକାର ଓଡ଼ିଶାରେ ୨୨୯୦୦୬ ପ୍ରାଥମିକ ଶିକ୍ଷକ ପଦବୀ ଅନୁମୋଦିତ କରିଥିବା କେନ୍ଦ୍ର ସରକାରଙ୍କୁ ଜଣାଇଛନ୍ତି। ଆର୍ଟିଆଇ ତଥ୍ୟ ଅନୁଯାୟୀ, ଅନୁମୋଦିତ ଶିକ୍ଷକ ପଦବୀରୁ ଓଡ଼ିଶାରେ ୨୦୧୯-୨୦ ଶିକ୍ଷା ବର୍ଷ ସୁଦ୍ଧା ୧୯୩୧୭୧ଜଣ ପ୍ରାଥମିକ ଶିକ୍ଷକ କାର୍ଯରତ ଅଛନ୍ତି ଓ ବର୍ତ୍ତମାନ ୩୫୮୩୫ ପଦବୀ ଖାଲି ରହିଛି। ତେବେ ରାଜ୍ୟରେ ଏତେ ସଂଖ୍ୟକ ପ୍ରାଥମିକ ସ୍କୁଲ୍ରେ ଶିକ୍ଷକ ପଦବୀ ଖାଲି ରହିଥିଲେ ମଧ୍ୟ ନିଯୁକ୍ତି ନେଇ ବିଜ୍ଞପ୍ତି ପ୍ରକାଶ ପାଉନି। ସେହିପରି ରାଜ୍ୟ ସରକାର କେତେବେଳେ ପଦ ଖାଲି ନାହିଁ, ତ ପୁଣି ଆଉ କେତେବେଳେ ଶିକ୍ଷକ ଛାତ୍ର ଅନୁପାତ ୧:୨୨ ବୋଲି କହୁଛନ୍ତି। ଶିକ୍ଷକ ଓ ଛାତ୍ରର ଅନୁପାତକୁ ନେଇ ସରକାର ଗୋଟେ କଥା କହୁଥିବାବେଳେ ସରକାରଙ୍କ ଆର୍ଟିଆଇ ତଥ୍ୟ ଭିନ୍ନ କଥା କହୁଛି। ୨୦୧୦-୧୧ ଶିକ୍ଷାବର୍ଷ ପରଠାରୁ ଏହି ଅନୁପାତ ୩୦ରୁ ତଳକୁ ଖସିଥିଲେ ମଧ୍ୟ ସରକାର ଉକ୍ତ ବର୍ଷ ୨୪ହଜାର, ୨୦୧୧-୧୨ବର୍ଷ ୧୭୫୪୩, ୨୦୧୩-୧୪ବର୍ଷ ୧୪୧୮୧, ୨୦୧୪-୧୫ବର୍ଷ ୧୬୬୦୧ ଓ ୨୦୧୬-୧୭ବର୍ଷରେ ୧୪୦୮୭ କନିଷ୍ଠ ପଦବୀ ପୂରଣ ପାଇଁ ବିଜ୍ଞପ୍ତି ପ୍ରକାଶ କରିଥିଲେ। ଏହାପରଠାରୁ ନିଯୁକ୍ତି ବିଜ୍ଞପ୍ତି ପ୍ରକାଶ ହୋଇନାହିଁ। ତେଣୁ ସରକାର ଦାବି ମୁତାବକ ଶୀଘ୍ର ଚୁକ୍ତିଭିତ୍ତିକ ନିଯୁକ୍ତି ଦେଇ ପଦବୀ ପୂରଣ ସହ ପ୍ରାର୍ଥୀଙ୍କ ବୟସ ସୀମା ବୃଦ୍ଧି ଓ ଅନ୍ୟାନ୍ୟ ଦାବି ପୂରଣ କରନ୍ତୁ।