ପୁରୀ ଅଫିସ,୧୮ା୧୧:ବଦଳିବ ଇନ୍ଦ୍ରଦ୍ୟୁମ୍ନ ପୁଷ୍କରିଣୀ ଓ ଏହାର ଚତୁଃପାର୍ଶ୍ୱ ଚିତ୍ର। ଅବହେଳିତ ଅବସ୍ଥାରେ ଥିବା ଏହି ତୀର୍ଥ ପୁଷ୍କରିଣୀର ଉନ୍ନତୀକରଣ କରାଯିବ। ଐତିହ୍ୟ ପର୍ଯ୍ୟଟନ କେନ୍ଦ୍ର ଭାବେ ଏହାକୁ ବିକଶିତ କରାଯିବ। ଶ୍ରଦ୍ଧାଳୁଙ୍କ ସୁବିଧା ପାଇଁ ଆବଶ୍ୟକ ବ୍ୟବସ୍ଥା ହେବ। ପୁଷ୍କରିଣୀକୁ ସଂଯୋଗ କରୁଥିବା ରାସ୍ତାରୁ ଜବରଦଖଲ ହଟାଯିବ। ବୁଧବାର ବିଭିନ୍ନ ବିଭାଗର ଅଧିକାରୀଙ୍କ ସହ ଜିଲାପାଳ ବଲୱନ୍ତ ସିଂ ଇନ୍ଦ୍ରଦ୍ୟୁମ୍ନ ପୁଷ୍କରିଣୀକୁ ଯାଇ ସ୍ଥିତି ପରଖିବା ପରେ ଏଭଳି ଅନେକ ନିଷ୍ପତ୍ତି ନେଇଛନ୍ତି। ଉନ୍ନତୀକରଣ କାର୍ଯ୍ୟ ଯଥାଶୀଘ୍ର ଆରମ୍ଭ କରିବା ଲାଗି ବିଭାଗୀୟ ଅଧିକାରୀଙ୍କୁ ଜିଲାପାଳ ନିର୍ଦ୍ଦେଶ ଦେଇଛନ୍ତି।
ପୁରୁଷୋତ୍ତମ କ୍ଷେତ୍ରର ପଞ୍ଚତୀର୍ଥ ମଧ୍ୟରେ ଇନ୍ଦ୍ରଦ୍ୟୁମ୍ନ ପୁଷ୍କରିଣୀ ଅନ୍ୟତମ। ହେଲେ ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଏହାର ପାଚେରି ଭୁଶୁଡ଼ି ପଡ଼ିିଥିବାବେଳେ ପୁଷ୍କରିଣୀରେ ନଳାପାଣି ମିଶୁଛି। ଏ ନେଇ ବିଭିନ୍ନ ସମୟରେ ସ୍ଥାନୀୟ ଲୋକେ ଅଭିଯୋଗ କରିଆସୁଥିଲେ। ଏବେ ଏହା ଉପରେ ପ୍ରଶାସନର ନଜର ପଡ଼ିିଛି। ଜିଲାପାଳ ଏବଂ ଅନ୍ୟ ଅଧିକାରୀମାନେ ପୁଷ୍କରିଣୀ ଓ ଏହାର ଚତୁଃପାର୍ଶ୍ୱ ବୁଲି ଦେଖିବା ସହ ଉନ୍ନତୀକରଣ ନିମନ୍ତେ ସାହିବାସିନ୍ଦାଙ୍କ ସହିତ ଆଲୋଚନା କରିଛନ୍ତି। ସାହି ନେତୃବୃନ୍ଦଙ୍କ ମତାମତ ଭିତ୍ତିରେ ଅନେକ ନିଷ୍ପତ୍ତି ନିଆଯାଇଛି। ଶ୍ରାଦ୍ଧ ଓ ପିଣ୍ଡଦାନ ଲାଗି ସ୍ବତନ୍ତ୍ର ବ୍ୟବସ୍ଥା କରିବାକୁ ପୂର୍ତ୍ତ ବିଭାଗ ନିର୍ବାହୀ ଅଧିକାରୀଙ୍କୁ ଜିଲାପାଳ ନିର୍ଦ୍ଦେଶ ଦେଇଛନ୍ତି। ଏଥିସହ ତୁଠ, ପାହାଚ, ଭାଙ୍ଗିଯାଇଥିବା ପାଚେରି ମରାମତି, ଶୌଚାଳୟ, ପୋଷାକ ପରିବର୍ତ୍ତନ ଗୃହ ଏବଂ ପୋଖରୀ ସଫା କାର୍ଯ୍ୟ ୧୫ଦିନ ମଧ୍ୟରେ ଶେଷ କରାଯିବ। ପାଚେରି କାନ୍ଥରେ ପେଣ୍ଟିଂ କରାଯିବ। ପେଣ୍ଟିଂଗୁଡ଼ିକରେ ଇନ୍ଦ୍ରଦ୍ୟୁମ୍ନର ଐତିହ୍ୟ ସ୍ଥାନ ପାଇବ। ପ୍ରବେଶ ପଥରେ ହାଇମାଷ୍ଟ ଲାଇଟ ଏବଂ ଅନ୍ୟ ତିନି କୋଣରେ ଉଜ୍ଜଳ ଆଲୋକୀକରଣ ବ୍ୟବସ୍ଥା ହେବ। ପୂର୍ବ ପାର୍ଶ୍ୱରେ ଡ୍ରେନ୍ ନିର୍ମାଣ ସହ ଏହା କଡ଼ରେ ଥିବା ସ୍ବେରେଜ ଲାଇନର ପୁନରୁଦ୍ଧାର କରାଯିବ। ପୁଷ୍କରିଣୀକୁ ପରିଷ୍କାର ରଖିବା ଓ ଦେଖାରଖା ପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ୨ଜଣ ଲୋକଙ୍କୁ ନିଯୁକ୍ତି ଦିଆଯିବ। ଡାକବାଜି ଯନ୍ତ୍ରରେ ଭଜନ ପରିବେଷଣ କରାଯିବ। ବିଭିନ୍ନ ସତର୍କତାମୂଳକ ସୂଚନା ଶ୍ରଦ୍ଧାଳୁଙ୍କୁ ଦିଆଯିବ। ଏ ନେଇ ଆସନ୍ତା ୨୦ ତାରିଖରେ ଇନ୍ଦ୍ରଦ୍ୟୁମ୍ନ ନିକଟରେ ବୈଠକ ବସିବ। ଏହାପରେ ବିଭାଗୀୟ ଅଧିକାରୀ ମାଟିଆପଡ଼ା ଓ ଟିକରପଡା ଅଞ୍ଚଳ ବୁଲି ସଫେଇ ଅଭିଯାନ ସମ୍ପର୍କରେ ଆଲୋଚନା କରିଥିଲେ। ସଫେଇ ଅଭିଯାନ ପାଇଁ ଗଠିତ ଟିମ୍ର ସଦସ୍ୟ ପୌର ନିର୍ବାହୀ ଅଧିକାରୀ ବିଜୟ କୁମାର ଦାଶ, ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା ପ୍ରମୁଖ ଉପସ୍ଥିତ ଥିଲେ।
ଅନ୍ୟପକ୍ଷରେ ବୁଧବାର ପ୍ରାତଃ ସମୟରେ ଜିଲାପାଳ ସିଂ ଗଦାଧର ହାଇସ୍କୁଲ ଓ ମୋଚିସାହିସ୍ଥିତ ଗାଡ଼ିଖାନା ପରିସରରେ ସ୍ବଚ୍ଛ ସୈନିକମାନଙ୍କ ପ୍ରାର୍ଥନା ସଭାରେ ଯୋଗଦେବା ସହ ସେମାନଙ୍କୁ ସ୍ବଚ୍ଛତାର ଶପଥ ପାଠ କରାଇଥିଲେ। ଅଳିଆକୁ ପୁରୀର ପବିତ୍ର ମାଟିରେ ସ୍ପର୍ଶ କରାଇ ନ ଦେବାକୁ ପରାମର୍ଶ ଦେଇଥିଲେ। ସୂଚନାଥାଉ କି, ଇନ୍ଦ୍ରଦ୍ୟୁମ୍ନ ପୁଷ୍କରିଣୀରେ ସ୍ନାନ, ପିତୃ ଓ ଦେବତାଙ୍କ ତର୍ପଣ ବିଧାନରେ ସମ୍ପାଦିତ କଲେ ମନୁଷ୍ୟ ସହସ୍ର ଅଶ୍ୱମେଧ ଯଜ୍ଞର ଫଳ ଲାଭ କରେ ବୋଲି ବିଶ୍ୱାସ ରହିଛି।