ପୁରୁଣା ଭୁବନେଶ୍ୱର,୧୮ା୧୦(ଡି.ଏନ୍.ଏ.): କୋଭିଡ୍-୧୯ ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ କେତେଜଣ ଅଧିକାରୀ ଓ କର୍ମଚାରୀଙ୍କ ଖାମଖିଆଲି ଯୋଗୁ ହସ୍ପିଟାଲରେ ଅନେକ ସମୟରେ ବ୍ୟତିକ୍ରମ ହେଉଥିବା ଦେଖିବାକୁ ମିଳୁଛି। ଭୁବନେଶ୍ୱର ବିଏମ୍ସି ହସ୍ପିଟାଲର ଗୋଟିଏ କାଉଣ୍ଟରରେ ସାଧାରଣ ରୋଗୀ ଏବଂ ଆଣ୍ଟିଜେନ ଟେଷ୍ଟ କରିବାକୁ ଆସୁଥିବା ଲୋକେ ନାମ ପଞ୍ଜୀକୃତ କରୁଛନ୍ତି। ସାମାଜିକ ଦୂରତ୍ୱ ରହୁ ନ ଥିବାରୁ ସାଧାରଣ ରୋଗୀ କରୋନାରେ ଆକ୍ରାନ୍ତ ହେବାର ଆଶଙ୍କା ରହିଛି। ଏହା ସହିତ ହସ୍ପିଟାଲକୁ ଆସୁଥିବା କେତେଜଣ ରୋଗୀଙ୍କ ସମ୍ପର୍କୀୟ ମୁହଁରେ ମାସ୍କ ପିନ୍ଧି ନ ଥିବା ଦେଖିବାକୁ ମିଳୁଛି। ଏହା ସହିତ ସେମାନଙ୍କର ଥର୍ମାଲ ସ୍କ୍ରିନିଂ କରାଯାଉ ନାହିଁ। ଆବଶ୍ୟକ ମୁତାବକ ହସ୍ପିଟାଲ ସାନିଟାଇଜ୍ ହେଉନାହିଁ। କୋଭିଡ୍ ଆଳରେ ଅନେକ ସାଧାରଣ ରୋଗୀଙ୍କୁ ବିନା ଚିକିତ୍ସାରେ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଉଛି। ଯାହାକୁ ନେଇ ରୋଗୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏନେଇ ହସ୍ପିଟାଲର ମୁଖ୍ୟ ଚିକିତ୍ସାଧିକାରୀ ଜିତେନ୍ଦ୍ର ବେବର୍ତ୍ତା କହିଛନ୍ତି, ଏଠାରେ ଆଣ୍ଟିଜେନ ଟେଷ୍ଟ ହେବାଠାରୁ ଥର୍ମାଲ ସ୍କ୍ରିନିଂ ବନ୍ଦ ହୋଇଛି। ସାଧାରଣ ରୋଗୀ ଓ ଆଣ୍ଟିଜେନ ଟେଷ୍ଟ ପାଇଁ ଆସୁଥିବା ଲୋକଙ୍କ ଲାଗି ଆଉଟଡୋର ନିକଟରେ ପୃଥକ୍ ଭାବେ ପଞ୍ଜୀକରଣ ବ୍ୟବସ୍ଥା ହୋଇଥିଲା। ହେଲେ ବର୍ଷା ଯୋଗୁ ଏବେ ଦ୍ୱିତୀୟ ମହଲାରେ କରାଯାଉଛି ବୋଲି ସେ କହଛନ୍ତି।