ଏବେ ଡିଜିଟାଲର ଯୁଗ। ଆଖି ପିଛୁଳାକେ ପୃଥିବୀର ଗୋଟିଏ ପ୍ରାନ୍ତରୁ ଅନ୍ୟ ପ୍ରାନ୍ତକୁ ଖବର ପଠାଯାଇ ପାରୁଛି। ଇଣ୍ଟରନେଟ ଖବର ଆଦାନ ପ୍ରଦାନର ମାଧ୍ୟମକୁ ଅଧିକ ସହଜ କରିଛି। ହେଲେ ଏବେ ମଧ୍ୟ ଚିଠିର ଗୁରୁତ୍ୱ ରହିଛି। ବର୍ତ୍ତମାନ ବହୁ ସଂଖ୍ୟକ ଲୋକ ଚିଠିରେ ଭାବର ଆଦାନ ପ୍ରଦାନ କରିଥା’ନ୍ତି। ଭାବର ଆଦାନ ପ୍ରଦାନରେ ଚିଠିର ଗୁରୁତ୍ୱକୁ ଉପଲବ୍ଧ କରିବା ପାଇଁ ପ୍ରତିବର୍ଷ ଅକ୍ଟୋବର ୯ରେ ବିଶ୍ୱ ଡାକ ଦିବସ ପାଳନ କରାଯାଇଥାଏ। ୟୁନିଭର୍ସାଲ ପୋଷ୍ଟାଲ ୟୁନିୟନ ୧୮୭୪ରେ ସ୍ବିଜରଲାଣ୍ଡରେ ଆରମ୍ଭ ହୋଇଥିଲା। ୟୁନିଭର୍ସାଲ ପୋଷ୍ଟାଲ ୟୁନିୟନ ପକ୍ଷରୁ ବିଶ୍ୱ ଯୋଗାଯୋଗ ବିପ୍ଳବର ଆରମ୍ଭ କରାଯାଇଥିଲା, ଯାହାକି ସମଗ୍ର ବିଶ୍ୱରେ ଅନ୍ୟମାନଙ୍କୁ ଚିଠି ଲେଖିବାକୁ ପ୍ରୋସାହିତ କରିଥାଏ। ପରବର୍ତ୍ତୀ ସମୟରେ ବିଶ୍ୱ ଡାକ ଦିବସ ୧୯୬୯ରେ ଆରମ୍ଭ ହୋଇଥିଲା। ସେହି ଦିନଠାରୁ, ବିଶ୍ୱର ବିଭିନ୍ନ ଦେଶ ଡାକସେବାର ଗୁରୁତ୍ୱକୁ ଉପଲବ୍ଧି କରିବାକୁ ଏହି ଦିବସ ପାଳନ କରିଥା’ନ୍ତି। କେତେକ ଦେଶରେ ଏହି ଦିବସ ପାଳନ ଅବସରରେ ଡାକଘରଗୁଡ଼ିକରେ ସ୍ବତନ୍ତ୍ର ଷ୍ଟାମ୍ପ ସଂଗ୍ରହ ପ୍ରଦର୍ଶନୀ ଆୟୋଜନ କରାଯାଇଥାଏ।
