କୋକସରା,୨୫ା୬(ଡି.ଏନ୍.ଏ.): ଲଗାଣ ବର୍ଷାରେ ଦୁଇ ପରିବାରର ମାଟିଘର ଭାଙ୍ଗିଯାଇଛି। ଫଳରେ ଏବେ ଅସହାୟ ଅବସ୍ଥାରେ ସରକାରୀ ସହାୟତା ଲୋଡୁଛନ୍ତି ବିପନ୍ନ ପରିବାର। କଳାହାଣ୍ଡି ଜିଲା କୋକସରା ବ୍ଲକ ବରାଡଙ୍ଗା ଗାଁର ଶଙ୍କର ନାଏକ ଓ ଶଙ୍କରା ରାଉତ। ଶଙ୍କର ନାଏକଙ୍କ ଘରେ ସ୍ତ୍ରୀ ସହ ଦୁଇ ପୁଅ ରହୁଥିବା ବେଳେ ଶଙ୍କରା ରାଉତ ନିଜ ବୃଦ୍ଧା ପିଉସୀଙ୍କ ସହ ରହୁଛନ୍ତି। ଗରିବ ଶ୍ରେଣୀର ହୋଇଥିବା ବେଳେ ପୂର୍ବରୁ ଅନେକ ଥର ପଞ୍ଚାୟତ ଅଧିକାରୀଙ୍କ ଠାରୁ ଆରମ୍ଭ କରି ବ୍ଲକ ଅଧିକାରୀଙ୍କୁ ଆବାସ ପାଇଁ ଆବେଦନ କରିଛନ୍ତି, ହେଲେ ଫଳ କିଛି ମିଳିନାହିଁ । ମାଟି ଘରେ ଅତି ଦୟନୀୟ ଅବସ୍ଥାରେରେ ପରିବାର ସହ ରହୁଥିଲେ। ହେଲେ ତାହା ବି ଦଇବ ସହିଲା ନାହିଁ। ଶୁକ୍ରବାର ହୋଇଥିବା ବର୍ଷାରେ ଦୁଇ ପରିବାରର ମାଟି କାନ୍ଥ ଭାଙ୍ଗି ପଡ଼ିଛି। ଶନିବାର ଏ ନେଇ ପରିବାର ପକ୍ଷରୁ ଲଡୁଗାଁ ରାଜସ୍ବ ନିରୀକ୍ଷିକ ମମତା ସାଏଙ୍କୁ ଖବର ଦେବା ପରେ ସେ ପହଞ୍ଚି କ୍ଷୟକ୍ଷତି ଆକଳନ କରି ରିପୋର୍ଟ ତହସିଲ କାର୍ଯ୍ୟାଳୟରେ ଦେଇଥିବା ଜଣାପଡ଼ିଛି। ଅନ୍ୟପଟେ ତହସିଲ କାର୍ଯ୍ୟାଳୟ ପକ୍ଷରୁ ୨ ପରିବାରକୁ ପଲିଥିନ୍ ଯୋଗାଇ ଦିଆଯାଇଥିବା ନେଇ ରାଜସ୍ବ ନିରୀକ୍ଷକ ମମତା ସାଏ ସୂଚନା ଦେଇଛନ୍ତି। ତେବେ ଆବାସ ଘର ଯୋଜନାରେ ଦୁଇ ପରିବାରକୁ ଘର ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି।