ଏଇ ପୃଥିବୀରେ ଅଜବ ସ୍ଥାନର ଅଭାବ ନାହିଁ। ଯେମିତିକି ଉତ୍ତର ଫ୍ରାନ୍ସ ର ଇଂଲିଶ ଚ୍ୟାନେଲ୍ ତଟରେ ଥିବା ଏକ ଛୋଟିଆ ସମୁଦ୍ର କୁଳିଆ ଗାଁ ‘ଇକ୍ୱିହେନ ପ୍ଲାଜ୍’। ପ୍ରାୟ ୩୦୦୦ ଅଧିବାସୀ ଥିବା ଏହି ଗ୍ରାମର ବିଶେଷତ୍ୱ ହେଉଛି ଯେ, ଏଠାକାର ସବୁ ଘର ଓଲଟା ଡଙ୍ଗା ସଦୃଶ। ତେଣୁ ଉକ୍ତ ଗାଁ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ର ପାଲଟିଛି। ବିଂଶ ଶତାବ୍ଦିର ପ୍ରାରମ୍ଭରେ ଏହି ଗାଁ କେବଳ ଏକ ମାଛଧରାଳୀଙ୍କ ଗାଁ ଥିଲା। ଏହି ଗାଁକୁ ଡ୍ରାଏ ହାର୍ବର ବି କୁହାଯାଉଥିଲା। ତେବେ ପରବର୍ତ୍ତୀ ସମୟରେ ସେଠାକାର ଅଧିବାସୀ ଅଦରକାରୀ ବଡ଼ ବଡ଼ ଡ଼ଙ୍ଗାକୁ ଟାଣି ଟାଣି ନେଇ ଉଚ୍ଚ ସ୍ଥାନରେ ଓଲଟା କରି ରଖି ତା’ଉପରେ ଆଲକାତାରା ଢାଳି ଡ଼ଙ୍ଗାଗୁଡିକୁ ଓ୍ବାଟରପ୍ରୁଫ୍ କରିଥିଲେ। ଆଉ ଦୁଇ ପାର୍ଶ୍ୱକୁ କାଟି କବାଟ ଓ ଝରକା କରି ଡ଼ଙ୍ଗାକୁ ଘର କରିଥିଲେ। ଏହି ଡ଼ଙ୍ଗା ଘର ଭିତରେ ଡ଼ଙ୍ଗା ଲମ୍ବର କୋଠରୀ ସହ ରୋଷେଇ ଘର, ଶୋଇବା ରୁମ୍ କରାଯାଉଥିଲା। ଫଳରେ ଡ଼ଙ୍ଗାଗୁଡିକ ରହିବାଯୋଗ୍ୟ ଘର ପାଲଟିଯାଉଥିଲା। ସେତେବେଳେ ଏମିତି ଅନେକ ଓଲଟା ଡ଼ଙ୍ଗା ଘର ଥିଲା। ହେଲେ ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଏହି ଘରଗୁଡିକ ନଷ୍ଟ ହୋଇଗଲା। ତେବେ ୧୯୯୦ରେ ଏଠାକାର ଅଧିବାସୀ ପୁରୁଣା ପରମ୍ପରାକୁ ପୁନର୍ଜିବୀତ କରିବାକୁ ନିଷ୍ପତ୍ତି ନେଲେ। ଆଉ ଅନେକ ଓଲଟା ଡ଼ଙ୍ଗାର ଘର ତିଆରି କଲେ। ଯଦ୍ୱାରା ଇକ୍ୱିହେନ ପ୍ଲାଜ୍ ଗାଁ ପୁଣିଥରେ ଓଲଟା ଡ଼ଙ୍ଗାର ଗାଁ ପାଲଟିଗଲା। ଏବେ ଏହି ଗାଁ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ର ପାଲଟିଛି।
