ଭୁବନେଶ୍ୱର,୩।୭(ଅଭିଜିତ ଦାସ): ଗତ ଜୁନ୍ ୨ରେ କରମଣ୍ଡଳ ଟ୍ରେନ୍ ହାଓଡାରୁ ଚେନ୍ନାଇ ଅଭିମୁଖେ ଯାତ୍ରା କରୁଥିଲା। କିଏ ପରିବାର ସହ ଯାଉଥିଲା ତ ଆଉ କିଏ ସାଙ୍ଗସାଥିଙ୍କ ସହ ହସଖୁସିରେ ମଜି ଯାଇଥିଲେ। କିନ୍ତୁ ବାହାନଗା ରେଳଷ୍ଟେଶନ ନିକଟରେ ସବୁକିଛି ଛାରଖାର ହୋଇଗଲା। ଗୋଟିଏ ମାଲବାହୀ ଟ୍ରେନ୍ ଓ ୨ଟି ଏକ୍ସପ୍ରେସ ଟ୍ରେନ୍ ମଧ୍ୟରେ ଧକ୍କା ହେବା ଦ୍ୱାରା ଘଟଣାସ୍ଥଳରେ ୨୮୮ ଜଣଙ୍କ ମୃତ୍ୟୁ ହୋଇଥିଲା। ପରବର୍ତ୍ତୀ ସମୟରେ ମୃତ୍ୟୁସଂଖ୍ୟା ୨୯୩କୁ ବୃଦ୍ଧି ହୋଇଥିବାବେଳେ ଅନେକ ଯାତ୍ରୀ ଏବେବି ଚିକିତ୍ସିତ ଅବସ୍ଥାରେ ରହିଛନ୍ତି। ଇତିମଧ୍ୟରେ ଟ୍ରେନ୍ ଦୁର୍ଘଟଣାକୁ ଏକ ମାସ ବିତିଯାଇଥିଲେ ମଧ୍ୟ ଲୋମଟାଙ୍କୁରା ଦୃଶ୍ୟ ଲୋକଙ୍କ ମନରୁ ଲିଭିନାହିଁ।
ଭୟାବହ ଟ୍ରେନ୍ ଦୁର୍ଘଟଣାରେ ୨୯୩ ଜଣଙ୍କର ମୃତ୍ୟୁ ହୋଇଥିବା ବେଳେ ଚିହ୍ନଟ ଓ ହସ୍ତାନ୍ତର ଲାଗି ବିଭିନ୍ନ ପର୍ଯ୍ୟାୟରେ ୧୬୨ଟି ମୃତଦେହ ଏମ୍ସ ପରିସରକୁ ଅଣାଯାଇଥିଲା। ପ୍ରଥମ ପର୍ଯ୍ୟାୟରେ ୮୧ଟିି ମୃତଦେହ ଚିହ୍ନଟ କରାଯାଇ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ବାକି ୮୧ଟି ମଧ୍ୟରୁ ୫୯ଟି ମୃତଦେହ ଏମ୍ସ ପରିସରରେ ଥିବା ୩ଟି କଣ୍ଟେନରରେ ସଂରକ୍ଷିତ ରଖାଯାଇଛି। ଇତିମଧ୍ୟରେ ଜୁନ୍ ୨୯ ବିଳମ୍ବିତ ରାତିରେ ପ୍ରଥମ ପର୍ଯ୍ୟାୟରେ ୨୯ଟି ଡିଏନ୍ଏ ନମୁନାର ଟେଷ୍ଟିଂ ରିପୋର୍ଟ ଆସିଥିଲା। ୩୦ ତାରିଖଠାରୁ ହସ୍ତାନ୍ତର ପ୍ରକ୍ରିୟା ଜାରି ରହିଛି। ପ୍ରଥମ ଦିନ ୬ ମୃତଦେହ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଥିଲା। ସେହିପରି ଜୁଲାଇ ୧ରେ ୧୩ ଏବଂ ୨ ତାରିଖରେ ୩ ମୃତଦେହ ଦାବିଦାରଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ରବିବାର ରାତି ସୁଦ୍ଧା ସମୁଦାୟ ୨୨ ମୃତଦେହ ହସ୍ତାନ୍ତର କରାଯାଇଥିବା ବେଳେ ଏବେବି ୫୨ଟିର ଚିହ୍ନଟ ପ୍ରକ୍ରିୟା ଜାରି ରହିଛି। ଦୁର୍ଘଟଣାକୁ ଏକ ମାସ ବିତିଯାଇଥିଲେ ମଧ୍ୟ ପରିବାରବର୍ଗ ନିଜ ନିଜ ସମ୍ପର୍କୀୟଙ୍କ ମୃତଦେହ ପାଇପାରୁନାହାନ୍ତି। ୫୨ଟି ମୃତଦେହ ଡିଏନଏ ରିପୋର୍ଟ କେବେ ଆସିବ ତାହାର ଉତ୍ତର କୌଣସି ଅଧିକାରୀଙ୍କ ପାଖରେ ନାହିଁ। ମୃତଦେହ ନେବା ଲାଗି ଦୂରଦୂରାନ୍ତରୁ ଆସୁଥିବା ପରିବାରବର୍ଗଙ୍କୁ କର୍ତ୍ତୃପକ୍ଷଙ୍କ ତରଫରୁ କେବଳ ଆଶ୍ୱାସନା ଦିଆଯାଉଛି। ଅନ୍ୟପକ୍ଷରେ ବାହାନଗା ରେଳଷ୍ଟେଶନ ନିକଟରେ ଏବେବି ଖଣ୍ଡ ବିଖଣ୍ଡିତ ଅବସ୍ଥାରେ ପଡ଼ିରହିଛି କରମଣ୍ଡଳ ଏକ୍ସପ୍ରେସ ଓ ମାଲବାହୀ ଟ୍ରେନ୍ର ଇଞ୍ଜିନ ଏବଂ ବଗି। ପୂର୍ବରୁ ରେଲଓ୍ବେର ସୂଚନା ଅନୁଯାୟୀ କ୍ଷତିଗ୍ରସ୍ତ ୨ ଇଞ୍ଜିନ ଓ ୧୭ଟି ବଗି ନିଲାମ ହେବ। ସ୍ଥାନୀୟ ଲୋକ ଓ ଟ୍ରେନ୍ରେ ଯାତ୍ରା କରଥିବା ଯାତ୍ରୀଙ୍କ ମନରୁ ଭୟ ଦୂର ଲାଗି ସେଗୁଡ଼ିକୁ କଳା ପଲିଥିନ୍ ଘୋଡାଇ ଦିଆଯାଇଛି। ବର୍ତ୍ତମାନ ସୁଦ୍ଧା ସେଗୁଡିକ ଟ୍ରାକ୍ ନିକଟରେ ପଡ଼ିରହିଛି। ଏ ସମ୍ପର୍କରେ ଖଡଗପୁର ଡିସିଏମ୍ ରାଜେଶ କୁମାର କହିଛନ୍ତି, ସିବିଆଇ ଏବଂ କୋର୍ଟଠାରୁ ଅନୁମତି ମିଳିସାରିଛି। କେବଳ ନିଲାମିକୁ ଅପେକ୍ଷା କରାଯାଇଛି।