ଚେନ୍ନାଇ, ୨।୪-ଆହତ ସମସ୍ୟା ଯୋଗୁ ଦିଲ୍ଲୀ କ୍ୟାପିଟାଲ୍ସ ଅଧିନାୟକ ଶ୍ରେୟାସ ଆୟାର ଆଗାମୀ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ରେ ଖେଳିପାରିବେ ନାହିଁ। ଇଂଲଣ୍ଡ ବିପକ୍ଷ ଦିନିକିଆ ସିରିଜ ଅବସରରେ ସେ କାନ୍ଧରେ ଆଘାତ ପାଇଥିଲେ। ଚଳିତ ମାସ ୮ ତାରିଖରେ ତାଙ୍କ କାନ୍ଧରେ ଅସ୍ତ୍ରୋପଚାର ହେବ। ତେଣୁ ସେ ଆଇପିଏଲର ଆଗାମୀ ସିଜନରୁ ଓହରି ଯାଇଛନ୍ତି। ତେବେ ସେ ନ ଖେଳିଲେ ମଧ୍ୟ ପ୍ଲେୟର୍ସ ଇନ୍ସୁରାନ୍ସ ସ୍କିମ୍ରେ ପୂରା ପାଉଣା ପାଇବେ। କେନ୍ଦ୍ରୀୟ ଚୁକ୍ତିରେ ସାମିଲ ଥିବା ସମସ୍ତ ଖେଳାଳିଙ୍କ ପାଇଁ ଇନ୍ସୁରାନ୍ସ ପଲିସି ଲାଗୁ ହେବ। ୨୦୧୧ ସିଜନ ପୂର୍ବରୁ ତତ୍କାଳୀନ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସମ୍ପାଦକ ଏନ. ଶ୍ରୀନିବାସନ ଏବଂ ଭାରତୀୟ ଖେଳାଳିଙ୍କ ମଧ୍ୟରେ ଆଲୋଚନା ପରେ ଏହି ସ୍କିମ୍ ଆରମ୍ଭ କରାଯାଇଛି। ଏହି ସ୍କିମ୍ ଅନୁସାରେ ଦେଶ ପକ୍ଷରୁ ଖେଳୁଥିବା ସମୟରେ ଆହତ ସମସ୍ୟା କିମ୍ବା ଦୁର୍ଘଟଣା ଯୋଗୁ ଯଦି କୌଣସି ଖେଳାଳି ଆଇପିଏଲ ପାଇଁ ଆଂଶିକ କିମ୍ବା ସମ୍ପୂର୍ଣ୍ଣଭାବେ ଉପଲବ୍ଧ ହୋଇ ପାରିବେ ନାହିଁ ତେବେ ସେହି ଅନୁସାରେ କ୍ଷତିପୂରଣ ପାଇବେ। ଉଦାହରଣ ସ୍ବରୂପ ଭାରତ ପକ୍ଷରୁ ଖେଳୁଥିବାବେଳେ ରୋହିତ ଶର୍ମା ଡାହାଣ କାନ୍ଧରେ ଆଘାତ ପାଇଛନ୍ତି। ଏବେ ସେ ଚିକିତ୍ସିତ ହେଉଛନ୍ତି ଏବଂ ଏପ୍ରିଲ ଦ୍ୱିତୀୟ ସପ୍ତାହରେ ତାଙ୍କ ଆହତ ସମସ୍ୟାକୁ ଅନୁଧ୍ୟାନ କରାଯିବ। ଏହାପରେ ସେ କେବେ ଆଇପିଏଲ-୨୦୨୧କୁ ଫେରିପାରିବେ ତାହା ସ୍ପଷ୍ଟ ହେବ। ସେ ଅତିକମ୍ରେ ମୁମ୍ବାଇ ଇଣ୍ଡିଆନ୍ସର ପ୍ରଥମ ୩ଟି ମ୍ୟାଚ ଖେଳିପାରିବେ ନାହିଁ। ଆଇପିଏଲରେ ତାଙ୍କ ମୋଟ ପାଉଣା ହେଉଛି ୧୫ କୋଟି। ତେଣୁ ସେ ଯେତୋଟି ମ୍ୟାଚରେ ଖେଳିପାରିବେ ନାହିଁ ସେହି ଅନୁସାରେ କ୍ଷତିପୂରଣ ପାଇବେ। ଯଦି କୌଣସି ଖେଳାଳି ଆଂଶିକଭାବେ ଅନୁପସ୍ଥିତ ରୁହନ୍ତି ତେବେ ସମ୍ପୃକ୍ତ ଫ୍ରାଞ୍ଚାଇଜ୍ ଏବଂ ବିସିସିଆଇ ମିଶି କ୍ଷତିପୂରଣ ଦେବେ। ଆୟାରଙ୍କ ଭଳି ସମ୍ପୂର୍ଣ୍ଣ ସିଜନରୁ ଆଉଟ ହୋଇଥିବା ଖେଳାଳିଙ୍କ କ୍ଷେତ୍ରରେ ବିସିସିଆଇ ସମ୍ପୂର୍ଣ୍ଣ ପାଉଣା ଦେବ। ତେବେ ଏହି ସ୍କିମ୍ କେନ୍ଦ୍ରୀୟ ଚୁକ୍ତିରେ ସାମିଲ ନ ଥିବା ଖେଳାଳିଙ୍କ ପାଇଁ ଲାଗୁ ହେବନାହିଁ।