ସୋସିଆଲ ମିଡିଆରେ ଏବେ ଲକ୍ଷେ ଟଙ୍କିଆ ଘରର ଏକ ଫଟୋ ଖୁବ୍ ତୀବ୍ର ବେଗରେ ଭାଇରାଲ ହେଉଛି। ଏହାର ବିଶେଷତ୍ତ୍ୱ ହେଲା ଯେଉଁଆଡ଼େ ଚାହିଁବେ ଏହି ଘରକୁ ଗଡ଼ାଇ ପାରିବେ। ମନକୁ ପ୍ରଶ୍ନ ଉଠୁଥିବ ଘର ଗଡ଼ିବ କେମିତି? ତେବେ ପ୍ରକୃତ କଥା ହେଲା ଏହି ଘରଟି ଏକ ଅଟୋରେ ତିଆରି କରାଯାଇଛି। ଏହି ଘରକୁ ତାମିଲନାଡୁର ଅରୁଣ ପ୍ରଭୁ ନାମକ ଜଣେ ୨୩ ବର୍ଷୀୟ ଯୁବକ ତିଆରି କରିଛନ୍ତି। ଖାଲି ଏତିକି ନୁହେଁ, ଏହି ଘରେ ବେଡ୍ରୁମ୍ଠାରୁ ଆରମ୍ଭ କରି କିଚେନ୍, ଟୟଲେଟ୍ ମଧ୍ୟ ରହିଛି। ଏହି ଘରେ ଦୁଇଜଣ ଲୋକ ବେଶ୍ ଆରାମରେ ରହିପାରିବେ। ଅଟୋ ଛାତରେ ଏକ ଆରାମଦାୟକ ଚେୟାର ମଧ୍ୟ ପଡ଼ିଛି। ଚାହିଁଲେ ଏଥିରେ ବସି ଖୋଲା ପବନକୁ ଉପଭୋଗ କରିପାରିବେ। ୩୬ ବର୍ଗ ଫୁଟରେ ନିର୍ମିତ ଏହି ଘରରେ ୨୫୦ ଲିଟରର ଏକ ଓ୍ବାଟର ଟ୍ୟାଙ୍କ ଥିବା ବେଳେ ୬୦୦ ଓ୍ବାଟ୍ର ସୋଲାର ପ୍ୟାନେଲ ଲାଗିଛି। ଛାତକୁ ଯିବାକୁ ଶିଡ଼ି ମଧ୍ୟ ରହିଛି।
ପୁରୁଣା ସାମଗ୍ରୀକୁ ରିସାଇକ୍ଲିଂ କରାଯାଇ ଏହି ଘର ତିଆରି କରାଯାଇଛି। ଏହି ଘର ତିଆରି କରିବାକୁ ଅରୁଣଙ୍କୁ ୫ ମାସ ଲାଗିଛି । ଘରଟି ବର୍ତ୍ତମାନ ସମସ୍ତଙ୍କ ପସନ୍ଦ ଆସୁଛି। ଅରୁଣ ବେଙ୍ଗାଲୁରୁର ଡିଜାଇନ ଏବଂ ଆର୍କିଟେକ୍ଟ କମ୍ପାନୀ ବିଲ୍ବୋର୍ଡ ସହିତ ମିଶି ଏହାକୁ ତିଆରି କରିଛନ୍ତି।