କୋରାପୁଟ,୪।୯(ସ୍ବ.ପ୍ର.)ଷ କୋରାପୁଟ ଜିଲାର କାକିରିଗୁମ୍ମା ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ୪ ମାସ ତଳୁ ନିଖୋଜ ଥିବା ମହିଳାଙ୍କ ମୃତଦେହ ଏକ ପାଇଖାନା ଟାଙ୍କିରୁ ଉଦ୍ଧାର ହୋଇଛି। ସମ୍ପୃକ୍ତ ମହିଳାଙ୍କ ସ୍ବାମୀ ହିଁ ଏହି ହତ୍ୟାକାଣ୍ଡର ଅଭିଯୁକ୍ତ ବୋଲି ଜଣାପଡିଛି। ପରେ ପୋଲିସ ଅଭିଯୁକ୍ତଙ୍କୁ ଗିରଫ କରିଛି।
ସୂଚନାଯୋଗ୍ୟ,କାକିରିଗୁମ୍ମା ଥାନା ଅନ୍ତର୍ଗତ ଦାମନଯୋଡି ଯିବା ରାସ୍ତାକଡ଼ରେ ଦଶରଥ ସାହୁ ପରିବାର ନେଇ ରହୁଥିଲେ। ପ୍ରତିଦିନ ଦଶରଥ ସାହୁ ଓ ତାଙ୍କ ସ୍ତ୍ରୀ ଗୌରୀଙ୍କ ମଧ୍ୟରେ କଳହ ଲାଗି ରହୁଥିଲା। କଳହ ଉଗ୍ର ରୂପ ନେବାରୁ ଦଶରଥ ସାହୁ ନିଜ ସ୍ତ୍ରୀକୁ ମାରି ପାଇଖାନା ଟାଙ୍କିରେ ପୋତି ଦେଇଥିଲେ। ବହୁ ଦିନ ଧରି ସାହି ପଡିଶା ଓ ବନ୍ଧୁ ବାନ୍ଧବ ଗୌରୀଙ୍କୁ ଦେଖିବାକୁ ପାଇ ନ ଥିଲେ। ଗୌରୀଙ୍କ ବିଷୟରେ ସ୍ବାମୀଙ୍କୁ ପଚାରିବାରୁ ଦଶରଥ ବିଭିନ୍ନ ସମୟରେ ବାହାନା କରୁଥିଲେ। କିଛି ଦିନ ତଳେ ଦଶରଥଙ୍କ ଶ୍ୱଶୁର ତାଙ୍କୁ ଫୋନ କରି ଝିଅ ବିଷୟରେ ପଚାରିବାରୁ ରାୟଗଡାରେ ପୁଅ ପାଖରେ ରହୁଛି ବୋଲି ଦଶରଥ ପ୍ରକାଶ କରିଥିଲେ। ସନ୍ଦେହ ହେବାରୁ ରାୟଗଡାରେ ରହୁଥିବା ନାତିକୁ ଫୋନ କରି ମା’ ବିଷୟରେ ପଚାରିଥିଲେ। କିନ୍ତୁ ମା’ ବହୁ ଦିନ ହେବ ମୋ ପାଖକୁ ଆସିନି ବୋଲି ପୁଅ କହିଥିଲେ। ଶ୍ୱଶୁର ଘର ଲୋକଙ୍କ ମନରେ ସନ୍ଦେହ ଅଧିକ ହେବାରୁ ଝିଅ ନିଖୋଜ ହୋଇଥିବା ନେଇ କାକାରିଗୁମ୍ମା ଥାନାରେ ଏକ ଲିଖିତ ଅଭିଯୋଗ କରିଥିଲେ। ଅଭିଯୋଗକୁ ଆଧାର କରି କାକାରିଗୁମ୍ମା ପୋଲିସ ଥାନା ଅଧିକାରୀ ଦଶରଥକୁ ଥାନାକୁ ଡାକି ପଚରାଉଚରା କରିବାରୁ ଦଶରଥ ସବୁ ସତ କଥା ପ୍ରକାଶ କରିଥିଲା। ଏହା ପରେ ଲକ୍ଷ୍ମୀପୁର ଏସଡିପିଓ ଅଶିନୀ କୁମାର ନାୟକ, କାକିରିଗୁମ୍ମା ଥାନା ଅଧିକାରୀ ଉଲ୍ଲାସ ରାଉତ,ମାଜିଷ୍ଟ୍ରେଟ, ଫରେନସିଭ ଟିମ ଉପସ୍ଥିତ ରେ ପାଇଖାନା ଟାଙ୍କି ଖୋଳା ଯାଇଥିଲା। ଟାଙ୍କି ମଧ୍ୟରୁ ଗୌରୀ ସାହୁଙ୍କ ମୃତଦେହକୁ ଉଦ୍ଧାର କରିବା ସହିତ ଫରେନସିଭ ଟେଷ୍ଟ ପାଇଁ ଲ୍ୟାବକୁ ପଠାଇ ଦିଆଯାଇଛି। ଏହି ଘଟଣାର ମୁଖ୍ୟ ଅଭିଯୁକ୍ତ ଦଶରଥ ସାହୁକୁ ପୋଲିସ ଗିରଫ କରି ଅଧିକ ତଥ୍ୟ ଜାଣିବା ପାଇଁ ଚେଷ୍ଟା କରୁଛି।
