ଯାଜପୁର ଅଫିସ,୧୬ା୧: ଯାଜପୁର ଜିଲାର କଳିଙ୍ଗନଗର ଶିଳ୍ପାଞ୍ଚଳକୁ ଲାଗି ରହିଥିବା ବ୍ୟାସନଗର ପୌର ପରିଷଦ ଅଧ୍ୟକ୍ଷ ପଦବୀ ଅନୁସୂଚିତ ଜନଜାତି (ଏସ୍ଟି) ତଥା ଆଦିବାସୀ ମହିଳାଙ୍କ ନିମନ୍ତେ ସଂରକ୍ଷଣ ହୋଇଥିବା ନେଇ ଚିଠା ବିଜ୍ଞପ୍ତି ପ୍ରକାଶ ପାଇଛି। ଏହା ଜଣାପଡ଼ିବା ପରେ ୨୬ ୱାର୍ଡ ବିଶିଷ୍ଟ ଏହି ପୌର ପରିଷଦରେ ବିଭିନ୍ନ ଦଳରେ ଥିବା ପୁରୁଣା, ନୂଆ ନେତାଙ୍କ ଆଶା ମଉଳି ଯାଇଛି। ଏଠାରେ ସ୍ଥାୟୀ ଆଦିବାସୀ ନଗଣ୍ୟ ରହିଥିବାରୁ ଜିଲାର ଅନ୍ୟ ବ୍ଲକରୁ ଅଧ୍ୟକ୍ଷା ପ୍ରାର୍ଥିନୀ ଆମଦାନୀ କରାଯିବ କି ବୋଲି ସୋସିଆଲ ମିଡିଆରେ ପ୍ରକାଶ ପାଉଛି। ଏପରି କି ବିକାଶମୂଳକ କାର୍ଯ୍ୟ ଠପ୍ ହୋଇପଡ଼ିଥିବା ଏହି ପୌର ପରିଷଦର ବହୁ ତୁଙ୍ଗ ନେତାଙ୍କୁ ବାଦ୍ ଦେବାକୁ ଏକପ୍ରକାର ଗୋଟିଚାଳନା ବୋଲି ମଧ୍ୟ ଚର୍ଚ୍ଚା ଜୋର୍ ଧରିଛି।
ବ୍ୟାସନଗର ସହରର ଇତିହାସ ୫୭ ବର୍ଷ ପୁରୁଣା। ଡୋଲିପୁର ନାମରେ ପରିଚିତ ଯାଜପୁରରୋଡ ସହରକୁ ରାଜ୍ୟ ସରକାର ୧୯୬୧ରେ ବିଜ୍ଞାପିତ ଅଞ୍ଚଳ (ଏନ୍ଏସି) ଭାବେ ଘୋଷଣା କରିଥିଲେ। ସେହି ସମୟରେ ୧୧ଟି ୱାର୍ଡ ଥିଲା। ୧୯୬୩ରେ ଓ୍ବାର୍ଡ ସଂଖ୍ୟା ୧୫ ଏବଂ ୧୯୮୨ରେ ୨୨କୁ ବୃଦ୍ଧି ପାଇଥିଲା। ୧୯ା୫ା୧୯୯୪ରେ ଯାଜପୁରରୋଡ ଏନ୍ଏସିକୁ ବ୍ୟାସନଗର ପୌର ପରିଷଦ ଭାବେ ସ୍ବୀକୃତି ମିଳିଥିଲା। ୨୦୦୮ରେ ୨୨ରୁ ୨୬ଟି ୱାର୍ଡରେ ଏହା ପରିଣତ ହୋଇଛି। ବିଗତ ଦିନରେ ହୃଷୀକେଶ ରାଉତ, ରସାନନ୍ଦ ମହାନ୍ତି, ସରୋଜିନୀ ବଳ, ବନ୍ଦିତା ପରିଡ଼ା ଓ ସବିତା ରାଉତ ଅଧ୍ୟକ୍ଷା/ଅଧ୍ୟକ୍ଷ ଭାବେ ନିର୍ବାଚିତ ହୋଇଛନ୍ତି। ଗତ ୩ଟି ନିର୍ବାଚନରେ ଅଧ୍ୟକ୍ଷ ପଦବୀ ସାଧାରଣବର୍ଗ ମହିଳାଙ୍କ ପାଇଁ ସଂରକ୍ଷିତ ହୋଇଥିଲା। ୨୦୧୮ ଡିସେମ୍ବରରେ ଅଧ୍ୟକ୍ଷା ରାଉତଙ୍କ କାର୍ଯ୍ୟକାଳ ଶେଷ ହୋଇଥିଲା। କିନ୍ତୁ ୫ ବର୍ଷରୁ ଶେଷ ୨ ବର୍ଷ ମଧ୍ୟରେ ବ୍ୟାସନଗର ପୌରାଧ୍ୟକ୍ଷା ରାଉତଙ୍କ ବିରୋଧରେ ୩ଥର ଅନାସ୍ଥା ପ୍ରସ୍ତାବ ଆସିଥିଲା। କ୍ଷମତା ଲୋଭ ଯୋଗୁ ରାଜନୈତିକ ବିବାଦ ବ୍ୟାସନଗର ପୌରପରିଷଦକୁ ରସାତଳଗାମୀ କରିଥିଲା। ନବେ ଦଶକରେ ଏହି ପୌରପରିଷଦ ଅଞ୍ଚଳକୁ ଲାଗି ବିଭିନ୍ନ ଶିଳ୍ପ କାରଖାନା ପ୍ରତିଷ୍ଠା ହେବା ପରେ ଏହାର ନବକଳେବର ବୃଦ୍ଧି ପାଇବାରେ ଲାଗିଛି। ଜନସଂଖ୍ୟା ହୁ ହୁ ହୋଇ ବୃଦ୍ଧି ପାଇ ବେସରକାରୀ ଭାବେ ପ୍ରାୟ ଦେଢ ଲକ୍ଷ ଟପିଲାଣି। କିନ୍ତୁ ସହରର ରାସ୍ତାଘାଟ ସମେତ ଦର୍ଶନୀୟ ସ୍ଥାନ, ପାର୍କର ବିକାଶ ହେଉନାହିଁ। ଏହା ନିର୍ବାଚନ ସମୟରେ ବିଜେଡି ପାଇଁ ସମସ୍ୟା ସୃଷ୍ଟି କରିପାରେ ବୋଲି କେତେଜଣ ରାଜନୈତିକ ସମୀକ୍ଷକ କହୁଛନ୍ତି। କିନ୍ତୁ ବିରୋଧୀ ଦଳ ଏଠାରେ ସେତେଟା ସକ୍ରିୟ ନ ଥିବାରୁ ବିଜେଡି ତିଷ୍ଠି ରହିବ ବୋଲି ଆଉ କେତେଜଣ ମତ ଦେଉଛନ୍ତି।
ପୂର୍ବତନ ପୌରାଧ୍ୟକ୍ଷ ରସାନନ୍ଦ ମହାନ୍ତି କୁହନ୍ତି, ଆପତ୍ତି ଅଭିଯୋଗ ପାଇଁ ୧୫ ଦିନ ସମୟ ରହିଛି। ତେଣୁ ସ୍ଥାନୀୟ ଲୋକଙ୍କ ଦାବି ଅନୁସାରେ ସଂରକ୍ଷଣ ପରିବର୍ତ୍ତନ ହୋଇପାରେ। ପୂର୍ବତନ ଅଧ୍ୟକ୍ଷା ସବିତା ରାଉତ କହିଛନ୍ତି, ଏଠାରେ ବହୁତ କମ୍ ସ୍ଥାୟୀ ଆଦିବାସୀ ରହିଛନ୍ତି। ତେଣୁ ଆଗାମୀ ଦିନରେ ସଂରକ୍ଷଣ ବ୍ୟବସ୍ଥାରେ ପରିବର୍ତ୍ତନ କରିବାକୁ ଦାବି କରାଯିବ। ଭାଜପା ନେତା ଚନ୍ଦ୍ର ଶେଖର ପଣ୍ଡା କୁହନ୍ତି, ବ୍ୟାସନଗର ସହରର ବିକାଶ ପାଇଁ କାହାରି ଦରଦ ନାହିଁ। ଏହି ସହରକୁ ଆହୁରି ଅନୁନ୍ନତ କରିବାକୁ ଏହା ଏକ ଚାଲ୍। ଆଦିବାସୀ ଜନଜାତି ଏଠାରେ ନଗଣ୍ୟ। ତେଣୁ ଯେକେହି ବି ଅଧ୍ୟକ୍ଷା ଭାବେ ନିର୍ବାଚିତ ହେଲେ ସେ ଅନ୍ୟ ପ୍ରଭାବଶାଳୀ ଲୋକଙ୍କ ବୋଲକରା ହୋଇ ରହିବ। ତେଣୁ ଏହି ଚିଠା ଉପରେ ନିହାତି ପରିବର୍ତ୍ତନର ଆବଶ୍ୟକ।