ନୂଆଦିଲ୍ଲୀ: ଦେଶରେ କରୋନା ମହାମାରୀର ୨ୟ ଲହର ଦ୍ରୁତଗତିରେ ବ୍ୟାପିବା ସହ ଶହଶହ ଲୋକ ଏହାଦ୍ୱାରା ସଂକ୍ରମିତ ହୋଇ ବିଭିନ୍ନ ଚିକିତ୍ସାଳୟରେ ଭର୍ତ୍ତି ହେଉଛନ୍ତି। ଏହି ସମୟରେ କେନ୍ଦ୍ର ସରକାରଙ୍କ ନଗଦ କାରବାର କଟକଣା ରୋଗୀର ଚିକିତ୍ସା କ୍ଷେତ୍ରରେ ବାଧକ ସାଜିଛି। ଏଭଳି କିଛି ସମସ୍ୟା ସରକାରଙ୍କ ନଜରକୁ ଆସିବା ପରେ ସରକାର କୋଭିଡ୍-୧୯ ଚିକିତ୍ସା ବାବଦକୁ ୨ ଲକ୍ଷରୁ ଊର୍ଦ୍ଧ୍ୱ ନଗଦ ଟଙ୍କାକୁ ଚିକିତ୍ସାଳୟଗୁଡ଼ିକ ଗ୍ରହଣ କରିପାରିବେ ବୋଲି ସୂଚନା ଦିଆଯାଇଛି। ଏ ସମ୍ପର୍କରେ ଶୁକ୍ରବାର ଆୟକର ବିଭାଗ ପକ୍ଷରୁ ଏକ ବିଜ୍ଞପ୍ତି ଜାରି ସହ ନଗଦ ଅର୍ଥ କାରବାର ଓ ଗ୍ରହଣକୁ ଅନୁମତି ପ୍ରଦାନ କରାଯାଇଛି। ଏହି ନୂତନ ନିୟମାବଳୀ ଭାରତରେ ଥିବା ସମସ୍ତ ଡାକ୍ତରଖାନା ଓ ନର୍ସିଂହୋମଗୁଡ଼ିକ ପାଇଁ ପ୍ରଯୁଜ୍ୟ ବୋଲି ଜଣାପଡ଼ିଛି। ଏପ୍ରିଲ ୧ରୁ ମେ ୩୧ ପର୍ଯ୍ୟନ୍ତ ସେମାନେ ଏଭଳି ପ୍ରାପ୍ୟ ଅର୍ଥ ଗ୍ରହଣ କରିପାରିବେ ବୋଲି ସୂଚନା ମିଳିଛି। ଏହି ନୂତନ ନିୟମାବଳୀ ଅନୁସାରେ ଆୟକର ବିଭାଗ କହିଛି, ଏଥିପାଇଁ ସମ୍ପୃକ୍ତ ଡାକ୍ତରଖାନା ବା କୋଭିଡ୍ କେୟାର ସେଣ୍ଟରଗୁଡିକ ରୋଗୀ ଓ ଅର୍ଥ ଦେଉଥିବା ବ୍ୟକ୍ତିଙ୍କର ପାନ୍ କିମ୍ବା ଆଧାର ନମ୍ବର ରଖି ଏହାର ବ୍ୟବହାର କରିପାରିବେ। ଏହାଛଡ଼ା ରୋଗୀ ଓ ଅର୍ଥ ପ୍ରଦାନ କରୁଥିବା ବ୍ୟକ୍ତିଙ୍କ ମଧ୍ୟରେ ଥିବା ସମ୍ପର୍କ ବିଷୟରେ ସମ୍ପୃକ୍ତ ଚିକିତ୍ସାଳୟ ସବିଶେଷ ଭାବେ ଅବଗତ ହେବା ଜରୁରୀ ବୋଲି କୁହାଯାଇଛି।
ଏ ସମ୍ପର୍କରେ ବିଭାଗ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତିରେ ଉଲ୍ଲେଖ କରାଯାଇଛି, ରୋଗୀମାନଙ୍କୁ କରୋନା ଚିକିତ୍ସା ଯୋଗାଉ ଦେଉଥିବା ହସ୍ପିଟାଲ, ଡିସ୍ପେନ୍ସରି, ନର୍ସିଂହୋମ୍, କୋଭିଡ୍ କେୟାର ସେଣ୍ଟର ଭଳି ଅନୁଷ୍ଠାନ ନିମନ୍ତେ ଏହି ନିୟମ ଆୟକର ଆଇନର ଧାରା ୨୬୯ ଏସ୍ଟି ଲାଗୁ ବୋଲି କୁହାଯାଇଛି। ପୂର୍ବରୁ ଗୋଟିଏ ଦିନରେ ବା ଗୋଟିଏ ଥରରେ କିମ୍ବା ଗୋଟିଏ କେସ୍ ନିମନ୍ତେ ଥରକୁ ଥର ୨ ଲକ୍ଷ ବା ତା’ଠାରୁ ଅଧିକ ନଗଦ ଅର୍ଥ ଗ୍ରହଣ ଉପରେ ଆୟକର ବିଭାଗ ଏହି ଧାରା ଡାକ୍ତରୀ ପ୍ରତିଷ୍ଠାନଗୁଡ଼ିକ ଉପରେ ଏକ ପ୍ରକାର କଟକଣା ଜାରି କରିଥିଲା। ଦେଶରେ କଳାଟଙ୍କାର କାରବାରକୁ ରୋକିବା ପାଇଁ ୨୦୧୭ରେ କେନ୍ଦ୍ର ସରକାର ଏହି କଟକଣା ଜାରି କରିଥିଲେ। ବର୍ତ୍ତମାନ ସମୟରେ ଲୋକେ ନାନା ସମସ୍ୟାର ସମ୍ମୁଖୀନ ହେଉଥିବାରୁ ଉକ୍ତ କଟକଣା କୋହଳ କରାଯାଇଛି ବୋଲି ବିଭାଗୀୟ ଅଧିକାରୀମାନେ ମତ ଦେଇଛନ୍ତି।