ସାରସକଣା, ୫ା୧(ଡି.ଏନ.ଏ.): ମୟୂରଭଞ୍ଜ ଜିଲା ଶୀର୍ଷାସ୍ଥିତ ସାରସକଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର କର୍ମଚାରୀମାନେ ରୋଗୀ ସେବା ଛାଡ଼ି ଭୋଜିଭାତରେ ମାତିବା ଓ ଉପଯୁକ୍ତ ଚିକିତ୍ସା ନ ପାଇ ରୋଗୀ ଛଟପଟ ହେବା ଘଟଣା ଚର୍ଚ୍ଚାର ବିଷୟ ହୋଇଛି। ଏହି ଘଟଣାର ତଦନ୍ତ ହେବ ବୋଲି ଜିଲା ମୁଖ୍ୟ ଚିକିତ୍ସା ଅଧିକାରୀ ଡା.ରୂପଭାନୁ ମିଶ୍ର କହିଛନ୍ତି।
ସ୍ବାସ୍ଥ୍ୟକେନ୍ଦ୍ରର ଦୁଇଜଣ ନର୍ସଙ୍କୁ ଛାଡ଼ି ଡାକ୍ତରଙ୍କ ସମେତ ଅନ୍ୟ ସମସ୍ତ କର୍ମଚାରୀ ବୁଧବାର ମେରୁମଠ ଅଞ୍ଚଳକୁ ଭୋଜି କରିବାକୁ ଯାଇଥିଲେ। ଏହି ସମୟରେ ସ୍ଥାନୀୟ ଅଞ୍ଚଳର ବିନୁମଣି ମୁଣ୍ଡା ନାମକ ଜଣେ ମହିଳା ଖଟରୁ ପଡ଼ି ଆହତ ଅବସ୍ଥାରେ ଡାକ୍ତରଖାନା ଆସିଥିଲେ। ଡାକ୍ତର ନ ଥିବାରୁ ଡ୍ୟୁଟିରେ ଥିବା ନର୍ସ ତାଙ୍କୁ ଇଞ୍ଜେକ୍ସନ ଦେବା ସହ କ୍ଷତ ସ୍ଥାନ ସିଲେଇ କରିଥିଲେ। ରୋଗୀଙ୍କ ବାପା ଈଶ୍ୱର ନାୟକ ଡାକ୍ତର କୁଆଡ଼େ ଯାଇଛନ୍ତି ବୋଲି ପଚାରିବାରୁ ମିଟିଂ ଯାଇଛନ୍ତି ବୋଲି ନର୍ସ ଦ୍ୱୟ କହିଥିଲେ। ପରେ ଏହି ଘଟଣା ପ୍ରଚାରିତ ହେବାରୁ ଅସନ୍ତୋଷ ପ୍ରକାଶ ପାଇଥିଲା। ଗଣମାଧ୍ୟମ ପ୍ରତିନିଧିମାନେ ପହଞ୍ଚତ୍ ଜିଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ଫୋନ ଯୋଗେ ଜଣାଇଥିଲେ। ଅପରାହ୍ନ ୪.୧୫ରେ ଡାକ୍ତରଖାନା କର୍ମଚାରୀ ଭୋଜି ସାରି ଫେରିବା ସହ ଡାକ୍ତର ରୋଗୀଙ୍କ ଚିକିତ୍ସା କରିଥିବା ଦେଖିବାକୁ ମିଳିଥିଲା।
ସଂକ୍ରାନ୍ତରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରିଣୀ ଆସ୍ଥା ମହାନ୍ତଙ୍କୁ ପଚାରିବାରୁ ଫିଲ୍ଡକୁ ଯାଇଥିଲି। ପାକଟିଆରୁ ସାରସକଣା ହୋଇ ଫେରୁଛି ଏବଂ ଫିଲ୍ଡ ଷ୍ଟାଫମାନେ ପିକ୍ନିକ୍ ଯାଇଥିଲେ ବୋଲି ପ୍ରକାଶ କରିଥିଲେ। ତେବେ ଡାକ୍ତରଖାନା କର୍ମଚାରୀମାନେ ରୋଗୀସେବା ଛାଡ଼ି ସରକାରୀ ଗାଡ଼ିରେ ଭୋଜି ଖାଇବାକୁ ଯିବା ଘଟଣାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଛି।