ନୂଆପଡ଼ା ଅଫିସ, ୧୬।୬ – ନୂଆପଡା ଜିଲା କୋମନା ବ୍ଲକ ସୁନାବେଡା ଅଭୟାରଣ୍ୟରେ ଚକୋଟିଆ ଭୁଞ୍ଜିଆ ନାମକ ଆଦିମ ଆଦିବାସୀ ସମ୍ପ୍ରଦାୟର ଲୋକେ ବାସ କରନ୍ତି। ଏହି ସମ୍ପ୍ରଦାୟଙ୍କୁ ମୁଖ୍ୟ ସ୍ରୋତକୁ ଆଣିବା ପାଇଁ ରାଜ୍ୟ ସରକାରଙ୍କ ଅନୁସୂଚିତ ଜାତି ଓ ଅନୁସୂଚିତ ଜନଜାତି ବିଭାଗ ଦ୍ୱାରା ଏକ ସ୍ବତନ୍ତ୍ର ଉନ୍ନୟନ ସଂସ୍ଥା ଚକୋଟିଆ ଭୂଞ୍ଜିଆ ଉନ୍ନୟନ ସଂସ୍ଥା କାର୍ଯ୍ୟକାରୀ କରୁଛି। ଏହି ସଂସ୍ଥା ପକ୍ଷରୁ ଏଠାକାର ଛାତ୍ରୀଛାତ୍ରମାନଙ୍କୁ ଉଚ୍ଚ ଶିକ୍ଷା ପ୍ରଦାନ କରିବା ଲକ୍ଷ୍ୟରେ ଅଭୟାରଣ୍ୟ ସାଲେପଡାଠାରେ ଏକ ସ୍ବତନ୍ତ୍ର ବିଦ୍ୟାଳୟ ଖୋଲାଯାଇଥିଲା। ଯାହା ସ୍ବତନ୍ତ୍ର ଉନ୍ନୟନ ସଂସ୍ଥା ଦ୍ୱାରା ପରିଚାଳିତ ହେଉଥିଲା। ବର୍ତ୍ତମାନ ଏହା ଅନୁସୂଚିତ ଜନଜାତି ଓ ଅନୁସୂଚିତ ଜାତି ବିଭାଗକୁ ହସ୍ତାନ୍ତର କରାଯାଇଛି। ଏହା ଏକ ଆବାସିକ ବିଦ୍ୟାଳୟ ହୋଇଥିବାରୁ ଆଦିବାସୀ ଛାତ୍ରୀଛାତ୍ରଙ୍କ ପାଇଁ କୋଟି କୋଟି ଟଙ୍କା ବ୍ୟୟରେ ଛାତ୍ରୀଛାତ୍ର ନିବାସ ନିର୍ମାଣ କରାଯାଇଛି। ଏହି ଛାତ୍ରୀଛାତ୍ରାବାସ ବ୍ୟବହାର ହୋଇ ନ ଥିବାରୁ ଏବେ ଭୁତକୋଠି ପାଲଟିଛି। ଏହାର କାରଣ ଉକ୍ତ କୋଠାରେ ପାନୀୟ ଜଳର ବ୍ୟବସ୍ଥା ନାହିଁ। ବିଭାଗୀୟ ଅଧିକାରୀମାନଙ୍କ କହିବା ମୁତାବକ ସେଠାରେ ନଳକୂପ ଖନନ କଲେ ମଧ୍ୟ ତାହା ସୁଫଳ ମିଳୁନାହିଁ। ଏପରିକି ନଳକୂପ ଖନନ କରାଯାଇଥିଲେ ମଧ୍ୟ ପାଣି ବାହାରୁ ନାହିଁ। ଏହାକୁ ନେଇ ସମ୍ପ୍ରତି ନୂଆପଡା ଗସ୍ତରେ ଥିବା ଯୋଜନା ଏବଂ ସଂଯୋଜନ ମନ୍ତ୍ରୀ ରାଜେନ୍ଦ୍ର ଢୋଲକିଆ ସମୀକ୍ଷା ବୈଠକରେ ଉଦବେଗ ପ୍ରକାଶ କରିଥିଲେ। ବାରମ୍ବାର ପରିସରରେ ମଧ୍ୟ ନଳକୂପ ଖନନ କରି ଅର୍ଥ ଖର୍ଚ୍ଚ କରିବା ପରିବର୍ତ୍ତେ ଜନବସତିଠାରେ ନଳକୂପ ଖନନ କରି ପାଇପ ଯୋଗେ ଛାତ୍ର ନିବାସକୁ ସଂଯୋଗ କରାଗଲେ, ଉକ୍ତ ଛାତ୍ର ନିବାସ କେବେଠାରୁ କାର୍ଯ୍ୟକ୍ଷମ ହୋଇପାରନ୍ତା ଓ ସରକାରୀ ଅର୍ଥ ନଷ୍ଟ ହୋଇ ନ ଥାନ୍ତା। ଏ ନେଇ ସରକାରୀ ଅଧିକାରୀମାନେ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।