ବୋର୍ଡ ଅଫ କଣ୍ଟ୍ରୋଲ ଫର୍ କ୍ରିକେଟ ଇନ ଇଣ୍ଡିଆ (ବିସିସିଆଇ) ଟିମ ଇଣ୍ଡିଆର ମୁଖ୍ୟ କୋଚ ପଦ ପାଇଁ ଅଷ୍ଟ୍ରେଲିଆର କିମ୍ବଦନ୍ତୀ କ୍ରିକେଟର ରିକି ପଣ୍ଟିଂଙ୍କୁ ନିକଟକୁ ଡାକରା ଯାଇଥିଲା। ତେବେ ଅଷ୍ଟ୍ରେଲୀୟ ପୂର୍ବତନ ଅଧିନାୟକ ପଣ୍ଟିଂ ବିସିସିଆଇର ଅଫରକୁ ପ୍ରତ୍ୟାଖ୍ୟାନ କରିଛନ୍ତି। ପଣ୍ଟିଂ ଏବେ ଆଇପିଏଲ ଫ୍ରାଞ୍ଚାଇଜ ଦିଲ୍ଲୀ କ୍ୟାପିଟାଲ୍ସ ସହିତ ଜଡିତ। ତାଙ୍କ ନେତୃତ୍ୱରେ ଦିଲ୍ଲୀର ଦଳ ଗତ ତିନିବର୍ଷ ଧରି ପ୍ଲେ ଅଫରେ ସ୍ଥାନ ପାଇଛି। ଏହା ବ୍ୟତୀତ ଦିଲ୍ଲୀ ଦଳ ମଧ୍ୟ ଆଇପିଏଲ ୨୦୨୦ ରନର୍ ଅପ ହୋଇଥିଲା।
ପଣ୍ଟିଂଙ୍କ ମନା କରିବାର କାରଣ ଜଣା ପଡିନାହିଁ। ଏବେ ରବି ଶାସ୍ତ୍ରୀଙ୍କ ପରେ ରାହୁଲ ଦ୍ରାବିଡ ଭାରତୀୟ କ୍ରିକେଟ ଦଳର ମୁଖ୍ୟ କୋଚ ହେବେ ବୋଲି କୁହାଯାଉଛି। ୧୯୯୫ ରେ ପଣ୍ଟିଂ ଏବଂ ୧୯୯୬ରେ ଦ୍ରାବିଡ ଡେବ୍ୟୁ କରିଥିଲେ ଏବଂ ଉଭୟ ଖେଳାଳି ୨୦୧୨ ରେ ଅବସର ନେଇଥିଲେ। ଉଭୟ ନିଜ ସମୟର ମହାନ ଖେଳାଳି ଥିଲେ। ପଣ୍ଟିଂ ୭୧ ଶତକ ସହିତ ଆନ୍ତର୍ଜାତୀୟ କ୍ରିକେଟରେ ୨୭,୪୮୩ ରନ ସଂଗ୍ରହ କରିଥିବାବେଳେ ଦ୍ରାବିଡ ୪୮ ଶତକ ସହାୟତାରେ ୨୪ ହଜାରରୁ ଅଧିକ ରନ ସଂଗ୍ରହ କରିଛନ୍ତି।
ଦ୍ରାବିଡ ପ୍ରଥମେ ଟିମ ଇଣ୍ଡିଆର ମୁଖ୍ୟ କୋଚ ହେବାକୁ ପ୍ରସ୍ତୁତ ନ ଥିଲେ କିନ୍ତୁ ବିସିସିଆଇରୁ ଜିଦ କରିବାରୁ ସେ ଏଥିରେ ରାଜି ହୋଇଥିଲେ। ୪୮ ବର୍ଷୀୟ ଦ୍ରାବିଡ଼, ଭାରତର ଅନ୍ୟତମ ଶ୍ରେଷ୍ଠ ଖେଳାଳି, ଗତ ୬ ବର୍ଷ ଧରି ଇଣ୍ଡିଆ ଏ ଏବଂ ଅଣ୍ଡର-୧୯ ଦଳର ଦାୟିତ୍ୱରେ ଅଛନ୍ତି। ସେ ବର୍ତ୍ତମାନ ବେଙ୍ଗାଲୁରୁର ନ୍ୟାସନାଲ କ୍ରିକେଟ ଏକାଡେମୀ (ଏନସିଏ) ର ମୁଖ୍ୟ ଅଟନ୍ତି।