ବାରିପଦା ଅଫିସ,୨୦।୧୧: ମୟୂରଭଞ୍ଜ ଜିଲା ମୋରଡ଼ା ଥାନା ମାଳିହତା ଗ୍ରାମରେ ଗୁରୁବାର ବିଳମ୍ବିତ ରାତିରେ ଏକ ହତ୍ୟାକାଣ୍ଡ ଘଟିଛି। ଗ୍ରାମର ଶିବପ୍ରସାଦ ମହାନ୍ତ ସ୍ତ୍ରୀ ପାର୍ବତୀ ମହାନ୍ତଙ୍କୁ କୁରାଢୀରେ ଛେଚି ଅତି ନୃଶଂସଭାବେ ହତ୍ୟା କରିଛନ୍ତି।
ପ୍ରକାଶ ଯେ, ପାରିବାରିକ କଳହ ଯୋଗୁ ଗତ କିଛି ଦିନ ହେବ ସ୍ବାମୀ-ସ୍ତ୍ରୀଙ୍କ ମଧ୍ୟରେ ବଚସା ଲାଗିରହୁଥିଲା। ଅଧିକାଂଶ ସମୟରେ ଶିବପ୍ରସାଦ ନିଶାସକ୍ତ ଅବସ୍ଥାରେ ସ୍ତ୍ରୀ ପାର୍ବତୀଙ୍କ ସହ ମାର୍ପିଟ କରୁଥିଲା। ଗୁରୁବାର ବିଳମ୍ବିତ ରାତିରେ ପାର୍ବତୀ ଶୋଇଥିବା ବେଳେ ଶିବପ୍ରସାଦ ମାନସିକ ଭାରସାମ୍ୟ ହରାଇ କୁରାଢ଼ୀରେ ଛେଚି ଅତି ନୃଶଂସଭାବେ ତାକୁ ହତ୍ୟା କରିଥିବା ଜଣାପଡ଼ିଛି। ପରିବାର ଲୋକ ବିଳମ୍ବିତ ରାତିରେ ଘର ଭିତରେ ପାଟିତୁଣ୍ଡ ଶୁଣି ଉଠି ଦେଖିବା ବେଳକୁ ରକ୍ତ ଜୁଡୁବୁଡୁ ଅବସ୍ଥାରେ ପାର୍ବତୀଙ୍କ ମୃତଦେହ ପଡିଥିବା ଦେଖିବାକୁ ପାଇଥିଲା। ଶୁକ୍ରବାର ସକାଳେ ଏ ନେଇ ଗ୍ରାମବାସୀ ପୋଲିସକୁ ଖବର ଦେଇଥିଲେ । ମୋରଡା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ଅଧିକ ତଦନ୍ତ ଜାରି ରଖିଛି। ଅନ୍ୟପକ୍ଷରେ ହତ୍ୟାକାରୀ ଶିବପ୍ରସାଦ କୁ ପୋଲିସ ଅଟକ ରଖିଛି।
