କେନ୍ଦୁଝର,୧୬ା୧୦(ସ୍ବ.ପ୍ର.): କେନ୍ଦୁଝର ଜିଲା ଭାଜପାରେ ଚାଲିଥିବା ଗୋଷ୍ଠୀ କନ୍ଦଳ ଏବେ ପଦାରେ ପଡ଼ିଛି। ଶୁକ୍ରବାର କେନ୍ଦୁଝର ଲୋକ ସଭା ମଣ୍ଡଳୀର ସମୀକ୍ଷା ବୈଠକରେ ବର୍ତ୍ତମାନର ଜିଲା ସଭାପତି ଅଂଶୁମାନ ସବୁଜ ମହାନ୍ତ ବର୍ମା, ପୂର୍ବତନ ଜିଲା ସଭାପତି ରାଧାକାନ୍ତ ମହାନ୍ତଙ୍କୁ ଆକ୍ରମଣ କରିବା ଘଟଣା ବିବାଦ ଲୋକଲୋଚନକୁ ଆସିଛି। କେନ୍ଦୁଝର ଲୋକ ସଭା ନିର୍ବାଚନମଣ୍ଡଳୀ ପ୍ରଭାରୀ ସଞ୍ଜୀବ ମହାନ୍ତି ଓ ସଂଯୋଜକ ଶୁକଦେବ ମହାନ୍ତଙ୍କ ଉପସ୍ଥିତିରେ ଘଟଣା ଘଟିଥିବାରୁ ଏହି ବାର୍ତ୍ତା ରାଜ୍ୟ ଓ କେନ୍ଦ୍ର ସଂଗଠନରେ ପହଞ୍ଚତ୍ଛି।
ସମୀକ୍ଷା ବୈଠକରେ କେନ୍ଦୁଝର ଲୋକ ସଭାର ୭ ବିଧାନସଭାର ବିଧାୟକ ପ୍ରାର୍ଥୀ, ପ୍ରଭାରୀ ଓ ସଂଯୋଜକମାନେ ଉପସ୍ଥିତ ଥିଲେ। ଚମ୍ପୁଆ ନିର୍ବାଚନମଣ୍ଡଳୀର ବିଧାୟକ ପ୍ରାର୍ଥୀ, ପ୍ରଭାରୀ ଓ ସଂଯୋଜକଙ୍କୁ କାହିଁକି ଡକାଗଲା ନାହିଁ ବୋଲି ଲୋକ ସଭା ପ୍ରଭାରୀଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ସେହିପରି ବିନା ରାଜ୍ୟ ଅନୁମୋଦନରେ ମଣ୍ଡଳ ସଭାପତି ପରିବର୍ତ୍ତନ କରାଯିବା ଏବଂ ଏ ନେଇ କାହିଁକି ସମସ୍ତଙ୍କୁ ଅବଗତ କରାଗଲା ନାହିଁ ବୋଲି ପୂର୍ବତନ ସଭାପତି ରାଧାକାନ୍ତ ପ୍ରଶ୍ନ କରିଥିଲେ। ଏଥିରେ ଉତ୍କ୍ଷିପ୍ତ ହୋଇ ସଭାପତି ଅଂଶୁମାନ ସବୁଜ ତାଙ୍କ ଉପରକୁ ମୋବାଇଲ ଫିଙ୍ଗିବା ସହ ଗାଳିଗୁଲଜ କରିଥିଲେ। ରାଧାକାନ୍ତ ଆହତ ହୋଇ ଜିଲା ମୁଖ୍ୟ ଡାକ୍ତରଖାନାକୁ ଯାଇ ଚିକିତ୍ସିତ ହେବାକୁ ପଡ଼ିଥିଲା। ଘଟଣା ନେଇ ରାଧାକାନ୍ତ ଥାନାକୁ ଯାଇ ନ ଥିବା ବେଳେ ତାଙ୍କ ଉପରକୁ ମୋବାଇଲ ଫିଙ୍ଗାଯାଇଥିବା କଥା ସ୍ବୀକାର କରିଛନ୍ତି। ପୁରୁଣା ନେତା ଓ କର୍ମୀଙ୍କୁ ପ୍ରାଧାନ୍ୟ ଦିଆ ନ ଯିବାକୁ ନେଇ ଭାଜପାରେ ପୁଞ୍ଜୀଭୂତ ଅସନ୍ତୋଷ ବଢ଼ିବାରେ ଲାଗିଛି। ରାଜ୍ୟ ଓ କେନ୍ଦ୍ର ସଂଗଠନ ଗୁରୁତ୍ୱ ନ ଦେଲେ ଦଳର ସ୍ଥିତି ଦୁର୍ବଳ ହୋଇ ୨୦୨୪ ନିର୍ବାଚନରେ ଜିଲାରେ ଭାଜପା ଶୂନ ହୋଇଯିବ ବୋଲି ରାଜନୈତିକ ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି।
ଜିଲା ସଭାପତି ଅଂଶୁମାନ ସବୁଜ ମହାନ୍ତ ବର୍ମା କହିଛନ୍ତି ଯେ, ଘଟଣା ସେଭଳି ନୁହେଁ ା ସାମାନ୍ୟ ଘଟଣାକୁ ବଡ଼ କରାଯାଉଛି। ତେବେ ଘଟଣା ଯାହା ହେଉନା କାହିଁକି ଏହି ଘଟଣା ରାଜ୍ୟ ଓ କେନ୍ଦ୍ର ଦଳୀୟ ନେତୃତ୍ୱ ପାଖରେ ପହଞ୍ଚତ୍ ସାରିଛି। ଆସନ୍ତା ମାସରେ କେନ୍ଦୁଝର ଦାୟିତ୍ୱରେ ଥିବା କେନ୍ଦ୍ର ଆଦିବାସୀ ସମ୍ବଳ ମନ୍ତ୍ରୀ ଅର୍ଜୁନ ମୁଣ୍ଡା ଜିଲା ଗସ୍ତରେ ଆସୁଥିବାରୁ ତା’ ପୂର୍ବରୁ ଏହି ବିବାଦ ସମାଧାନ ନ ହେଲେ ନିଶ୍ଚିତ ଭାବରେ ସମସ୍ୟା ସୃଷ୍ଟି କରିବ ବୋଲି ମତପ୍ରକାଶ ପାଉଛି।
