ମେଲବୋର୍ନ,୨୯।୧୨: ମେଲବୋର୍ନ ଟେଷ୍ଟରେ ଅଷ୍ଟ୍ରେଲିଆ ବିପକ୍ଷରେ ଭାରତୀୟ ବୋଲରଙ୍କ ପ୍ରଦର୍ଶନ ଅତ୍ୟନ୍ତ ଭଲ ଥିଲା। ଭାରତୀୟ ବୋଲିଂ ଲାଇନଅପର ସମସ୍ତ ବୋଲର ନିଜର ଶ୍ରେଷ୍ଠ ପ୍ରଦର୍ଶନ କରିଥିଲେ। ଏହି ଟେଷ୍ଟରେ ରବିଚନ୍ଦ୍ରନ ଅଶ୍ୱିନ ଟିମ ଇଣ୍ଡିଆର ବୋଲିଂର ନେତୃତ୍ୱ ନେଇଥିଲେ। ଦଳର ସବୁଠାରୁ ଅଭିଜ୍ଞ ଖେଳାଳି ଅଶ୍ୱିନ ମେଲବୋର୍ନରେ ୫ ଉଇକେଟ ନେଇଛନ୍ତି। ସେ ପ୍ରଥମ ଇନିଂସରେ ୩ ଉଇକେଟ ଏବଂ ଦ୍ୱିତୀୟ ଇନିଂସରେ ୨ ଉଇକେଟ ନେଇଥିଲେ। ଏହି ମ୍ୟାଚ୍ରେ ଅଶ୍ୱିନ ମୁରଲୀଧରନଙ୍କ ବିଶ୍ୱ ରେକର୍ଡ ଭାଙ୍ଗିଛନ୍ତି। ମେଲବୋର୍ନ ଟେଷ୍ଟର ଦ୍ୱିତୀୟ ଇନିଂସରେ ଅଶ୍ୱିନ ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ ଜୋଶ ହେଜେଲଉଡଙ୍କୁ ଆଉଟ୍ କରିବା ମାତ୍ରେ ସେ ବିଶ୍ୱ ରେକର୍ଡ ହାସଲ କରିଥିଲେ। ଅଶ୍ୱିନ ୧୯୨ଥର ପାଇଁ ବାମହାତୀ ବ୍ୟାଟ୍ସମ୍ୟାନଙ୍କୁ ଶିକାର କରିଥିଲେ, ଯାହା ଟେଷ୍ଟ କ୍ରିକେଟରେ ବିଶ୍ୱରେକର୍ଡ ଅଟେ। ଏହାପୂର୍ବରୁ ମୁରଲୀଧରନ ୧୯୧ ଉଇକେଟ ନେଇ ଶୀର୍ଷରେ ରହିଥିଲେ। ମୁରଲୀଧରନ ତାଙ୍କ ୮୦୦ ଟେଷ୍ଟ ଉଇକେଟ ମଧ୍ୟରୁ ୧୯୧ ଥର ବାମହାତୀ ବ୍ୟାଟ୍ସମ୍ୟାନଙ୍କୁ ଆଉଟ୍ କରିଥିଲେ, କିନ୍ତୁ ଅଶ୍ୱିନ କେବଳ ୩୭୫ ଉଇକେଟ ପରେ ଏହି ରେକର୍ଡ ଭାଙ୍ଗିଛନ୍ତି। ଦ୍ରୁତ ବୋଲରଙ୍କ ବିଷୟରେ କହିବାକୁ ଗଲେ ଜେମ୍ସ ଆଣ୍ଡରସନ ବାମହାତୀ ବ୍ୟାଟ୍ସମ୍ୟାନଙ୍କ ସର୍ବାଧିକ ଶିକାର କରିଛନ୍ତି। ଏହି ଇଂଲଣ୍ଡ ଦ୍ରୁତ ବୋଲର ୧୮୬ଥର ବାମହାତୀ ବ୍ୟାଟ୍ସମ୍ୟାନଙ୍କୁ ଆଉଟ୍ କରିଛନ୍ତି।