ଉଦଳା,୧୩।୨: ମୟୂରଭଞ୍ଜ ଜିଲା ଉଦଳା ବନ ବିଭାଗ ବନାଞ୍ଚଳ ଅଧୀନ ଅଙ୍ଗାରପଡ଼ା ଗ୍ରାମରେ ଚଢ଼ାଉ କରି ସମ୍ବର ମାଂସ ଜବତ କରିଛି। ଏପରି କି ଅଧିକାରୀମାନେ ଜଣେ ଶିକାରୀଙ୍କୁ ଗିରଫ କରିଛନ୍ତି। ଗିରଫ ଶିକାରୀ ହେଲେ ଉକ୍ତ ଗ୍ରାମର ଗୋପାଲ ସିଂ। ବନ ବିଭାଗ ୪ କିଲୋ ସମ୍ବର ମାଂସ ସହିତ ଗୋଟିଏ କଟୁରୀ, ଦେଶୀ ଗୁଳି ଏବଂ କିଛି ରନ୍ଧା ସମ୍ବର ମାଂସ ମଧ୍ୟ ଜବତ କରିଛି। ସୂଚନା ଯୋଗ୍ୟ, ଗୋପାଲ ସ୍ଥାନୀୟ ଜଙ୍ଗଲରୁ ସମ୍ବରକୁ ମାରି ଗାଁକୁ ଆଣିଥିଲେ। ପରେ କିଛି ଲୋକ ମିଶି ସମ୍ବରକୁ କାଟି ମାଂସ ଭାଗ କରୁଥିଲେ। କୌଣସି ସୁତ୍ରରୁ ଖବର ପାଇ ବନ ବିଭାଗ କର୍ମଚାରୀ ଗାଁରେ ଚଢାଉ କରିଥିଲେ। ଚଢାଉ ବେଳେ ଅଧିକାରୀମାନେ ଗୋପାଲଙ୍କ ଭାଗରେ ପଡିଥିବା ୪ କିଲୋ ସମ୍ବର ମାଂସ ଜବତ କରିଥିଲେ। ଏନେଇ ବନ ବିଭାଗ ଏକ ମାମଲା ରୁଜୁ କରି ତଦନ୍ତ ଚଳାଇଛି।