ନୟାଗଡ ଅଫିସ,୧୩।୨: ହତ୍ୟାର ୧୫ ଦିନ ପରେ ନୟାଗଡ ଜିଲା ଶରଣକୁଳ ଥାନା ସୁଆରସାହିର ସସ୍ମିତା ମହାପାତ୍ର ହତ୍ୟା ଘଟଣାର ଗୁମର ଫିଟିଛି । ସ୍ତ୍ରୀଙ୍କୁ ହତ୍ୟା କରିବାକୁ ସ୍ବାମୀ ୪ ସୁପାରିକିଲରଙ୍କୁ ନିୟୋଜିତ କରିଥିଲେ । ହତ୍ୟାକାଣ୍ଡ ପରେ ସେହି ଘଟଣାକୁ ଆମତ୍ହତ୍ୟାର ରୂପ ବି ଦେଇଥିଲେ । ଏହି ଘଟଣାରେ ପୋଲିସ ଗୋଲଗଁାର ଜିତେନ୍ଦ୍ର ସ୍ବାଇଁ(୨୧), ତୋଫାନ ମଣ୍ଡଳ(୨୧), ଭାଗି ମହାରଣା(୪୫) ଓ ଶରଣକୁଳର ମନୋଜ ପ୍ରଧାନ(୨୧)ଙ୍କୁ ଗିରଫ କରି ପଚରାଉଚୁରା କରୁଛି । ସେମାନଙ୍କଠାରୁ ୨୦ ହଜାର ଟଙ୍କା ଜବତ କରାଯାଇଛି। ଏହି ଅଭିଯୁକ୍ତମାନେ ସୁପାରିକିଲର ା ଟଙ୍କା ନେଇ ସେମାନେ ସସ୍ମିତାଙ୍କୁ ହତ୍ୟା କରିଥିବା ସ୍ବୀକାର କରିଛନ୍ତି । ରବିବାର ୪ ସୁପାରିକିଲରଙ୍କୁ ନେଇ ସିନ୍ ରିକ୍ରିଏଟ୍ କରାଯିବ ବୋଲି ଆଇଆଇସି ବିମଳ ମଲ୍ଲିକ ସୂଚନା ଦେଇଛନ୍ତି ।
ଅଭିଯୋଗ ଅନୁସାରେ କଟକ ସଦର ଥାନା ଝିଙ୍କିରିଆ ଗଁାର ସୁମନ୍ତ ଦେବତାଙ୍କ ଝିଅ ସସ୍ମିତା (୩୮) ୨୦୧୭ ଜୁନ ୧୮ରେ ଶରଣକୁଳ ଥାନା ଶରଣକୁଳ ସୁଆରସାହିର ସୀତାକାନ୍ତ ମହାପାତ୍ରଙ୍କ ପୁଅ ଅଖିଳ(୩୯)ଙ୍କୁ ବିବାହ କରିଥିଲେ । ବିବାହ ସମୟରେ ବରପକ୍ଷ ଦାବି ମୁତାବକ ଯୌତୁକ ଦିଆଯାଇଥିଲା । ହେଲେ ଅଧିକ ଯୌତୁକ ପାଇଁ ଶାଶୁଘର ଲୋକେ ସସ୍ମିତାଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଉଥିଲେ । ଏହି ଦମ୍ପତିଙ୍କ ୩ ବର୍ଷର ଝିଅଟିଏ ଅଛି । ଶାଶୁଘର ଲୋକେ ସସ୍ମିତାଙ୍କୁ ଗତ ଜାନୁୟାରୀ ୨୯ରେ ସୁପାରିକିଲରଙ୍କ ଦ୍ୱାରା ହତ୍ୟା କରାଇବା ପରେ ଆମତ୍ହତ୍ୟାର ରୂପ ଦେଇ ଖସି ଯିବାକୁ ଉଦ୍ୟମ କରିଥିଲେ । ମୃତଦେହ ୧୦ ଘଣ୍ଟାରୁ ଊର୍ଦ୍ଧ୍ୱ ସମୟ ଝୁଲି ରହିଥିଲେ ମଧ୍ୟ ଅଭିଯୋଗ ହୋଇନାହିଁ କହି ପୋଲିସ ଘଟଣା ସ୍ଥଳକୁ ଯାଇ ନ ଥିଲା । ଶେଷରେ ସସ୍ମିତାଙ୍କ ବାପ ଘର ପକ୍ଷରୁ ଚାପ ପଡିବାରୁ ପୋଲିସ ୪୯୮, ୩୦୪(ବି), ୩୦୨, ୩୪ ଆଇପିସି, ୪ଡିପି ଆକ୍ଟରେ ଏକ ମାମଲା(ନଂ୧୫/୨୧) ରୁଜୁ କରି ତଦନ୍ତ କରିଥିଲା । ଏହି ହତ୍ୟା ଘଟଣାରେ ପୋଲିସ ଅଖିଳଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ।