ଗଞ୍ଜାମ,୨୮।୮(ଡି.ଏନ୍.ଏ.): ଗଞ୍ଜାମ ଥାନା ଅନ୍ତର୍ଗତ ୱାର୍ଡ ନଂ ୩ ମଧ୍ୟଖଣ୍ଡ ସାହିରେ ଶାଶୁଘର ସମ୍ମୁଖରେ ବୋହୂ ଧାରଣା ଦେବା ଘଟଣା ନୂଆମୋଡ ନେଇଛି। ଏଠାରେ ରହୁଥିବା ନାରାୟଣ ପଣ୍ଡା ଓ ତାଙ୍କ ପରିବାର ନିର୍ଯାତନା ଦେଉଥିବା ଅଭିଯୋଗରେ ବୋହୂ ତନ୍ମୟୀ ପଣ୍ଡା ଶାଶୁଘର ସମ୍ମୁଖରେ ଶନିବାର ଧାରଣା ଦେଇଥିଲେ l ହେଲେ ରବିବାର ସକାଳେ ତନ୍ମୟୀଙ୍କ ଶାଶୁ ସୁଷମା ପଣ୍ଡାଙ୍କ ସନ୍ଦେହଜନକ ମୃତ୍ୟୁ ଘଟିଥିବା ଜଣାପଡିଛି l ଏନେଇ ପୋଲିସ ଖବର ପାଇ ତଦନ୍ତ ଜାରି ରଖିଛି। ଅପରପକ୍ଷେ ଶାଶୁଙ୍କ ମୃତ୍ୟୁ ଖବର ପାଇ ବୋହୂ ଧାରଣାସ୍ଥଳରୁ ଫେରାର ହୋଇଯାଇ ଥିବା ଜଣାପଡିଛି ।
ପଡୋଶୀଙ୍କ କହିବା ମୁତାବକ, ସକାଳ ସାଢେ ୫ଟାରେ ସୁଷମା ଅସୁସ୍ଥ ଅନୁଭବ କରିବାରୁ ପରିବାରଲୋକେ ତାଙ୍କୁ ଏକ ଅଟୋ ଯୋଗେ ବ୍ରହ୍ମପୁର ମେଡିକାଲ ନେଇଥିଲେ । ହେଲେ ବାଟରେ ତାଙ୍କର ମୃତ୍ୟୁ ଘଟିଥିଲା। ତେବେ ବୋହୂଙ୍କ ଧାରଣା ପରେ ଲୋକ ଲଜ୍ଜା ସହି ନ ପାରି ସେ କିଛି ବିଷ ପାନ କରିଦେଇଥିବା କୁହାଯାଉଛି। ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।