କେନ୍ଦୁଝର,୧୯ା୨(ସ୍ବ.ପ୍ର.): ତେଲକୋଇ ଥାନା ରଗଡ଼ା ଗାଁରେ ଜଣେ ବ୍ୟକ୍ତି ସ୍ତ୍ରୀଙ୍କୁ ଶନିବାର ଏକ ଧାରୁଆ ଅସ୍ତ୍ରରେ ବୀଭତ୍ସ ଭାବେ ହାଣି ହତ୍ୟା କଲାପରେ ରବିବାର ତେଲକୋଇ ଥାନାରେ ଆତ୍ମସମର୍ପଣ କରିବା ଘଟଣା ଚର୍ଚ୍ଚାର ବିଷୟ ହୋଇଛି। ଅଭିଯୁକ୍ତଙ୍କ ନାମ ରଥିଆ ସେଠୀ(୩୨)। ମୃତାଙ୍କ ନାମ ସୁଲୋଚନା ସେଠୀ (୨୭)।
ପ୍ରକାଶ ଯେ, ଗତକାଲି ବିଳମ୍ବିତ ରାତିରେ ଅଭିଯୁକ୍ତ ରଥିଆଙ୍କର ସ୍ତ୍ରୀ ସୁଲୋଚନାଙ୍କ ସହିତ କୌଣସି କାରଣଙ୍କୁ ନେଇ ବଚସା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ରଥିଆ ସୁଲୋଚନାଙ୍କୁ ଏକ ଟାଙ୍ଗିଆରେ ହାଣି ହତ୍ୟା କରିଥିଲେ। ଆଜି ସକାଳେ ତେଲକୋଇ ଥାନାରେ ଆତ୍ମସମର୍ପଣ କରିଥିଲେ। ଖବର ପାଇ ପୋଲିସ ଘଟଣାସ୍ଥଳରେ ସାଇଣ୍ଟିଫିକ୍ ଟିମ୍ ସହ ପହଞ୍ଚି ତଦନ୍ତ ଆରମ୍ଭ କରିଛି। ଘର ଭିତରୁ ରକ୍ତ ଜଡୁବୁଡୁ ଅବସ୍ଥାରେ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ଡାକ୍ତରଖାନା ପଠାଇଥିବା ଜଣାପଡ଼ିଛି। ପାରିବାରିକ କଳହରୁ ହତ୍ୟାକାଣ୍ଡ ହୋଇଥିବା ପ୍ରାଥମିକ ତଦନ୍ତରୁ ପୋଲିସ ଜାଣିବାକୁ ପାଇଛି। ତେବେ ଯୌତୁକ ପାଇଁ ସୁଲୋଚନାଙ୍କୁ ହତ୍ୟା କରାଯାଇଛି ବୋଲି ତାଙ୍କ ପରିବାର ଲୋକେ ଥାନାରେ ଅଭିଯୋଗ କରିଛନ୍ତି।
ସୁଲୋଚନାଙ୍କ ଭାଇଙ୍କ ଅଭିଯୋଗ ଆନୁଯାୟୀ, ୧୮ ମାସ ତଳେ ସୁଲୋଚନାଙ୍କୁ ରଗଡ଼ା ଗାଁର ରଥିଆ ସେଠୀଙ୍କ ସହିତ ବିବାହ କରାଯାଇଥିଲା। ବିବାହ ଦିନଠାରୁ ସୁଲୋଚନାଙ୍ଙ୍କୁ ରଥିଆ ମାରଧର କରୁଥିଲେ। ଗତ ମାସରେ ରଥିଆଙ୍କ ଦାବି ଆନୁଯାୟୀ ଏକ ଟିଭି ସୁଲୋଚନାଙ୍କ ପରିବାର ଦେଇଥିଲେ। ତଥାପି ଅଧିକ ଜିନିଷ ରଥିଆ ଦାବି କରି ମାରଧର କରୁଥିଲେ ବୋଲି ଅଭିଯୋଗ ହୋଇଛି। ଅନ୍ୟପକ୍ଷରେ ପଡ଼ୋଶୀଙ୍କ କହିବା ଆନୁଯାୟୀ, ବାହାଘର ହେଲା ପରେ ସୁଲୋଚନାଙ୍କ କୌଣସି ସନ୍ତାନ ହେଉ ନ ଥିବାରୁ ବହୁ ସମୟରେ ଝଗଡା ଲାଗୁଥିଲା। ଗତକାଲି ସନ୍ଧ୍ୟାଠାରୁ ରଥିଆଙ୍କ ଘରେ ଝଗଡ଼ା ଲାଗିଥିଲା। ରଥିଆଙ୍କ ବାପା ସିରିଆ ସେଠୀ ଓ ମା ମଣ୍ଡେଇ ଝଗଡ଼ା ସମୟରେ ଥିଲେ। ରାତି ଖାଇ ପିଇ ସାରି ବାପା ମା ଅନ୍ୟ ଏକ ଘରକୁ ଶୋଇବାକୁ ଯାଇଥିଲେ। ଆଜି ସକାଳେ ସୁଲୋଚନାଙ୍କୁ ରଥିଆ ହାଣି ହତ୍ୟା କରିଥିବା ଜଣାପଡ଼ିଥିଲା। ତେବେ ପାରିବାରିକ କଳହରୁ ହତ୍ୟା କରି ସ୍ବାମୀ ଥାନାରେ ଆତ୍ମସମର୍ପଣ କରିଛନ୍ତି। ତଦନ୍ତ ଚାଲୁଛି ତଦନ୍ତ ସରିବା ପରେ ଅଧିକ ଜଣାପଡ଼ିବ ବୋଲି ସଦର ଏସ୍ଡିପିଓ ମହେନ୍ଦ୍ର ନାଥ ମୁର୍ମୁ ପ୍ରକଶ କରିଛନ୍ତି।