ଭୁବନେଶ୍ୱର,୮ା୮(ବ୍ୟୁରୋ): ସାତ ଜନ୍ମର ସାଥୀ ହୋଇ ସାରା ଜୀବନ ହସଖୁସିରେ ରହିବେ ବୋଲି ଅଗ୍ନିକୁ ସାକ୍ଷୀ ରଖି ସ୍ତ୍ରୀଙ୍କ ହାତ ଧରିଥିଲେ। ହେଲେ ବିବାହର କେଇ ଦିନ ପରେ ସ୍ତ୍ରୀଙ୍କ ଦାନ୍ତ ରୋଗକୁ କ୍ୟାନସର ଭାବି ନିର୍ଯାତନା ଦେବା ସହ ହାତ ଛାଡିଦେଇଥିଲେ। ମାନସିକ ଯନ୍ତ୍ରଣା ସହି ନ ପାରି ଶେଷରେ ସ୍ତ୍ରୀ ପ୍ରଜ୍ଞାପାରମିତା ସ୍ବାଇଁ (୨୪) ତାଙ୍କ ଭାଇଙ୍କ ଘରେ ଶନିବାର ଆତ୍ମହତ୍ୟା କରିଥିଲେ। ରବିବାର ସତ୍ୟନଗରସ୍ଥିତ ଶ୍ମଶାନରେ ପ୍ରଜ୍ଞାଙ୍କ ଶେଷକୃତ୍ୟ ସମ୍ପନ୍ନ ବେଳେ ଏଠାକୁ ତାଙ୍କ ସ୍ବାମୀ ପ୍ରଶାନ୍ତ ପାତ୍ର ନ ଆସିବା ସମସ୍ତଙ୍କୁ ଚକିତ କରିଛି। ସେପଟେ ଭାଇ ପ୍ରିୟବ୍ରତଙ୍କ ଅଭିଯୋଗକ୍ରମେ ମଞ୍ଚେଶ୍ୱର ଥାନା ପୋଲିସ ଆଇପିସି ଦଫା ୩୦୬,୪୯୮(କ),୩୪ରେ ଏକ ମାମଲା (ନଂ.୨୮୦/୨୨) ରୁଜୁ କରି ତଦନ୍ତକୁ ଜୋରଦାର କରିଛି। ପ୍ରଜ୍ଞା କେଉଁ ହସ୍ପିଟାଲରେ ଚିକିତ୍ସିତ ହେଉଥିଲେ ଓ କେଉଁମାନେ କ୍ୟାନସର କହି ନିର୍ଯାତନା ଦେଉଥିଲେ ଏହା ଜାଣିବାକୁ ପୋଲିସ ପ୍ରୟାସ ଆରମ୍ଭ କରିଛି। ପ୍ରଜ୍ଞାଙ୍କ ମୋବାଇଲ ଫୋନ୍ ଜବତ କରାଯାଇଛି। ଏଥିସହ ବାପଘରକୁ ଯିବା ପାଇଁ ପ୍ରରୋଚନା କରିଥିବା ସମ୍ପୃକ୍ତ ମଧ୍ୟସ୍ଥିଙ୍କୁ ପୋଲିସ ଖୋଜାଖୋଜି କରୁଛି। ସୋମବାର ପଟିଆସ୍ଥିତ ଘରକୁ ପୋଲିସ ଯାଇ ସ୍ବାମୀ ଓ ଶାଶୂଙ୍କୁ ପଚରାଉଚରା କରିବ ବୋଲି ଜଣାପଡ଼ିଛି।
ସୂଚନାଯୋଗ୍ୟ, ପଟିଆ ଜଗନ୍ନାଥ ନଗରର ପ୍ରଶାନ୍ତଙ୍କୁ କଟକ ନିଆଳିର ପ୍ରଜ୍ଞା ଜୁନ ୮ରେ ବିବାହ କରିଥିଲେ। ବିବାହର ୧୨ଦିନ ପରେ ଶାଶୂ, ନଣନ୍ଦ ଓ ସ୍ବାମୀ କ୍ୟାନ୍ସର ହୋଇଥିବା କହି ତାଙ୍କୁ ନିର୍ଯାତନା ଦେଇଥିଲେ। ଫଳରେ ପ୍ରଜ୍ଞାଙ୍କୁ ଜିଜିପି କୋଲନୀରେ ରହୁଥିବା ଭାଇ ପ୍ରିୟବ୍ରତ ଜୁନ ୨୦ରେ ଘରକୁ ନେଇ ଆସିଥିଲେ। ଏହାପରେ ଏକ ଘରୋଇ ହସ୍ପିଟାଲରେ ପ୍ରଜ୍ଞାଙ୍କୁ ଚିକିତ୍ସିତ କରାଉଥିଲେ। ଡାକ୍ତର କହିଥିଲେ, ଏହା କ୍ୟାନସର ନୁହେଁ, ବରଂ ସାମନ୍ୟ ଦାନ୍ତ ପୋକ ଯୋଗୁ ଏମିତି ହେଉଛି। ତେଣୁ ସର୍ଜରୀ କଲେ ଏହା ଭଲ ହୋଇଯିବ। ପରବର୍ତ୍ତୀ ସମୟରେ ତାଙ୍କର ସର୍ଜରୀ ହୋଇଥିଲା। ୯୫ ପ୍ରତିଶତ ଭଲ ହୋଇଯାଇଥିଲା। ଏ ସଂକ୍ରାନ୍ତରେ ଶାଶୂଘର ଲୋକଙ୍କୁ ପ୍ରଜ୍ଞା ଜଣାଇବା ପାଇଁ ବାରମ୍ବାର ଫୋନ କରି ଥିଲେ ମଧ୍ୟ କିଛି ଉତ୍ତର ମିଳି ନ ଥିଲା। ଫଳରେ ମାନସିକ ସ୍ତରରେ ପ୍ରଜ୍ଞା ଭାଙ୍ଗି ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିଲେ।